Ra'uli-rawedi Itmatromlawanni Makdenrer die, me rpolu-rwak la E'a
40
Hadi de Daud nhiar ya'ulli-yawedni mak ha rala la mak khi' o'tani la mak kwatunu-kwahniara:
2 Awei-niara Itmatromlawanni Makdenrer die,
himni-re'eni mai a' die a'g edonna muahruru.
Dewade E Nlin reri-nmat reri a wua,
noma Nwahla a li'ru.
3 Nhed a lia'a hu'ul lawna ralamni makod a lia matmiati-molmuolu,
de hu'ul mak katro'a-kakdielam la loka-da'la ralamni.
Na'al a' pua Ntitnia a lia'a wo'ora ili watu id wawannu.
Pede a'ula' de a'g edonna litri.
4 Ne Enwatutg a' pua awuahniara nhiar warwuaru ida.
La'a nhiar de,
nhiar ya'uli-yawedi la it Uplerlawanni.
Hota riy rahu rtutrier wial pia ramkek reri me ratlina
la emkameni la Uplerlawna Namori-nalewn a'u,
de honona re ra'unni-ramta'at
pa narieiniande honona re rpesiay wiali Itmatromlawanni.
5 La'pa riy mak kpesiaya Itmatromlawanni Makdenrer die,
de ra'unut matmiat miemna.
La'a hare honona re de,
riy mak edonna khu'ru-khelam la'a uplera-upmati,a
me la' walia la' riy mak edonna kwaka tniulan la riy po'ona.
6 Matroma Makdenreri O'a!
A Uplerlawnu O'a!
La'a O hihi'imu-yapyapmu mai am die lawan rehia!
Hadom edonna nheik nohora O'a!
La'a hya' mak ha Mpuarora-mpualai re,
nhi'nande riy rwer rer wiawni.
Hihi'imu-yapyapmu harahu rehia
pede la' hare honona re de ta'enniana rwahaur nan momuoga re.
7 O edonna Mpuak nana nhioi-tniani,
patuini-paro'onni maka ha rhoi-rtani.
Mere Omuala a tli'nu pa natlin oleka O lirmu.
O' edonna Mpuaka nhioi-tniani maka ha rtunu-rharna la katri'ana wawannu onde nhioi-tniani korni maka ha rala rwauga do'oni-halli.
8 Noma A'ukota:
“A'g inhatti Uplerlawnu ne!
Amuai die
totpena emeka rakot oleka la Puka mak kapniopan de ralamni mai a'u.b
9 A su'ku la liernohora hya' mak kla' nana O ralammu
yoma deulu-tatra re honona de rpenpuen lia a ralmu.”
10 La'pa O mutmu-rahamu e rawok tar lia,
de a'ukot nohora kot kalwieda-paitiota mak kakot nohora Omumori-mulewn oleka am pia.
Nhi'inde a'ukotkot reria hade Matroma.
O' e muat niohora hare honona.
11 Kot kalwieda-paitiot de,
de a'g edonna uwunmua la a ralmu.
Tniulla-sniayanmu makodi liarni de a'ukotkot reria
la'a O mutmu-rahamu yawokni-yale'enu gaini ralamni.
Plollola pa a'g edonna gherer niohora,
mere ukota-ulde'eta ralam kalwiedmu nora tniulla-sniayanmu re.
12 Matroma!
Yana Mupre'et la ra'amu-palmu mai a'u!
Hota ralam kalwiedmu nora tniulla-sniayanmu mak kodi liarni de ma mriuwun rer a'u,
Matrome!
13 Matroma!
A'g etla la'a kropna-krieutu letgara-mneneheni.
Liawanni yan takot memna.
A do'a-ha'lu emeknekama a' arwa'lu maka khokra-klai a'u,
pa nhi'nande ta'enniana umkek nana talla maka hota aliolola.
Do'a-ha'lu re de takeni trekan nana liawanni,
yoma la'pa it trekan nana de narehi memna it moratnu liawanni pa nhi'nande amadwier oleka wa.
14 Matroma!
Mumori-mulewn a'u!
Pleta-plet pa muai pia Mtiulan mai a'u.
15 Muolin doinia totpena riy meni mak kiwra kwarora-kwalaiya a matmia'tu,
hota ratowra re,
ne komu-kamua pa rawlari.
Rolin doinia la totpena la' riy mak krarin nohora a su'su re de,
rleran doinia re pa rwaliahokra,
totpena ramola-rama' targ' ho'a re!
16 Totpena hameni mak kaniha-kamali a'u re,
gaini wahra onnila ral olek ir la yawa nhi'nande rmola-rma' meman wa.
17 Awuak de riy honona mak kola tieru-kawur nehla la O'a
rahepur nande neniehu-tertera,
onnila O hihi'imu-yapyapmu re.
Awuak de mak ka'uli-kawed reri O'a,
onnila Mumori-mulewn ira,
hota riarin pa riwra:
“Plola,
plola,
Itmatromlawanni nanni ed mak kden la tutullu-lolo'oni!”
18 A' di de ukleha-uplara.
Mere Matro'mu mua Mumkek reri a'u!
O' ed mak ktulla-ksayn a'u,
ne O' ed mak kamori-kalewn' a'u.
Mmuai!
Yan mupre'eta Uplerlawnu ne!