Riy mak edonna khi' do'a-kyapi hala nwaka tniulan la Uplerlawna
26
Daud wniatunnu-wniahniarni:
Matroma!
Makdenreri O'a!
Muetlia de a'ukleha do'a-hala.
Yoma a'g e gholi-liet de dien rer lia'a plolioini-plele'erni.
A'g e gha'ar rer tio' a' arnu la O'a.
A'g edon wuadur et miemna la a pesia'yu.
2 Matroma Orgahamu Muwerta-mutaili a'u
totpa Muat niohor memna a ihru-ralmu.
3 Yoma a'g edonna ghoratdoin memna de Omtiulan reri-msiayn reri mai a'u,
me aliernohor reria O lirmu mak kaplollola.
4 A'g edonna waloi wut lia'a riy mak kputra-kpalka.
A'g edonna wuatamput lia riy mak kanur mi'na.
5 A su'ku tia'ala uwok wut lia riy mak kholi-kleta yatyata-halala,
yoma la' riy mak emkare de,
a' oliet memn a lia onni re.
6 Awuri-gohma li'mu totpa atiutga a'ukleha do'a-hala,
me akola tieru-gawur nehla tiy O'a de rie'ela lie'lu reria katri'anmu.
7 Me hota wuatunu-wuahniar pa u'uli-uwedi O'a.
Me arie'ela ukot nohora O hihi'imu-yapyapmu mak kamehi-kayona.
8 A ralmu ndenrer lia'a O rommu Matroma,
de la' gen miaka Omdien rer lia,
la'a hititmu-repreparmu ya'ulmu-yawedmu.
9 Matroma!
Yana Mpuenan wutg a lia' riy maka kler olek la'a do'a-hala ralamni onde Mlieh'ga a' arnu la' te'mu,
de nor wutga la' riy mak kwunu-kwenna rimormiori.
10 La' hare de edonna rollia nhiolli la'a hihi'a-yapyapi yatyata-halala la'a rimormior wialli,
mere yeher to'ama ra'ana-remnia rira kupanni-kaini maka ra rhodal nuru.
11 Mere a' di de dien rer lia ralma ploi-ple'era
pede Msiayn a'u Matroma!
Ne Mumori-mulewn a'u.
12 Totpena a'umtiertierun la'a yatyatni-halalli,
nanpena gor wutga krei wia'lu-iskol wa'lu ma'uli-mawedi O la' genmu-tienmu.