Rimormiori yatni-halli
53
Daud kieheni-nhiarni mak ha rala la mak khi' o'tani la mak kwatunu-kwahniara.
Nhiar di rtotnohora nhiara Mahalat.
Daud sniumbaini walia hadi:
2 Hota riy mak kpodku-kpadku wniarorni de:
“Uplerlawna edonna Ndel la'a lyanti.”
Riy mak kakot emkade nhiolli-lietni yotyota-yatyata
pa edonna rwo'la-rlekur la kalwiedni ralamni.
3 Uplerlawna Ndella Ilyamou-Watyatoha
pa Nlina-nmat reria rimormior mak kdella nohkeran di wawannu,
totpena Namkek teka hota he' ed mak kna'erit nana E talanni
yoma niwra nat niohor pa nhu'ru-nhelam la E'a.
4 Mere riy honona rawlari olek pa rhoitio'or la talan mak kaplola,
ne rima-rima rhi' yatyatni-halalli.
Plol toto'a pa riy id mana edonna nhi'a-nyap miemna plola-mneha.
5 Pede Uplerlawna Niwra:
“Eh!
Riy id mana wniarorni edonna nla' temni.
Mormiorni de rhi' matmera-wulkgaulu la'a rimormio'ru,
pa rwarui-rwate'la ira hyonni-hyanni.
Ne la riy id mana edonna nhoratnana A' pua edonna nkola tieru-nawur nehla mai A'u.”
6 Hota riy mak kyata-khala re de ramta'at nande rmakuk tiarga la genni.
La' ir mormiorni ralamni tetema de edon rler la yamta'ata mak emkade.a
Yoma la' emkameni la Uplerlawna rimormiorni de arwalli rpepan targ ir la ar ralma,
de hota Uplerlawna Enkuru-nkarga arwalli re rurni-kliakallu.
Uplerlawna Nwanikli-nwayotlia arwalli re
nhi'nande E mutnu er mak katowra re.
7 Awuakwak pa Uplerlawna mak kdella Sion
de Namori-nalewna mak kden Israel,
totpena Yakopa duratni-waitni rler la yamuki-yahepur lawna.
Uplerlawna orgahani ed maka khernu-kwau doinia E rimormiorni mehrani-maunu,
pa rler la kalwiedni-paitiotni!