Rsumbain pa rwak Uplerlawna totpena Namou-nawitna do'oni-halli
51
Daud ya'ulli-yawedni maka ha rala la mak khi' o'tani la mak kwatunu-kwahniara.
2 Daud nwahniar nohora la' ler meni makwohorulu-ktatrulu Natan npolliohor e'a,
yoma nora Batsyeba raliai:
3 Uplerlawnu ne!
Mtiulla-msiayn a'g e!
Yoma O' de,
sniayni onni etla O'a.
Mtiulan la a' pua Mhuo'a-mhuai dioinia a do'u-ha'lu maka aghi'a-yap niana.
4 Mkuhi-mhuo'or doinia a do'u-ha'lu rella,
totpena amuou-witan la honona.
5 Yoma orgah'u gatga de alier olek la do'a-hala ralamni.
Do'a-ha'lu re,
de aghoratreria re.
6 Matromlawnu ne!
Omueh'a ed maka aghi'a do'a-hal la!
Ne aghi'a-yapia hya' mak edonna kla'nana O ralammu.
La' hade pede la'pa Mukmua a' die hya'a maka Omukota de nden rer lia plol wawna.
Ne hota Omuplola la'a nhiudi-pniara.
7 Plola la a ya'tu-ha'lu,
de agodia la' lera a i'nu ntor doini a lia noha wawannu,
ne aliernana memna do'a-hala la i'nu apannu ralamni.a
8 Mere maka ha Mpuahaka de ralma ploi-ple'era.
Matroma!
Muala kirkira-ralma riormu samomuounu ma mdieh'a nana a ihru-ralmu.
9 Mumou-muwitn a'u,
totpena amuou-witna.
Amuou-witan pa emeknekama mou-witan mak wahrani rehia ahwa wawahra.
10 Mual a' pua lier la muki-hepru
totpena a ralmu maka Omhi' pa nmawaldoin la de nawali owa'an la muki-hepru.
11 Matroma,
Mhuap dioinia do'a-ha'lu re honona
me Mhuoratdoinia la!
12 Orgahamu Mual a' pua a ralma-rio'ru rden la ploini-ple'erni,
Matroma.
Mual a' pua liernana ralma-rior warwuaru totpena agala a ru'ru-la'yu ih'ru-ralmu honona pa aliernohor reri O'a.
13 Yana Mhuoitio'or la mai a'u Matroma!
Ne yana orgahamu Mmua' owa'an la nhiwmu-nhionmu mak kmou-kwitan della mai a'u.
14 Mhi' a' pua lier owa'an la muki-hepru yoma Omumori-mulewn a'u,
ne Mhi' a pua awualeran meman pa aliernoho'ru,
15 totpena a' muana wuatut walia O yala'amu la'a riy mak kden la do'a-hala ralamni,
totpena ir mana rawali owa'an la O'a.
16 Uplerlawnu ne,
Mulewna a lia'a matmiati ralamni,
yoma O' nanpena ed maka kamori-kalewna rimormiori,
ne hota awuahniar pia wuahaur nohor O hihi'imu-yapyapmu re,
agodia ralma hepuepru.
17 Matroma,
Mtiulan mai a'u
totpena ultier die u'uli-uwed reri O'a.
18 O' edonna Mrieiniana-mua'nana hoihoi-tantiani
maka ha rtunu-rharna la'pa hoihoi-tantiani korni re.
Yoma la'pa Omrieiniana re de hota agala tiy O'a.
19 Mere hoihoi-tantiani maka Omrieiniana de,
de riy mak ihranu ralamni nmawaldoin la onnila e do'oni-halli,
ne nwaldioinia pa natu nhu'ru-nhelam la O lirmu-tunmu.
20 Matromlawnu ne!
Orgahamu Mtiutga kalwiedmu la' Sion,
de Yerusalem letni de,
pa Murir owa'ana ili-watmu la' hande.
21 Totpena orgahamu Mrieiniana-mua'nan owa'ana hoihoi-tantiani mak kaplola,
mak kla' nana O ralammu.
De hoihoi-tantiani mak ha rtunu-rnahua,
emeka nhiuri-wnia'ana sapi muanu mak ha riwra rtunu-rharna la katri'ana wawannu.