Obadya
1
Hadi de Obadya yamkekni.Orgahi-Orha'a Nwahaur nohora makden Edom, de Itmatromlawanni nnio'oni de emkadi:
“Makodi lira ida nodi Orgahi-Orha'a lirni la lodna-hairi dom to'a re
pa tatlin de lirni niwra:
“Mpiahi' pa mlia mi'ara!
Mmiai pia tla twalerna makden Edom.””
2 Me Orgahi-Orha'a Nakot la makden Edom re, Niwra: “Hota Aghi' miy pia mikleh ruri
pede lodna-hairi re honona rapolu-ralielan miy.
3 Let lawanmi de wo'or wat muaka karuri-ka'orta,
genmi de wo'ora hananni mak ktultulu.
La' hade pede mpiarora miwra: He' maka hota nhi' tuini miy?!
Mere ihrami-ralammi maka katulu-kapetan de nputra-npalak nan olek miy wia.
4 La'pa mriana inonmi yoma miy rurmi-laimi,
me mhi'a rommi la' gen tutullu emeknekama ma'nu iha lakma (rajawali) puonni
pa tullu ntai miemna wtion makdella lyanti mana,
hota Aghi'a pa ntuiniernu.
5 Mak kamna'a onde mak kwarui rmai melmela de ha ra'al hya' maka ralamni rwahaka, mere edon ra'al hyonmi-hyanmi honona.
Riy miaka kitla anggur wo'a la'a nhyi'a ralamni de nhi'inde naltaru wo'oni doma.
Mere arwalmi re hota rwunu-rwenna pa rkuhi-rho'or doin momuou miy!
6 Makden Edom di, de Esau duratni-waitni miy!
Hota arwalmi rwarui-rwate'la nan hyonmi-hyanmi honona.
Re'emi-tniarmi mak kayade'a mana hota ra'al momuoga!
7 Noha-rai mak ktulan nan miy pa mi'ara re hota rwaldioin pa rhokar doin miy lia'a nohomi-raimi.
Ir de miy heiwialmi mere emkade ho'mana rputra-rpalak miy pia ralernu miy lia' yawa.
Mior ir pa mi'in wutu-miemun wut lia' wrag' ida mere rhi' targo' miy pia mlier tar lia tototni re ralamni.
Hota riy rapolu-ralielan miy pia riwra: “Hoi! Miy yatmi mak kpoklihira honona erla meni?!””
8 Orgahi-Orha'a Nhar lirni, Niwra: “La' lera Agala niukmu la' makden Edom de A wunu-wuenna rimormior mak katu honona.
Hota honona re rmol muemna, pa edon nayamkek olek la wa.
9 Keki-rautu makden Edom mak kwatiawu leta Teman ho'mana ramta'ata,
nhi'nande rakleha rur pia arwalli re rwunu-rwenan makden Edom momuoga.
10 Mimliernana niukum de, yoma makden Edom miy,
miy mieh'a neka mhi'a yatyatni-halalli la inmi-narmi ammi-hyalmi Yakopa duratni-waitni re.
La' hade pede hota Agolin doin miy pia arwalmi re rhi' miy pia mlier la yatyatni-halalli yatlorni-yatra'ani
me hota rira rapolu-raliella miy nanmi pa nodi liarni.
11 Yoma la' ler ululu maka Yakopa duratni-waitni arwalli re rotli waye'era Yerusalem puohra lawanni
me ralernu let de la' yawa de mimtiutrier tio'ola olietleta.
La' lera arwalli re rtitni-rran momuouga Yerusalem re'eni-tniarnu honona me re'era-rhakra la' ira,
de miy edon mtiulan la' inmi-narmi makden Yerusalem re mere mmiomiol tio'omi la' genmi!
emkade pede miora inmi-narmi arwalli mimneneha pa mhi'a yatyata-halala la makden Yerusalem.
12 La' ler ulul pua inmi-narmi Yakopa duratni-waitni makden Yehuda (Israel) re rler la wnieyata-wnianiawua de miy ralammi nahepur nohora.
Mere pa'etnu de mtiulan la ira.
La'pa rler la sniusa ralamni de plollolli de yana miltier liawanni.
Mere musti mtiulan la ira.
13 Hya' mak ha mhi'a oleka de edon naplola
yoma la' ler maka A rimormio'ru arwalli re ral ir letni la' yawa de mmiai lia letni ralamni pa
mriarin nohora ir arwalli yoma A rimormio'ru re rler olek la kropna-krieutu.
La' lera maka rler la wnieyata-wnianiawua de mihe'i-mimalia re
na'nama mrie'ela pa mrieyahru re'eni-tniarnu!
14 Rerieh niana mtiutrier lia'a talla nhiakarni pa mtiawa inmi-narmi re maka kawlar lia ir arwalli nhiokarni.
Edon naplola pa mtiemna ir la'a ir arwalli limni ralamni.”
Orgahi-Orha'a Nhudi-Npara lodna-hairi honona
15 “Edom miy re! Hota mimliernan memna hihi'imi-yapyapmi re wniahlani.
Plol toto' pa hota Agukmua miy emkade!
Mitlin o! Plola pa A le'ru nrehgor wua, maka Orgahi-Orha'a A'g ed maka ghudi-kpuara lodna-hairi honona mai nohkeran di.
16 La'pa A riormio'ru miy makden la leta Yerusalem la'a A wo'oru hananni mak kmou-kwitan de,
arwalmi re rutni-rdahla rwatei-rwahapr oleka miy pa emeknekama rhi' miy pia miemnu kenkiemnu.
Hota emkade walia lodna-hairi makdella noha wawannu honona re rlernan wniahlani.
me rlernana niukum maka mermuernu-kapkapalli pa
rmati-rmol mommuou.”
Hota makden Israel re rler la yamori-yalewna
17 “Mere la' wo'or Sion de Orgahi-Orha'a rimormiorni re rler la yamori-yalewna,
ne wo'or de hota Orgahi-Orha'a Nhi'a totpa nmou-nwitna,
pa hota Yakopa duratni-waitni rden nek la nohoni-raini maka Orgahi-Orha'a Nala la' ira pa nodi liarni.
18 A rimormio'ru Yakop nora Yusupa duratni-waitni re hota emeknekama ai mak ka'an doinia Esau duratni-waitni,
pa emeknekama ai mak ka'an doinia wewan kerna la'a nhyi'a ralma.
Pede la'a Esau duratni-waitni, riy id mana edonna nlewna.
A' di de Orgahi-Orha'a A'g inhatti. A li'ru hadi!
19 Pede A rimormio'ru makden Israel re rwarui nian owa’ana Israel upni-tgarni nohananni-taniaratni
maka Orgahi-Orha’a Nal olek la ira.
De de makden Israel maka nohananni-taniaratni etla walli tranna re
hota er mak ra' nana upni-tgarni nohananni-taniaratni la wo'ora hananni maka arwalli, makden Edom re, e rhollia.
Me makden Israel mak nohananni-taniaratni etla walli warta
hota er mak kalernu arwalli riy Filistin re la' yawa pa ra’ nan owa’ana noha-rai maka ha rhollia de.
Ne makden Israel hota ra' nan owa'an la Efraim me Samaria lowanni-ahlani.
La'pa makden Israel la'a Benyamin duratni-waitni re
hota er mak ra' nana Gilead la'a wali tipru, de la’a nohananni-taniaratni
miaka Orgahi-Orha'a Nala la' Israel pa nodi liarni.
20 La'pa makden Israel mak kwatiawua nhioplial genni pa rawali owa'ana de
hota ra' nana Fenisia la eni wawannu pa la'pa ntutlia la'a Sarfat la' walli ra'i totpa rhollia' hande.
Makden Yerusalem mak ha rhopliala la'a Sardis de
hota rawal pia ra' nana leta-let makdella Yehuda walli tranna totpa rholi-rlet la hande.
21 La' wo'ora Sion de, makden Yerusalem mak karuri-kalai
hota rwalerna makden Edom wo'orni pa ralernia la' yawa.a
Ne A'u Orgahi-Orha'a hota Aghi' ray pia Agodi plolli la wo'or Sion de.”