Ralma ndenrer lia Uplerlawna
63
Daud nhiar ya'ulli-yawedni maka enakot nohora la' lera e ndella wo'ora-kawru Yehuda:
2 Uplerlawnu ne!
A Matromlawnu toto' O'a.
A'g e muat lia O yahakmu,
de emeknekama tani miaka kpok lihira-kpoknai yoma lerwarnu plahwa,
pa emkade wal lia a tie'ru kerna la O'a.
3 Awuak toto' meman pa it twatrom la O roma kreimu
pa umkeka O rurmu-laimu mak kamehi-kayona.
4 O sniayanmu e nareh wiallia a mormio'ru.
La' hade pede u'uli-uwed rer O'a.
5 La' a mormio'ru plahwani di de a'u'uli-uwed reri O'a,
me ariana a li'mu pa asiumbain la O'a.
6 U'uli-uwedi O' de,
awuahniar pa uhepur nohor O'a.
Yoma a hlie'wu nteptepar meman la O'a de emeknekama a'g e 'una yamanan maka kmikmikri.
7-8 La'pa alie'er a lia' a le'wu wawannu de a ralmu nodi rer lia O'a.
La' mela plahwani,
de awuarora-wualai nieka O tniulla-sniayanmu mai a'u.
De Omriuwun reria-mu'ahla reria a lia O liwarmu nayanni
pede awuatunu-wuahniar de godia a su'ku pa uhepur nohora.
9 Atiorna O' de atiorna pit muemna.
O limmu mak karuri ed maka kol reri a'u.
10 Mere la'pa riy mak kiwra kwenn a'u re,
de honona hota rerun pa rawniakdehla la'a noh mati-rai miolu.
11 Hota rmat lia' ar ralma,
pede ohpora-ahdiawra rlihira-rnaiya re pa rakihia rurni-kliakallu re.
12 Hota ray nahepuepru yoma ha namkek memna Uplerlawna tniulanni.
Yoma riy mak klokar la ha plollola pa nwet la Uplerlawna nanni de hota ralamni nahepur pa na'uli-nawedi E'a.
Mere la'a riy mak kalahara de,
niwra nhar lirni mere namni npetan tar lia ge'eni ralamni pa ta'enniana naltieri.