Sion de Uplerlawna letni inhatte
48
Hadi de Korah duratni-waitni nhiar ya'ulli-yawedni:
2 Plola!
Orgahi-Orha'a de ha Nmeh'a taru!
Nden la ya'uli-yawedi ononni.
Mmiai pia ta'uli-tawedi it Uplerlawanni la'a E letni mak kden la wo'or mak kmou-kwitna.
3 Uplerlawna letni Sion de samoga
me nawniatat lia wo'ora hananni la walli ra'i.
Uplerlawna Nla' Ray makodi plolli la haneknek wawannu,
ne riy mak kdella nohkerna-rai miaran di,
honona re ralamni rahepru onnila ra'ani-pallu mak kwatiawua E letni de.
4 Uplerlawna Nmeh'a neka Ndella let de ralamni
pede orgahani Nwal lia kruwun geni la' riy honona makden la' let de.
5 Tamkek to'ola pena ray-ray re honona
rawok pa rma riwra rka'ma temna.
6 Mere rkillia wo'or de takenia rpar nana.
Dewade kniokan wa,
noma rawlari die idma lierni.
7 Honona re rdiwra-rda'al nande ge'eni rutu,
ne hikiknu ramilu-torni ra'ahg'o'ta.
Honona re rpolpuolu-rwakwak nohora on mehra-apun mehra pa emeknekama pat mak kiwra kayori.
8 Honona re klololi-klalalia pa emolmolla puou-kapli lalawna mak kpah'a nana re,
onnila anin lawna.
9 Tatlin oleka ha rwahaur nohora la'a ulul genni,
mere dodo'ondi de tala it matni tamkek memna
hya' ed maka Orgahi-Orha'a Makodi Plolli la Haneknek Wawannua de,
Nhi' nana la' E letni.
E' de it Uplerlawanni E'a ne hota orgahani Natiak rer nieka E letni pa nodi liarni.
10 La'a O rommu nayanni de amparor neka
Matro'mu O tniulanmu-sniayanmu yoma Omsiayn rer niek ami.
11 Lol meni-meni to' de O nanmu nawnioh'a-nawnianni ne ra'uli-rawedi
la mai noheri woru-lyanti nayanni.
Omniairia plola-mneha pa ma Mtiorna-mriautu.
12 Lima-rora Sion nora Yehuda neniehu-tertera la yamuki-yahepru,
yoma O' ed mak knairia rhi'ina leltiutu-relan mahmera pa ma Mhudi-mpuara riy (Mhudi-mpuara la plol wawna).
13 Mila' pa mpiakdioria Sion letni,
me mriekna rom tutulu re honona.
14 Mimkek teka kruwun geni harahu
me watu liari-au pidarni re yarurni-yalaini
totpena orgahami mmieh'a mpiahaur nohora la' miy duratmi-waitmi:
15 “Orgahi-Orha'a Uplerlawna-Mempulwatnu yarurni-yalaini nayamkek memna la' E' letni de,b
ne E' ed mak kla' it Uplerlawanni.
Hota Nalakr ita pa nodi liarni la'pa nhorwua.”