Riy kalwieda rler la pripanni-fa'anni
112
Mmiai pia ta'uli-tawedi Itmatromlawanni Makdenrer die!
Haleluya!
Ya'unut lawna edonna nwalar la'a riy maka katu ka'unni-kamta'at pa klernohor reria Itmatromlawanni lirni-tunnu.
2 Hota upni-a'nani rodi plolli la'a noha-rai maka ha rholi-rlet la re.
Riy mak kden la plol wawannu duratni-waitni re hota rlernana kalwiedwedni la'a Itmatromlawanni.
3 Hota romni mniotni rler la re'a-tniaru.
Nhiolli-lietni mana ndella plol wawannu pa nodi liarni.
4 Hihi'ini-yapyapni mak kaploi-kaple'era re de emeknekama hya' ed maka khi'a repreparni la melmelli-kalkalamni ralamni
la'a riy honona mak ktulla-ksaynia e rimormior wialli me mak kwehwa-klakat la ploini-ple'erni.
5 Ya'unut lawna la'a riy maka ralamni kalwieda,
maka kalla riy ra'otna,
me na'olu-nala'a la rira de ihranu ralamni naploi-naple'era.
6 La'a riy mak klernohora Itmatromlawanni deullu-tatarni lirni-tunnu
de yala'ani edonna ndunti ne riy rhoratreria e' pa nodi liarni.
7 Edonna namta'ata lir mak kmai die hota nodia susa.
Ihranu ralamni edonna nwo'la,
yoma pesiayni narur lia Itmatromlawanni Makdenrer die.
8 Nhi'inde ihranu ralamni edonna nmakokan nohora yamta'ata.
Hota e' arwalli rla' yawa.
9 Nhi'inde nwahakra hyonni-hyanni la'a riy mak kakleha-kaplara.
Nhiolli kalwieda la'a he'a-he' to'a.
Pede hota e nodi plolli me riy rhormata-rkanala de.
10 La'pa riy yatyata ramkeka de hankerna nden rer lia riy yatyata re ihranu ralamni,
ne rut gakarni la de gaini rpetan wenna.
Mere hota rler la yatyatni-halalli yatlorni-yatra'ani.
Ne hya' maka ir rwahaka re de rwalia la hamamuamua.