3
Let Niniwe di de nler olek la yatyatni-halalli yatlorni-yatra'ani,yoma npenpuen lia'a ohpa-lahara, wniunu-wnienna,
me yehwani re sukni rwarui-rwate'la nana lodna-hairi harahu re'eni-tniarnu.
2 Tatlina Niniwe arwalli rliwar la kuda totpa rafiekat la yawlari
nampena kuda re lakni yetanni
me roda yetni-warna yoma keret ya'ara re meranni.
3 Keki-rautu mak kodi kuda re rahmuakru la' wnialerna,
rodia tera-wehla mak klipa-ka'ma!
Riy mak kmati de ta'eni rekan nana,
mak mati re raniutni, nhi'nande rira rala' de irwetur tar lia.
4 Letlawna Niniwe arwalli re ral ir la' yawa
onnila makden Niniwe re nhiolli-lietni illu-wniehwani de
emolmolan nekama patke' yata ida maka nhi'inde ka'ihira muanke'a.
Yoma makden Niniwe sukni nnairia ukru-rehera me lira-yatu nohkerna
totpena rpudi-rakal lodna-hairi la' meni-meni to'a.
5 Orgahi-Orha'a Makodi Plolli la hya'a-hya' to'a wawannu, Niwra:
“Makden Niniwe miy, mitlin reri o! A' di de arwalmi.
Emeknekama patke' yata maka riy rukmua, de hota Aghi' molmola-mama'a miy lia riy makden la lodna-hairi re gaini ralamni.a
6 Hota Agodia haga'u-hamda'ara godi wua'almi
totpa Aghi'a pa riy rmakriarni miy
me rkeni miy lia nurnu tutnu.
7 Mak kamkeka miy de hota rhoitio'or miy pa riwra:
“Niniwe de namkoha-namnanna olek wa!
Mere hota he' mak nko'a-nkakru napolu-natnianni nohora?!
Riy id mana nahmena nhi' ralammi pa namtiernu.””
8 Ee, letlawna Niniwe, yanpa ompuarora rurmu-laimu nareh miemna Tebe, Mesir letlawanni dena?!
Gerlawna Nil nle'lu reri leta Tebe pede arwalli re ta'enniana rleretia.
Pede plola, gerlawna Nil de emeknekama Tebe ha yaro'wa genni.
9 Letlawna Tebe plolli-mneheni rurni-laini nareh miemna.
yoma makodi keki-rautu la noha Mesir honona me noha Etiopia (Kusyi) rtulan nan Tebe la ara ralamni.
Emkade walia noha Libia me noha Put nhi'inde rtulan wallia makden Tebe.
10 La'pa emkade nekde, Tebe mutnu-rahanu, de arwalli rtorna pa rodia la'a nhioplial geni.
Ne rlol meni-meni to'a pa rhopliala makden Tebe upni-a'nani harahu re la riy harahu gaini ralamni
totpa ramkek nana a'na ke'a re rmat miemna.
Tebe o'ta-matni nekde, arwalli rala rianti ra rkohoga
na'nama rhakra o'ta-mata re, de rwahedga patui totpa he' mak klernana de nhi'a la atni-wa'arni.
11 Ee makden Niniwe miy re, hota miy emkade wal pia hota mhiakomu-mhiakamu
yoma hota Uplerlawna hankeranni-ralmha'arni ntuin meman la miy wawanmi.
La’ ler de hota mpiatikil pa mliewan la' arwalmi re mere plollolli de hamamuaumua!
12 Hota yaro'wa genmi re honona emeknekama kara ona
maka nwerat nohora wo'oni mak gawra.
La'pa rkahyoi onni de wo'oni re
hota rtuin la'a riy mak kiwra ka'ana wawni ralamni.
13 Kekmi-rautmi rakleh ruri emeknekama patke'a
pede la'pa arwalmi riwra rwalerna miy nohomi-raimi de riy id mana edon natiaka.
Pa hota ai na'an mutmutnia puohra lawanmu kniahro'pani!
14 Ee! Mtip nieka gera pa mpiahi' targa totpena la'pa arwalmi re rle'lu rer mia'ta miy,
de gera ed olek la.
Mniairia tan miera pa mhi'a la watu na'nama mhi'a watu-watu re totpena pidara
pa mhi' aruria leta lutur lawanmi me yaro'wa genmi re!
15 Mere hya' maka mhi'a re de hota edon rwal nian la hadomdoma,
yoma hota ai na'an doin let lawanmi
me rimormiormi honona rmat lia'a ara ralamni.
Rmati-rmol mueman la emeknekama nhyi'a-tlunni wullu-we'elli
maka kongoha ra'an doinia.
La'pa arwalmi edon ral miy letmi la' yawa de, miy rimormiormi re
emeknekama kongoha maka ra'ititar rerlia liawanni!
16 De mak ka'olu-kala'ala la miy let lawanmi ralamni na'ititar rer lia liawanni nhi'nande
rarehia wtion mak kdella lyanti!
Mere la' dodo'ondi de rmol muemn olekwa
emeknekama kongoha mak kweran doinia liwarni pa rnem pa rmolu mueman wa.
17 O'ta-matmi ror wutga tniutnu-nhianni nhielli-liarni (pejabat) la'pa makodi ahu namni (kapala perang) re emeknekama kongoh woka
mak kayaheu lia'a lutru la' woki lerni.
Mere la'pa lera nhit wa dewade rnem molmuol wua,
pa la' dodo'on di de riy id mana naplin niohora rler la meni.
18 Makden letlawna Niniwe rayni ne! O' di de noha-rai Asyur o'ta-mata lalawna.
Mere Asyur o'tani-matni, tniutnu-nhianni nhielli-liarni
la'pa marna-wuhura honona re rmati momuou wa.
Makden Niniwe honona rawlar pia rahniakar la'a wo'ora-kawru
me riy id mana ta'enniana nodi wali owa'ana re.
19 No'omi-rarmi de ta'enniana ramou-ragapun nana.
Ne ta'enniana mkialwied owa'ana.
La' riy honona mak katlin nan de mliernan oleka lyunni-wnierna tniwru-gora de hota rahepru pa rpok limni,
yoma la dodo'ondi de miy mlier olek la yatyatni-halalli yatlorni-yatra'ani
pa ta'enniana miutni-mdiahla oleka rimormior wialli.