Rsumbain pa rwaka Uplerlawna pa Nakruwun reria re
64
Daud nhiar ya'ulli-yawedni maka ha rala la mak khi' o'ta la mak kwatunu-kwahniara:
2 Uplerlawnu ne!
Awuakwak pa matmu reprepar la tulu-lyanti,
me tlinmu mana Mhuer tiarga la a polpuo'lu.
La'pa a su'su di de yan Muolin limmu mai a'u Matrome!
Mulewna a lia' a' arwa'lu ri,
yoma umkeka de umta'ata.
3 Mua Mukruwun reria a lia'a riy yatyata re totpena yana ramkek nan a'u.
Yan Muolin limmu me,
Mpue'er rormu la a'u yoma riy harahu re e rna'ohma pa rhi' yatyatni mai a'u.
4-5 Nurnu re emolmolan nekama tera-ra'pa wehla-ta'wa
yoma nhi'inde rapupu-raheria,
ralernu-raha'ana,
rlokra-rhautia rira rnairia lira ohpa-lahara,
klili-kdiori.
Rhi' emkade de hota emeknekama riy maka rwuw rer lia talan letgara pa plin-plinnianama rlewria rira.
Ir edon ramta'ata mere rapupu-raheria,
ralernu-raha'ana riy mak kakleha do'a-hala.
6 Rhapar rer lia la'a ira nnia'ohmani
pa rwahaur nohora hota emkameni la ir re'era tniokla la' meni-meni to'a totpena yana riy ramkek nana,
de ratniekame riy raplinga ira wniarorni re honona.
7 Rna'ohma yatyatni pa riwra:
“Hya' maka twarora-twalaiya de rwahi' targa oleka pa mai pia itsi'a.”
Rimormiori ihranu-ralamni de kdielma pa hota la riy id mana edonna nwuwul nana.a
8 Mere hota Uplerlawna ed maka kwahedga ra'pani pa Nra'pa re,
pa plinu-plinnianama rlernana no'a-rara.
9 Hota rler la yatyatni-halalli yatlorni-yatra'ani yoma rwetur nan owa'ana ir lir wamueheni.
Rira honona ramkeka de rdikdik o'tani.
10 Dewade riy honona rleretniekla ramta'ata,
yoma rwaror nohora hya' maka Uplerlawna Nhi' nana-nyap niana.
La'pa rakot nohora Uplerlawna hihi'ini-yapyapni re.
11 Dewade riy mak kden la plol wawannu honona ralamni rahepur wenna
la'a hya' maka Itmatromlawanni Makden rer E'a ha Nhi' nana-nyap niana.
Hota ir honona rmai pia Nruwun reri ira.
La' meni maka ihranu ralamni raplele'era de hota ra'uli-rawed reri E'a.