Nhiar maka ha rwahniara la ray mehlimni
45
Hadi de tunu-nhiar maka Korah duratni-waitni rala ra rwatutu-rwaye'a.
Hota rala la mak khi' o'tani la mak kwatunu-kwahniara totpa rwahniara de rtot nohora nhiara maka ha rweta la Bunga Bakung.
Rwahniar de,
de rakot nohora muanke' ida ralamni nal nana patke'eni:
2 Agiwra wuahniar nhiar samomomuou id pa ray natlin nana.
A ih'ru ralamni npenpuen niohora lira-tunu mak kla' nana rira ihranu ralamni.
Ne la'pa awuahniara nhiar samomuounu de a' die emeknekama mak katu ktulsi (mak khi'a) poisi ida.
3 La' o' de muanu mak inonni namanmuanu me gaini samomuou rehia.
Omultier de ltiermu nkerna la plollol wawannu.
Yoma Uplerlawna Ntera-ndem rereri o'a.
4 Dodo'ondi de mua'ala wehla plalahwamu totpena mudehla reria.
O' di de ray maktorna-krautu me prehemu-mkaimu de riy honona ramkek nana.
5 Emkade pede mlier pa mlia' a totpena o' ed maka ka'unut nan memna,
yoma rurmu-laimu reh niana.
Muala riy yatyata-halala re la' yawa yoma omtiorna-mriautu de nodi plola-mneha,
me rhi'ina-rella (hya' mak kaplola) nden rer lia o ralammu,
6 Ra'pamu ihini natuinia arwalmu waholanni
pa mhuelkiai-mhuakpera hairi-hairi re la ar ralma.
7 Uplerlawnu ne,
lodanmu-hairmu nawniau kdededa pa nodi liarni.
Omtiorna-mriautu de nodi plola-mneha.a
8 Rhi'ina-rella (hya' mak kaplola) nden rer lia o ralammu,
ne edonna mpuehwa tar lia yatyatni-halalli.
La' hade pede Orgahi-Orha'a o Uplerlawanmu,
Nwaliri o'a pa omdiella tutullu-lolo'oni totpa rira ratota-rawaw o'a,
rahepru-rayak niohora o'a.
Genmu-tienmu de nareh dioinia mutwualmu re.
9 La'a naniayarmu re rahuwu-ragania wu'ru me ortawi-autiawi maka huwnu mikmikri,
ne riy rahe'ya hitara-fiola,
tiwla-prai lia'a ray nhiol gen miaka liplipa-kamka'ma nohora leli (gading),
nhi'nande o lelewru-tartiarnu.
10 La'a ray genni-tienni de pat hararar harahu erla,
ne ray upni-a'nani hararara re rden wal lia.
La'a liwangeni walli malganan de ray patke'eni ntutrier die liplipa-kamka'ma nohora mah molanni.
11 Pa'tu nee!
Mutlin reria a li'ru ri.
Yana mhuoratreria marna-wuhurmu,
nor wutga nohwalmu
me inmu-elmu ammu-narmu.
12 O samoumu nla' nana ray ralamni,
o matrommu hade!
Pa mhu'ru-mhuelam la nayanni.
13 Mak kden la Tirus rodia limtutnu-lakga'ani pa rma rhu'ru-rhelam la o'a.
Mak kre'a-ktaru rahak talan pa ra'ala o ralammu.
14 Ray a'na patni mak kiwra kor ray rmehlima de nler la rialam de
nlipa-nka'ma nohora komle'etni,
de ral'arnana la maha liplipa-kamka'ma.
15 Naniayarni namrehi-namda'ar nohora horni
pa rlidan nohora e' la' ray lo'mani ralamni.
Rala hararar walli re pa rlidan nohora e'a.
16 Honona re riarni-riarin pa neniehu-tertera,
yoma rodia la ray nhiol genni.
17 O'a raiya!
Hota omliernana a'na rahu
totpena rhernu-rwau pua ramtatan la upmu-tgarmu genni-tienni.
Hota honona re rodi plolli la noheri woru-lyanti nayanni.
18 Agala nhiar di pa gala u'uli-uwe'du la tuwu pa la' tuwu,
ne hota makden la lodna-hairi ra'uli-rawed rer o' pa nodi liarni.