Uplerlawna Ntulan mai ita
46
Hadi de tunu-nhiar maka Korah duratni-waitni rala ra rwatutu-rwaye'a.
Hota rala la mak khi' o'tani la mak kwatunu-kwahniara.
Rwahniar de rtotnohora Amalot:
2 Uplerlawna ed mak khi'a kruwun lawan mai ita.
Enaruri-nalai nian ita.
E' ed mak ktulla-ksayn rer it la'a kropna-krieutu ralamni.
3 La' hade pede hota it edon tamta'ata la'pa noha nruru-rai nwo'la
pa nhi'nande wo'or tutulu ema rkowra-rwalia la yoir hletan lawna ralamni.
4 Tah'i nayo'ora nha'at pa nma nhaplia wo'ora pa
nhi'nande wo'ora-kawru wolwo'la-wawainia ho'mana yan tamta'ata.
5 Hota la' ger wawuau lihir ed maka kahepur nana riy mak kden la Uplerlawna letni.
Ger de nwawuau lia gen miaka Uplerlawna Nholi-nlet la.
E' de Uplerlawna-Mempulwatnu Makdella Tutullu-Lolo'oni.
6 La' hande ed maka Uplerlawna Ha Nhollia,
pede let de hota arwalli edonna rweyata-rwaniawua.
Uplerlawna ed maka ktulan la let de la'pa lera matni npah'a la tipur matni.
7 La' lodna-hairi nor wutga luwnu-a'nani re kokokna-rariarin nohora polpuollu-wakwakni.
Lodna-hairi re honona pala tuinia ne kwerwera-kwawah niohora rurni-laini la'pa preheni-mkaini.
Uplerlawna Nhar lirni emeknekama kukru-gauru dewade nohkerna-rai miaran di nmadgera mkokoha.
8 Yoma Orgahi-Orha'a ed Makodi Plolli la Haneknek Wawannu.a
E' de Itmatromlawanni Makdenrer die,
pede Nlin reri-nmat reri ita.
E' de Yakopa Uplerlawanni inhatte pa Nruwun rer ita.
9 Mmiai pia tamkek memna hya' ed maka Orgahi-Orha'a Nkar niana!
Tamkek la me!
E Nhi'a-nyapia hihi'a-yapyap miak kamehi-kayona la nohkerna-rai miaran di wawannu!
10 De Orgahi-Orha'a Nhi'a rimormiori honona totpa yana ra'ar owa'an wa.
Tamkek to'ola!
Enmeh'a neka Nweyata-nwaniawua tera-ra'pa wehla-ta'wa
me nawoka keliau-halwa'ana (perisai) pa Nnaklia la ai ralamni.
11 Uplerlawna Niwra:
“Hadewa la ya'ara!
Totpa miatga!
A' di de Uplerlawna A'u.
A'ukleha nhiaparwutu.
A'g ed makodi plolli la rimormiori nohkeran-rai miaran di pa hota ra'uli-rawedi rlilili-rmamuau A lia tutullu-lolo'oni.”
12 Orgahi-Orha'a ed Makodi Plolli la Haneknek Wawannub.
E' de Itmatromlawanni Makdenrer die,
pede Nlin reri-nmat reri ita.
E' de Yakopa Uplerlawanni inhatte pa Nruwun rer ita.