Nhiar maka rwahniar la Paska lerni totpa rhoratrereria la' ler maka rlergot la Mesir
114
La'awa la lerni la Yakopa duratni-waitni maka ha rweta la riy Israel re rlergot la Mesir,
noh maka ha rado'ona-radakan la de,
2 de Uplerlawna Enwalir niana Yehuda pa nwalia gen maka Ha Ndella.
De Nwalir nian Israel totpena Nhi'a ray lia hande.
3 La' ler ululu de,
Orgahi-Orha'a Nmai lia Laut Gelagah dewade nleretniekla gerni-tah'ni nkerna-nhau.
Ne la'a gerlawna Yordan mana emkade wali.
4 Ne wo'or tutulu re ho' de neniehu-tertera emeknekama pipi,
ne la' wo'ora re wal miana pepe'tu-dadiaya pa emolmolla duma.
5 Lor ho' de hya'a nrei piede nleretniekla mkierna-mhiau?
Ne gerlawna Yordan nihya'pa o' edonna mpuawu?
6 La'a hya'a pede wo'or lalawna neniehu-tertermi
me wo'or-kawru miy ho' de pepe'tu-dadiaimi la genmi?
7 Nohkerna-rai miarnu ne!
O' mana mdiwra-mdia'al la Orgahi-Orha'a,
Yakopa Uplerlawanni de gaini ralamni.
8 E' ed maka kherun doinia wa'ura-wat muetma pa nla'a gera tliwu
me wo'or kerna nwal tiargho'ola ger ormata.