Sniumbaini la'a ir rler la klieratni
22
Rlernohora nhiara mak ha rweta la Rusa mak kmai lia Reprepra.
Hadi de Daud ya'ulli-yawedni la'a wniatunnu-wniahniarni maka ha rala la mak khi' o'ta la mak kwatunu-kwahniara:
2 Uplerlawnu ne,
Uplerlawnu ne,
nihya'pa Omuolin limmu-mpue'er rormu mai a'u?!
A'g e puol lia O'a,
mere O' oliet reh'u
ne O' edonna Mhua'wu nan a'u.
3 Matromlawnu ne!
La' lelera-melmela a'g e puol lia O'a,
mere Omtiot ti'lu.
A'g e siumbain rer tio'owa mere emkade ho'mana a ralmu emeka ha niowra-wnialia.
4 Mere O'a,
de Ray mak kakleha do'a-hala kuku' eti.
O' ed maka riy Israel e ra'uli-rawed re'ru.
5 La'a up mamni-tgar mamni de e rha'ar reri aranni la O'a.
Ir rpesiay lia O'a,
noma O' ed mak kamori-kalewan nan ira.
6 O' edonna Muolin limmu la ira,
ne la'pa ir rpol lia O'a de O muai pia Mulewna re.
Rha'ar aranni la O'a,
yoma Omhi' nan memna hya' maka Omukot targa oleka re.
7 Mere la' a' di de riy honona rmakriarni a'u.
Rhi' a' die emeknekama riy mak kakleha welli me rahe'i-ramali a'u.
8 Honona re rhikwyo' nurnu me rdikdik o'tani
pa rwali-walliohora a'u.
9 Riwra:
“E nha'ar aranni la e Matromlawanni.
Ne mai pia tamkek teka hota Enamori-nalewna e' me edonna,
la'pa plollola pa e Matromlawanni ralamni nal nan e'a!”
10-11 Mere Uplerlawnu ne!
O' ed mak kalgot a lia i'nu apannu ralamni,
me aguhu ma'ta,
de O' ed maka kariwa-kahai a'u.
O' de a Uplerlawnu.
A mormio'ru-dardia'ru ndella O limmu ralamni
la' lera a kuku'-keke' ma'ta a'u pa la'pa ntutu-nte'ela lera-mela ri.
12 Yan olie'tu,
yoma arwa'lu re riwra rehgor a'u,
ne hota riy id mana edonna ntulan mai a'u.
13 A' arwa'lu rpepan rer a'u
emolmolan nekama hayori-orpau lidna
mak kpora-kdawra riwra rwahaka wniadudallu.
14 Rmai pia rapalia a' die rwihi-rak nihini
pa emolmola ohpora-ahdiawra mak kiwra klihira-knai a'u.
15 Aruple'a nal a'u me a ru'ru-kliaklu honona raldoin la genni.
A ihru ralmu nmadger pa emeknekama lilli (lilin).
16 A'ukleha ruri-lai wia.
La'pa krui mak kdella a wa'wu ralamni mana nkeran-nhau pua a na'mu nkulit targ' olek la'a nu'ru lyanatni.
Matrome!
Mpuaklol tiar niek a lia'a koda-awu wawannu.
Nhi'pa amuati olekwa.
17 Riy yatyata re rmai pia rle'lu reria a'u
pa emekwalima oha-ahu mak kiwra klihira-knai pipi-duma.
Rmai pia rkoki-rta'wa a li'mu-la'ku.
18 A ru'ru-kliaklu re honona de rayamkeka momuou
pa arwa'lu re rpoi-rkek a' die emeknekama yohya' maka ha rahe'eya.
19 Noma rwarui-rwate'la a naniai'ru re pa rwahakra.
Rdurmu-rhakra a rainu de rwahedga patui.
20 Mere Matrome!
Yan olie'tu la mai a'u.
Muai pletlet pa ma Mtiulan mai a'u.
Yoma O' nanpena ed maka karuri-kalai nian a'u.
21 Mua Mulewna a lia'a wehla gai liokarni,
me Muolin doinia a lia'a oha-ahu re nurnu-riautnu.
22 Ukleh oleka rur wia pa Munawar doinia a lia la' hayori-orpau ri dudallu
me la'a ohpora-ahdiawra re nihini tutnu mak katnia'wa.a
Ra'uli-rawed reria Uplerlawna
23 Hihi'imu-yapyapmu hota aghi'a la tui la'a a'mu-hya'lu,
i'nu-na'ru.
La'a iskola-krei de a'uli-uwedre'ru totpena iratlin nana.
24 Mak kola tieru-mak kawur nehla rer lia Itmatromlawanni Makdenrer die,
mriarin la haleluya!
Yakob duratni-waitni mi'uli-miwedia E'a.
De makden Israel hononmi mriu'u-mtiowar la E nayanni.
25 Yoma E' edonna Nmakriarnia riy mak kler la susa ralamni,
me edonna Nolin limni-nwe'er rorni la riy mak polpuol inni-wakwak amni.
Mere matni nreprepar la tulu-lyanti me tlinni nher tiarga la mak kwaka tniulan la E'a.
26 Matroma!
La'pa makden Israel honona re rtepartarlia kniola tieru-niawur nehla la' O'a de a'u'uli-uwed re'ru,
yoma la'a hya' maka Omhi'nan oleka re.
Me hota ir ramkek nana agala a patu'yu-paro'onu mak a'ukot targa la O'a.
27 La'a riy mak kakleha-kaplara re de,
hota ra'ana-remun nande rpeher wa.
La'a mak kola tieru-kawur nehla la O' de hota ra'uli-rawed reria O'a.
Twakwak de ir honona rler la pripanni-fa'anni pa nodi liarni.
28 Hota la'a lodna-hairi me leta-leta honona mak kdenl a noh pa'etu-rai piatatra mai lyanti nayanni
hota rhoratnana Itmatromlawanni Makdenrer die,
pa rawali owa'an pa rmai lia E' de.
Hota noha mniotni honona rtuk lia E nayanni.
29 Yoma Orgahi-Orha'a mak kodi plolli hota ed mak ktorna-krautia
lodna-hairi honona mak kden la'a nohkerna-rai miaran di.
30 Riy mak katulu-kapetna honona rtuk lia.
Rimormiori mak edon nalo'on wali ne rmat pia rerun la noh mati-rai miolu de rwaltiora-rwaltieman la.
31 Hota la' tuwu-tuwu mak kmai nieka re rla rkola tieru-rawur nehla la E'a.
Tuwu ida hota nakot nohora Orgahi-Orha'a hihi'ini-yapyapni mak kden la plol wawannu,
la'a tuwu mak kmai.
32 De rakota riwra Itmatromlawanni Namori-nalewna E herni-darni.