Ra'uli-rawedia Uplerlawna yoma Nal arwalli re la yawa
21
Hadi de Daud ya'ulli-yawedni la wniatunnu-wniahniarni maka ha rala la mak khi' o'tani la mak kwatunu-kwahniara:
2 Matromlawnu ne!
A ray miamni kaniha-kamalia yoma O' ed mak kala ruri-lai lia e'a.
Ralamni de nahepuepur reri yoma Omtiulan pa nareh niana arwalli la' ara ralamni.
3 O' ed mak kreiniana-ka'nana la'a hya' maka e nwak la O'a
pa Omhi'a honona re pa rtutu-rte'ewa.
4 Omuodi oleka yare'emu-yapalmu mak karehi-kalawna pa Omuala la e'a,
me O' ed maka Mkuowa sape' maha ihi la' o'tani.
5 La'pa enwak la' O' de,
O' ed mak kala e tuwnu pa mormiorni plahwa.
Hota nmormiori pa nodi liarni yoma Omrieiniana-mua'nana e wakwakni de.
6 Matroma!
La'a O tultulanmu pede ray de nal arwalli re la' yawa nhi'nande riy honona ratota-rawawa ray nanni.
La'a O hihi'imu-yapyapmu pede rwoh'a reri-rwanin reria e kotni-nanni.
7 Omura'a-mupal muemn e'a pa nodi liarni
ne e ralamni nahepuepur reri yoma Omuor e' talla.
8 Yoma e nha'ar rer aranni la O'a Matroma.
Ne hota namtatan pitpit niohora genni-tienni
yoma O' Makdella Tutullu-Lolo'oni de Mtiulla-msiayn reri e'a pa nodi liarni.
9 Matroma!
Hota O' ed mak kdeh'a reria arwalmu nhi'nande honona rran limni,
me Omtiorna riy honona maka gai pietan la O'a.
10 Hota O'a Matroma,
O hankeranmu-ralmha'armu
ntuin meman la nohkerna.
Omuai die emeknekama ai mormiori mak kdudmu-klairi,
mak kram momuoga arwalmu re honona.
11 La'a arwalmu re duratni-waitni upni-a'nani de hota riy id mana edon raltarga.
Yoma hota Omkuhi-mhuo'ora ir kotnu-turnu gerni-wniaunu honona re.
12 La'pa arwalmu re riwra rwarora-rwalaiya ralma-riora yatyata-halala la' O'a,
de hota ralma-riorni re hamamuamua.
13 Hota Omtieran ra'pa la ira,
de hota rwaldioinia pa kurna-kiatra.
14 Ampahniara pa ma'uli-mawed reri O'a,
Matroma
yoma la'a O rurmu-laimu plolmu-mnehemu takenia am mpar nana.