Sniumbaini totpena ray nal arwalli re la' yawa
20
Hadi de Daud ya'ulli-yawedni la'a wniatunnu-wniahniarni maka ha rala la mak khi' o'tani la mak kwatunu-kwahniara:
2-3 Matroma,
Makdenreri O'a!
Upa-tgar mamni Yakopa Uplerlawanni!
Am mpak la O'a totpena Muheri tlinmu-mtatar matmu la'a a ray miamni polpuollu-wakwakni.
Yan Muolin limmu,
me Mpue'er rormu la ray die mere Mhilpai-muanatua,
Muhlili-mulakma,
Muyori-mudaria a ray miamni de.
Am mpakwak de Omdiella Rommu nayanni la'a wo'or Sion pa Mtier doini-muhal doini yotyotni-yatyatni la'a ray die.
4 Matrome!
Am mpak de ray nhioini-tnianni maka ha rtunu-rharna re rhi' amikria O ralammu
me Omrieiniana-mua'nana ray nhioi-tnianni honona re.
5 Am mpak de pena la'a hya' maka ray nwahaka re pena nlernana
me hya'-hya'a maka ray nwaror nana ntutu-nte'ewa.
6 Totpena am mrarni-mrarin nohora ray la'a unutnu de,
ne pena ampannia hairi-hairi lola loi-talla plalahwani pa ma'uli-mawedia O'a mak kla' Uplerlawan mamni mak kden la tutullu-lolo'oni.
Matroma,
ampak de pena O' ed maka kala hya' maka ray nwaka la O'a.
Rakot nohora rha'ar aranni la Uplerlawna yoma hota Nwahla ir sniumbaini
7 Dodo'ondi de agatga de Itmatromlawanni Makdenrer die,
ed mak kala ya'unut lawna la'a ray mak E' orgahani Nwalir niana.
Endella E genni-tienni mak kmou-kwitna la'a Ilyamou-Watyatoha pa Nwahla nana ray lir wakwakni.
La'a Orgahi-Orha'a plolli-mneheni pede ray nala arwalli re la' yawa.
8 La'a riy dom de e rtutga yatnu pa rala kereta ya'ara me la' dom de ral walia kud ya'arni pa rodi rma ra'ara,
mere la' it di de,
it tal to'a Uplerlawna,
Itmatromlawanni Makden rer die,
rurni-laini pa nora re ra'ara.
9 Mak kha'ar aranni la' kereta me kuda re,
honona re dudunti-wetwetria pa rhokal du'urnu-rwaga onni.
Mere la' am di de mtutrier apit lia a gen miamni.
10 Matrome!
Mtiemna untu la' ray limni ralamni.
La'pa am mpollia O' de Mpuahla nan ami,
Matroma.