Itmatromlawanni Makdenrer die Ntulla-nsaynia mak kla' ta'eni-mai ta'eni a'u
113
Mmiai pia ta'uli-tawedi Itmatromlawanni Makdenreri!
Haleluya!
La' hononmi makla' Itmatromlawanni rimormiorni mak khu'ru-khelam la E'a
de mmiai pia ta'uli-tawedia Itmatromlawanni kotni-nanni.
2 Nanni de hota nawnianin nekpa
tuwu nherun tuwu pa nodi liarni.
3 La'pa nden la lera nhia'genni pa la'pa lera ha ntuin la,
de Itmatromlawanni Makdenrer die nanni de riy rapolu-rahaun nohora yapilli-yahnarni ya'ulli-yawedni.
4 E' ed maka kodi plolli la'a lodna-hairi luwu-a'na nora mniotni mai nohkerna-rai miaran di wawannu.
Me la'pa E nanni mana ndait la lyanit tulu me nho'ola rai miarna wikni.
5-6 La'a wniarormi de,
hota he' ed maka kor Itmatromlawanni ramneh wutu o?
Uplerlawna-Mempulwatnu liwangenni-mtatangenni de nawniau lia lyanti tutulu,
me lia'arni rora rawniatat lia'a nohmaran maka it tden la di.
La'pa Niwra Namkeka lyanti nora nohmaran di,
de Natot la yawa.
7 Pa la'pa riy mak kakleha re de Enrana
pa nkakan doinia koda-awu la inonni.
8 Pa Nala re pa ror wutga E rimormiorni mak ktorna-krautu me marna wuhura orkota-ornana
ramtatan wutga la E mutnu-rahanu gaini ralamni.
9 Me la'pa pat maka kakleha a'na mana Nhi'a pa ra'a'na.
Pede ralamni re rahepuepur reri.
Mmiai pia ta'uli-tawedi Itmatromlawanni Makdenrer die!