Uplerlawna Enmeh'a ed mak kodi plolli
47
Hadi de Korah duratni-waitni nhiar ya'ulli-yawedni mak ha rala la mak khi' o'ta la mak kwatunu-kwahniara:
2 La' rimormiori honona mak kden la lodna-hairi re,
hononmi mriarni-mriarin pa mpiok limmi.
Ne mi'uli-miwedia Uplerlawna de neniehu-tertermi.
3 Yoma Orgahi-Orha'a Makden la Tutullu-Lolo'oni de preheni-mkaini it edonna tpar nana.
E' ed mak kmeh'a kodi plolli la'a noheri woru-lyanti nayanni.
4 Enal it pa ta'unut nan momuoga ray-ray honona ror wutga limni-rorni re
mak kden ulga la noha Israel di.
5 Enala tan lia noha-rai mak ha Nwalir niana di
la' it maka Ensaynia de.
Yakop duratni-waitni ita tahepur nohor memna tan di.
6 Uplerlawna orgahani Nla' oleka genni-tienni la'a liwangenni-mtatangenni
de rala tiwla-prai,
he'i-hepru,
me noknoka nora sraki yetni waran lola etnu-liolli pa ra rawliohora Itmatromlawanni.
7 Mpiatunu-mpiahniara nhiara ya'uli-yawedi la'a Uplerlawna.
Mpiahniara nhiara ya'uli-yawedi la it Rayni.
8 Yoma Uplerlawna E' ed mak kla' Ray pia ktorna-kraut la'a noheri woru-lyanti nayan di.
Ta'uli-tawedia de tala wniatunu-wniahniara mak it taloiya de yatlinni samoga.a
9 Uplerlawna Naliwna la mtatangen miaka kmou-kwitna.
Yoma Enkukmu-nto'ma noheri woru-lyanti nayanni.
10 Mak khi' o'ta-mat la lodna-hairi re honona rmai tiemna
la Abrahama di'nani-lohorni mak kola tieru-kawur nehla la Uplerlawna.
Yoma Uplerlawna ed mak ha rweta la Ray,
la'a ray-ray honona matromlawanni.
Yoma E' ed mak kden la'a hititni-lomlomarni mak wamueh geni.