Rsumbain pa rwaka nnieni-nhiena yana nkulit rer lia inonni
41
Daud nhiar ya'ulli-yawedni maka ha rala la mak khi' o'tani la mak kwatunu-kwahniara:
2 La'pa hameni ed mak ktulla-ksayni riy mak kakleha-kaplara onde mak kakleha ruri-lai,
de hota nlernana unut lawna.
Yoma Itmatromlawanni Makdenrer die,
ed mak kolin doini e' la' ler maka nlernana kropan lawna-krieut lawna.
3 Hota Itmatromlawanni nanpena ed mak kroka-khep reria,
me ktera-kdem reria de.
Hota e nlernana hima-re'a limtutu-lak ga'a la Itmatromlawanni,
totpena ndella nohananni-taniaratni,
de ralamni nahepuepru.
Ta'enniana arwalli re rala la yawa.
4 Hota Itmatromlawanni Namtatan reria pa la'pa nlernana nnieni-nhiena,
de E' ed mak ktulan la totpena nler la tema prana.
5 Ukot la:
“Matroma!
Aghi' oleka do'a-hal la O'a,
mere awuak pa yana Mkienia harella ralammu Matroma!
Mual a' pua kalwied la nnieni-nhien di Matroma!”
6 La' arwa'lu re de,
e rakot neka lir yata-tun yat la mai a'u.
La' ira wakwakni de plet pa amuati,
totpena rhoratdoin nek a lia.
7 La'a riy mak ktomra-knah'a a'u
de la riy id mana ralamni edonna nsayn a' pua ta'enniana puesiay ira.
Rmai die onnila suksukni ratlin nohora lier olek la yatyatni-halalli,
na'nama rla rodi kiota-ral de'et la' meni-meni to'owa.
8 Mak sukni tia'al a'u honona re rapupu-raheria a'u.
Rwahaur neka hota alier la yatyatni-halalli yatlorni-yatra'ani.
9 Rwahaur pa riwra:
“Halerna nnieni nwerta.
Hota plet pa nmati yoma edon namat olekwa,
ne nomi-nweh' tio'ola genni.”
10 Yaho'ame mak kora a' pua ama'ana-memun wut lia' wrag' ida me am mro'a mak klunu-klun ida,
de hade ho' de reriehenu,
e' ed maka kmalawn a'u.
11 Matroma!
Msiayn a'u.
Mual a' pua kalwieda!
Totpena awuahla mak ralamni edon kal a'u re hihi'ini-yapyapni.
12 Agat muemna de aghi' oleka O ralammu pa nahepru,
yoma O' edon Muolin doin a arwa'lu pa ral a lia yawa.
13 Omtiulan la mai a'u yoma a ralmu e naplele'er la O'a,
me Omual a' pua gor O' talan pa tden rewre'wa la geni-tiena id pa nodi liarni.
14 Haleluya ya'uli-yawedi nden rer lia Orgahi-Orha'a Uplerlawna-Mempulwatnu maka riy Israel rkola tieru-rawur nehla la de.
Ta'uli-tawed reria la dodo'ondi pa nodi liarni pa la nhoru.
Hare honona de hota emkade.
Plola!