Mak kler la susni nwaldioin pa nakot wahyaria do'oni-halli la'a Itmatromlawanni
39
Hadi de Daud nhiarni maka ha rala la Yedutun mak khi' o'tani la mak kwatunu-kwahniara totpa rwahniara:
2 La' a wniaro'ru de agiwra utiak a nu'ru la wniahauru
totpena yana lier la do'a-hala la'a nu'ru-tie'ru.
La'pa riy yatyata erla a o'nu de,
yan neka ukotkota hadoma.a
3 A'g emeknekama riy mak hakamu.
La' lir rahu-tun riahu ho'mana nohaiti nheri' aplin nieka wa.
La' lir mak kaplola id ho'mana a'g edon ukota.
Mere hade nariei piede yeher to'a pa a ralmu namehra.
4 A'g emeknekama ha yawrehla targ a'u.
Nhi'inde awuaror nohor a sniu'su la a ralmu
nhi'nande a ralam meh'ru yeher to'ama na'ititar rer lia pede a'utiana:
5 “Matroma!
Mhi' a o'ta-kriahlu pa naphyar wia
totpena a gat niohor meman de a mormio'ru di de edon naplahwa.”
6 Matroma!
Omuetlia a mormio'ru di de kpurni ne!
Yoma la Matro'mu yamkekni de a mormio'ru di emeknekama hadom mak pleta-plet pa nwatlena pa nmol wua.
Plola la'a rimormiori ami,
de emeknekama aran mamni mak amparan doinia la a iran mamni nora a waw mamni ralamni.
7 A mormior mamni rlar doin la de emeknekama memnu-tatar to'a.
La'a hya'a mak am kokokna-rariarin nohora la mormior mamni di ralamni de hade edonna nodia hadoma.
Mormior mamni di mhi'a-myapia re'a-tniaru,
mere hota he' ed mak khewta-knairia?!
8 Pa hota la dodo'on di de hya' ed mak awuei-niar owa'ana?
Matroma!
Agha'ar neka a arnu la O'a.
9 Muolin doin a lia'a do'a-hala maka aghi'a-yapi ri.
Yana Mual a' pua rimormiori mak kaplinu-kaplol nohora hya' ed mak kaplola rkakroma-rkamatr a'u.
10 Agherer wia,
pa a'g edonna ukotkot hadom eti,
yoma la O' nanpena ed maka Nhi' olek a pua alier la kropna-krieutu di.
11 Matrome!
Muolin doin a lia niukammu di,
yoma tre ma'ta oke' pa a arnu nhorwua yoma la'a O liwliwarmu de!
12 Nhi'inde Mukmua rira onnila do'oni-halli re.
Ompueyata-mpuaniauga hya' ed mak rimormiori rapal niana emeknekama erieri ra'ana hadoma.
Meman neka la plola!
Rimormiori emeknekama a' aran mamni maka klergot lola a' irun mamni onde a waw mamni ralamni.
13 Matroma!
Mutlin reria a sniumbainu,
me Mutail rer lia a polpuo'lu-wakwa'ku la O'a.
La'pa akiakur de yana Mhuerer niek wa.
Yoma la'a lera ho'ke'eni di de adien wut lia O' la' nohkeran di
pa emeknekama do'ona-dakna ida,
pa emekwalima a u'pu-tga'ru re wali.
14 Matroma!
Hota edon nalo'on wali ne amuat wia!
Mpualdioinia pa Mhuria ralam kalwiedmu owa'an mai a'u
totpa hota uhepru owa'ana,
la' ler mak amuormior ma'ta di!