Rsumbain pa rwaka tniulan la Uplerlawna
61
Daud nhiarni maka ha rala la mak khi'a o'ta la mak kwatunu-kwahniara.
Rwahniar de rnairia hitara-fiola:
2 Uplerlawnu ne!
Mutlin reri a polpuo'lu-wakwa'ku la O'a.
Mutail reria a sniumbainu.
3 La'pa oliet a lia a noha-ra'yu de apuolu-wuak la O'a,
yoma aruple'a nal a'u.
Muodi a lia ili-watu mak ktutulu totpena kruwun reri a'u.
4 Yoma O' ed mak kruwun reri-khepun reri a' pua
arwa'lu re ta'enniana rawo'la a'u.
5 Muodi a' pua dien rer niek la'a O roma kreimu
totpa Mriuwun reri-mu'ahla reri a lia O liwarmu nayanni.
6 Yoma orgahamu Mutlin oleka la'a hya' maka a'g e niel tiarga Matroma!
Me Mual a' pua aliernan walia la' hya' mak Omhi'targa la riy mak ka'unni-kamta'at O'a.
7 Ampakwak tiy O'a totpena ray nholi aplahwa la nohkeran di wawannu
totpena nodia tuwu la' tuwu.
8 Ampak pa e nodi plolli pa nodi liarni emeka ray miaka ha Mpualir niana Matroma.
Mriuwun reria de Muala sniayanmu me Mdien rer lia onni.
9 Ne hota la a' die de gala nhiara ya'uli-yawedi pa wuatunu-wuahniara la O'a.
Totpena la' lera-ler nekpa hota agala tiy O'a hare honona maka ukottar oleka re.