Rsumbain pa rwaka loi-talla mak kodia lina-lera
25
Daud wniatunnu-wniahniarni:
Matroma!
Awuatniar la heyanan pa siumbain la O'a.
2 Uplerlawnu ne!
A pesia'yu nden rer lia O'a.
Yana Muolli a' pua a arwa'lu re ral a lia yawa.
Yana irahepru pa riarni-riarin nohora yoma ra'unut nan olek a wua nhi'nande alier la yamola-yama'a.
3 La riy mak klili-kdiori pa rmalawna,
mere rakleha nhiapargenni,
ir er mak kler la yamola-yama'a.
Mere la'pa hameni mak kha'ar aranni la O'a,
de hota Muala pa ral arwalli re la' yawa totpena yana arwalli ramalia re.
4 Matroma!
Makdenreri O'a!
Mtiutga ralma-riormu mai a'u
me talan plollola mak hota aliola.
5 Mpuatutu-mpuaye' a lia'a hya'a mak kaplola
me Muala ruri-lai totpena aghi' nana,
yoma O' nampena Uplerlawnu mak kamori-kalewn a'u,
pede nhi'inde agha'ara arnu la O'a.
6 Matroma!
La' ululu de nhi'inde Omtiutga ralam kalwiedmu
me tniulanmu-sniayanmu mai a'u onnila sniayni onni O'a,
pede awuak pa Mhi' emkade owa'ana.
7 Yana Mukmu a lia do'u-ha'lu pniera-dniayti maka
aghi'a-yapia la'a lerni la adien ma'ta la tuwari lewatni.
Mere la'a ralam kalwiedmu de
pede Mtiut reri sniayanmu mak kodi liarni mai a'u.
8 Itmatromlawanni Makdenrer die,
Ndella plola wawannu me Ntut rer nieka ralam kalwiedni la rimormiori,
pede Ntutga loi-talla plollola la'a riy dodo'a-halala mak kler la klieratni.
9 Itmatromlawanni ed mak kalakra riy mak katu khu'ru-khelma,
me Nwatut ir la nhioli-liet kalwiedweda maka Enwahakhaka.
10 La'a riy mak katu khu'ru-khelam la Itmatromlawanni deullu-tatarni lirni-tunnu de,
de Entut nieka tniulanni-sniayanni la' ira yoma hya' to' maka Enakot targa de plol toto'a pa Enhi' nana.
11 Matroma!
Mumou-muwitna a do'u-ha'lu totpena riy ra'uli-rawedia O nanmu,
yoma a do'u-ha'lu inponni rehia.
12 Matromlawnu ne!
Riy mak khu'ru-khelma katlina-katailla O'a,
de orgahamu Mpuatutu-mpuaye'a la' loi-talan mak ha Muhakaka.
13 Hota rmori-rdar lia rehenu-lawanni,
me duratni-waitni mana rlernan walia geni-tien maka ha rano'tar lia re.
14 Riy' maka khu'ru-khelma ka'unni-kamta'at la' Itmatromlawanni,
de rla' E talanwalli,
me hota Nakot momuoga la'a nnio'oni nnia'eratni la ira.
15 Agha'ara a arnu la' Itmatromlawanni Makdenrer die,
yoma E' ed maka kamori-kalewna a lia'a dari miaka kanietra,
me tniokal mak ha rtokal targa la' loi-talla.
16 Matrome!
Mumkek mai a' die ralammu nmawla,
yoma riy id mana edonna rhe'du nohor a lia'a nniahora-nniala'a maka a'udodo'or nohor di.
17 A sniu'su lawan rehia
pa Muolin doin a lia wa.
18 Mhuoratreria a sniu'su re honona
me Mumou-muwitna a do'u-ha'lu honona re.
19 Mumkek la!
A arwa'lu re harahu
me honona ralamni edonna ral meman a'u.
20 Mutiak reri a'u,
Matroma!
Mulewna a'u totpena yana a arwa'lu ral a lia yawa nhi'nande alier la yamola-yama'a.
Mtiulan nan a'u
yoma la' O' nampena aliernana mak kruwun reri-ka'ahla reri a'u.
21 Awuak pa Omutiak reri a'u yoma adien nek la plola wawannu.
Mtiulan mai a'u yoma a'g e uhnia'ar rer lia O'a.
22 Uplerlawnu ne!
Muolin doin O rimormiormu Israel
la'a kropna-krieutu honona.