Ray mak kden la hititni-lomlomarni
24
Hadi de Daud ya'ulli-yawedni la'a wniatunnu-wniahniarni:
Orgahi-Orha'a Uplerlawna-Mempulwatnu ed maka gahani
mai nohkerna-rai miaran di,
nora ihini-mniotni honona.
2 E' ed mak kwatatg ulga noh di watu liar pianullu la'a tah'i lawna,
me Nariria la'a gera kdieldelma.
3 Itmatromlawanni Nolin doinia pa he' ed mak kafia'at nana wo'orni la'a Sion?
He' ed mak khu'ru la E romni ralamni mak kden hande,
de la' gen miaka kmou-kwitan de?
4 Mak kla'a re de,
enekneka riy mak kho'a-khaiya limni la do'oni-halli ralamni me namoga ihrani-ralamni la'a mak kawu'u-kahana,
mak edonna kru'u-ktowar la watu-au mak ha rhi' nana la uplera-upmati,
me mak edonna klokra-khautu la'a hya' mak edon kaplola.
5 La'a riy mak emkare,
er mak klernana ra'a-palu la Itmatromlawanni,
de Uplerlawna-Mempulwatnu mak kamori-kalewna ira ed mak ketlia de Niwra ir de de rakleha do'a-hala.
6 Emkadel la'a riy mak kmai lia Uplerlawna gaini ralamni totpena rkola tieru-rawur nehla rer lia.
E' de it upni-tgarni Yakopa Uplerlawanni E'a.
7 Rhari tpopoinia nhiar lawna kolkuolu die
totpena Ray mak kden la hitita-lomomar de Nla'a rialma.
8 He' ed Ray die no?
Orgahi-Orha'a mak karuri-kalai,
maka ktoran reria haneknek wawannu inhatte,
me mak ka'unut la'a ar ralma inhatte.
9 Rhari tpopoinia nhiari kolkuolu die pa napliorlora
totpena Ray mak kden la hitita-lomlomra inhatte Nlola rialma.
10 Ray meni hade no?
Orgahi-Orha'a Makodi Plolli la' Ar Ralma,
Hade ed mak ha riwra Ray mak kden la hititni-lomlomarni inhatte.