Itmatromlawanni Makdenrer die, ed mak khi' heri-lay lia mai a'u
23
Hadi de Daud ya'ulli-yawedni la'a wniatunnu-wniahniarni:
A Matromlawnu de emeknekama riy mak khi'a heri-lay lia mai a'u.
De lera-lera nekpa Nhuri-nwa'an a'u pede ta'enniana a'ukleha hadomdoma.
2 E' ed mak kadud tiarga a lia'a wewan potpioti wawannu
me Nalakr' a' pua Nodia a lia'a gera tliwu onni totpena arien a'u.
3 Nal a' pua ururi
me Nodia a lia'a loi-talla plollola,
totpena hota ra'uli-rawedia E kotni-nanni yoma samomuounu.
4 La'pa aliol lowna-ahla mak lol melli-kalamni
ho'mana a'g edonna umta'at kuku' eti,
yoma Matro'mu Omuora a' tialla.
Omriuwun reri a' die emeknekama heri-lay ida e nala lie'eni nora aukakaklu na natut rieria pipni-dumni.
Omriuwun reri a' die emeknekama heri-lay ida mak katiak reri pipni-dumni.
5 O' ed maka khi' targ oleka ya'ana-yemnu la'a mei plalahwa
pa a arwa'lu re ramkek reri,
ne Omhu'ru-mhuelm a' pua Muodi a lia'a mei de emeknekama o'ta-mat maka ha rpolu-rwak nana la'a genni-tienni.a
Omhuri-mtiowria lokrahi (anggur) turnu la a la'ru ralamni pa penpuenu-nanahala.
6 Matroma!
Agatga de O' ed mak ktutga ralam kalwiedmu me tniulanmu-sniayanmu
mai a lia a mormio'ru-dardia'ru di tetema.
Pa hota adien wut lia O' pa itdella O rommu nayanni
pa nodi liarni.