Ya'uli-yawedi la'a sniumbaini ralamni me rwaka tniulan la Uplerlawna
27
Daud wniatunnu-wniahniarni:
Matroma!
O' de Makdenreri O'a!
O' ed mak kahita-karepra me mak kamori-kalewn a'u.
A'g edonna umta'at la hadomdom eti
yoma O' ed mak khi' wat lutru yaro'wa geni mai a mormio'ru (benteng),
pede a'g edonna diwra-dia'al taru.
2 La'pa riy yatyata riwra rper temn a' pua rwenn a'u,
de hota ir er maka rdunit tar pua rtuwnu hgotni-rwaga du'urnu.
3 La'pa a' arwa'lu re rle'lu nan a'g emkameni ho'mana,
a ihru edonna ndiwr' eti.
La'pa rwatipna-rwahewar pa rapal niana a'g ho'mana,
a'g e uhnia'ar to'ola O'a.
4 Maka a ralmu nwak toto' meman de
totpena adien nek la Matro'mu romni pa nodi liarni la a mormio'ru di.
Totpena a' orgah'u u'eram reria O kalwiedmu
ne totpena aliernan reria lirmu-tunmu mak kawiru-kawewl a'u.
5 Matro'mu ed maka kruwun rer a lia'a a sniu'su ralamni.
E' ed mak kade'a-kamoin a lia'a E romni ralamni
me Nran a lia'a wo'ora la illi-watnu wawannu.
6 Pede hota a'g e uru'u-utowr' a' arwa'lu re honona la'a a wa'lu-wa'lu.
Ne uhepur nohora
pede agodia nhioi-tniani la Itmatromlawanni romni ralamni,
ne awuatunu-wuahniar rer lia' E'a.
7 O Matrome!
Awuak pa matmu reprepar la tulu-lyanti,
me tlinmu mana nher tiarga la polpuo'lu.
Yan Muolin limmu me Mpue'er rormu la a'u.
Mere Mtiulla-msiayn pa Mpuahla nana a polpuo'lu-wakwa'ku.
8 Omukot olek mai a'u Miwra:
“Mmuai pia mkiola tieru-muawur nehla mai A'u,”a
pede awuahla giwra:
“A'g e muai Matroma”!
9 Yan Mude'u la mai hopopanmu a' di.
Yan Muwenan pa Mpuayotlia a'u.
Yoma la O' nanpena ed mak ktulla-ksayn a'u.
Yan memmemna Mhuoplial a' pua Mhuoitio'or mai a'u,
Uplerlawnu ne!
Yoma O' nanpena ed mak kamori-kalewn a'u.
10 La'pa a i'nu nor a a'mu rhoitio'or doin mai a'u,
mere Matro'mu!
O' ed mak kpiara-klakoi khilpai-kmanatu a'u.
11 Mtiutga O ralma-riormu mai a'u Matroma!
Muodia a lia'a loi-talla mak kaplele'era
yoma a arwa'lu liawanni.
12 Yan Muolin doin a lia arwa'lu
mak kahak pa rhi' yatyat la a'u,
yoma ralahar pa rwaghal a'u
me rakot mamain de riwra rwunu-rwenn a'u.
13 Agha'ara arnu la O'a,
yoma agatga de hota aliernana himima-rere'a la O'a
mai noh di wawannu.
14 Mmiai pia itsi' aruri it ihranu ralamni.
Yoma tsa'ar reria it mormiorni la Itmatromlawanni Makdenrer die.
Yan memmemna it twaler la E'a mere itweiwiei pia hota Nma Ntulan mai ita.