NAHUM
Rhorta puka Nahum pa rwagahniorta leta Niniwe, lodna-hairi Asyur letlawanni de niwra hota ntuin la' yawa. Riy Niniwe di makden Israel arwalli, mere Orgahi-Orha'a Nnairia lodna-hairi dom to'a mak karuri totpa nal Niniwe la' yawa.
La' puk di ralamni de, la' lihirni (ayat) dom de rweta makden Israel re la “makden Yehuda”, la' ayat dom de “Yakopa duratni-waitni” onde “Uplerlawna rimormiorni”. Rhorat targa emkade yoma la' ululu de Abraham upni ida nanni Yakopa. Noma Uplerlawna Nal nan warwuaru la' Yakop de “Israel”. Ne Yakop/Israel a'nani id de Yehuda. Pa la' pa ntutu-nte'ela Nahum lerni de, makden Israel nohoni-raini de, la' ler dom de rweta la “Israel” me la' ler dom owa'an de rweta la “Yehuda”. Yerusalem de, noha-rai Israel me Yehuda letlawanni de.