Ralamni namtiertiernu yoma rha'ar mormiorni la' Uplerlawna
62
Daud nhiar ya'ulli-yawedni maka ha rala la mak khi' o'ta la mak kwatunu-kwahniara.
Rwahniar de rtotnohora Yedutun:
2 Eneknek to'ama agha'ar mormio'ru la Uplerlawna nampena a ralmu namtiertiernu.
La' E' nanpena aliernana yamori-yalewna.
3 Eneknekto' E' de emeknekama wo'or wat muaka nhi'inde a'uyaheu lia,
me wo'or watu niutni mak ka'ara yaro'wa genni (benteng) mak nhi'inde a'uyade'ela.
E' nanpena ed mak kodia mormiori-lewlewna mai a'u.
E' ed mak kodnian a'u pede takenia riy rawo'la a'u.
4 A' di de emeknekama likti mak kiwra klitri,
me lutur lawna wniedni mak kiwra katpuora.
Lera-lera nekpa miy hononmi mpialerna a'u yoma miwra mial a lia yawa.
Hota emkade lera wo'ir owa'ana?
5 Eneknek to'ama la'a wniarormi de mhi' emkade
totpena yana ratota-rawaw owa'an a'u.
Miy mniairia putra-palka
pa mpiaka Uplerlawna totpa Nara'a-napalg a'u.
Mere la' miy ralammi re de miy e mliokar-mhiautu nek a wua.
6 Eneknek to'ama agha'ar mormio'ru la Uplerlawna nampena a ralmu namtiertiernu.
La' E' nanpena agha'ar a arnu la.
7 Eneknekto' E' de emeknekama wo'or wat muaka nhi'inde a'uyaheu lia,
me wo'or watu niutni mak ka'ara yaro'wa genni (benteng) mak nhi'inde a'uyade'ela.
Uplerlawna de nanpena ed mak kodia mormiori-lewlewna mai a'u,
mak kodnian a'u pede takenia riy rawo'la a'u.
8 E' de ed mak kal a pua liernana mori-lewna
me totpena riy rhormata-rkanal a'u.
E' de emeknekama wo'or wat muaka nhi'inde a'uyaheu lia,
mak kruwun reri-ka'ahla reri a'u.
9 Luwpuali-a'na walmi re!
Mhia'ara mormiormi-dardiarmi rella'a Uplerlawna la' lelera-melmela.
La' hya' to' pa mrian ralammi la' Uplerlawna pa msiumbaini nohora re.
Yoma hota E' nanpena ed maka kruwun reri-ka'ahla rer ita.
10 Riy lalawna,
riy kuku'a,
de rakleha weli.
La'pa rawerta la' tatiaili lahannu de edonna la' nana hadomdoma.
Hya' mak kapranrana meman ho'mana weratni narehi rimormior ita.
11 Yana it tella it aparnu la'a hya' maka tawo'ora-talkgaul nana,
ne yana twarehi niohora yohya' maka ha twarui-twate'la nana.
Ittarg ho'mana,
yana it nhioratni ndawar rer lia re.
12 La' re'eni wo'ir olek pa utlin nana Uplerlawna Niwra
la'a tniorna-riautu plola-mneha de rwatiaga E'a.
13 Ne Endenrer lia tniulanni-sniayanni pa nodi liarni.
La' O'a Matroma,
de Mpuahla rima-rima nhiolli-lietni maka ha rhi' nana.