Riy mak khi' yatyatni-halalli la rimormior wialli hota rlernana Uplerlawna niukamnu
52
Hadi de Daud kieheni-nhiarni maka ha rala la mak khi' o'tani la mak kwatunu-kwahniara.
La' nhiar di Daud nsumbaini
2 pa nakot nohora riy id nanni Doeg,
makden Edom de,
nma nodia kot la Saul niwra Daud nte' olek la'a Abimelek romni nayanni wa:
3 Hoi,
riy metam keranni ee!
Hya'a nariei piede mpuo'on nohora yatmu-halmu maka mhi'a
la riy maka la' lera-ler nekpa Uplerlawna Ntulla-nsayn reri rena?
4 La'a mormiormu plahwani,
de mnia'ohma yatyatni-halalli.
Mpuahak neka pudi-akla klili-kdiori.
Nammu emeknekama ta'wa nierta mak ka'ana to'orni-gaini.
5 O sukmu matmiat lia yatyatni-halalli,
ne o ralammu edonna nod lia kalwiedwedni.
Sukmu toto'ola muodia nuru lalahara,
ne o nurmu edon netia nheik nana lira plollola kuku' et miemna.
6 La'a lira-tun muaka ha mukota re,
de kdiori-kdeh momuoga re.
Suksukmu de totpena mnia'ohma riy yatyatni-halalli yatlorni-yatra'ani.
7 Mere la o' di de hota Uplerlawna Nwau watia o du'urmu la' tani kierna wawannu.
Hota rtornu la'a o rommu nayanni,
pa rnunia o la'a matmiati ralamni.
8 Riy makden la plol wawannu la' Uplerlawna yamkekni hota rlin nana-rmat nana pa rheduma.
Ne hota ira kaniha-kamal lia pa riwra:
9 “Elekde!
Edon nhi' Uplerlawna la e kruwun genni,
mere eneknek to'ola nha'ara mormiorni la re'eni-tniar mutliawanni
me hihi'ini-yapyapni mak kweyata-kwaniawu e rimormior wialli.”
10 Mere la a' di de emeknekama kmir ona-wa'du ona (pohon saitun) mak kmota-kaul ma'ta,
pa adien rer lia'a Uplerlawna romni nayanni.
Apuesiaya,
de hota Uplerlawna ed mak ktulla-ksayn reri a'u pa nodi liarni.
11 Matroma!
A'u'uli-uwed reri O'a pa nodi liarni
onnila hare honona maka Omhi' nan oleka re.
Me la'a O rimormiormu rawoka-rale' tiarga la' hanmeni
de hota awuahaur nohora O kalwiedmu-paitiotmu de.