LITURHI TUWARI-HARARARA KREINI : MODEL D
(Liturgi Ibadah Pemuda, Model D) ***
MAI PIA TKOLA TIERU-TAWUR NEHLA (O'ta-mata ida) (Ajakan Beribadah)
Ina-nara ama hyal miy re, tuwari-hararara it mormiorni-dardiarni de tla' krei mutnu-rahanu la' tuw di pa la nodi liarni. Mere totpa miatga de la' ler li'iru de ntut muemna hya'a edmaka it tsi' nana la' dodo'ondi. Tuwari-hararara de krei mutnu-rahanu la' tuw li'iru, mere krei mutnu-rahanu la' tuw li'iru nek de de ntut muemna hya' edmaka tuwari-hararara krei mutnu-rahanu rhi' nana-ryap niana la' dodo'ondi de, rmori-rdar liol pesiayni ralamni totpena emeka kio'a mak kamahan nana, me wa'du mak kreprepar la nohkerna. La' hade pede mai pia it tutga la tuwari-hararara kniola tieru-niawur nehla la' dodo'ondi. Uplerlawna Ntera- ndema it hohonita. Plola. (Tutrieri)
I. IT TAPALI UPLERLAWNA (Menghadap Tuhan)
INVOKASI: RPOLLIA UPLERLAWNA (Seruan kepada Allah)
WNIAHNIARA (Nyanyian) : (disesuaikan)
NHIAR LIRA NORA KALWIEDA-PAITIOTA (Votum dan Salam) ***
P1 : Mak ktulla-ksayn ita de it Amni Orgahi-Orha'a mak kohi-ka'ar ita me nohkerna-raimiarna de nwatiawu Wutmueha-Laimieha mak ktut inonni emekwalia rimormiori pa Ntuwu-nhai it do'oni-halli, me Nala Nhiw Lululli Namou-nawitna mak kpesiay ihranu ralamni la'pa mormiorni-dadiarni totpena rmori-rdar lia plollolli la Uplerlawna. Orgahi-Orha'a kalwiedni-paitiotni nden rer lia it hononita la' gen di.
J: Plola! Ya'uli-yawedi nden rer lia Orgahi-Orha'a. Plola. (Ramtatna)
YA’ULI-YAWEDI RWAHNIARA (Menyanyikan Pujian) : (desesuaikan)
TAT NIOHORA IT MORMIORNI (Pengenalan diri)
P2 : Hya’ mak samomuou muemna me mak kla’ nan riy mak pesiay ralamni de rwatroma Uplerlawna la Nhiw Lululi me plollolli memna. Pede mpiahak rer Uplerlawna la’ mtiuwari-mhiararar ma’ta. Mpiahaka Uplerlawna me rurni-laini, mpiahak reria totpena mliernohora E nhiolli-lietni.
J : Rtera-rdem reria riy mak kpesiay reria Uplerlawna me mak kha’ar reria mormiorni la Uplerlawna.
P3 : Yowa! La’pa podku-padku plinu-plo’a edon nden rer lia tuwari laweru-hararara momiorni-dardiarni, de e mormiorni emeknekama au liawan maka rtamnia la ger mak kwau pa nawe’er ga’arni la gera onni me edon nlernana ler pahna, mak tawni motmot to’owa, me hota nawo’ to' pa nodi liarni.
RWAHNIARA NHIARA MAKA TAT NIOHORA IT MORMIORNI (Menyanyikan Nyanyian Pengenalan Diri)
ITA WNIALOLLI (Pengakuan)
P4 : Matroma, ampalol nohora a kleh rur miamni-lai miamni. A mala a ihru mamni-ralam mamni tetema pa a mpaka tniulanmu-sniayanmu, Msiayn ami Matroma totpena a mpera-mlakat pa mlola lira wniau nhioratmu yoma eneknek to’ O mak kodi plolli pa ktutga talla me mak ktatra a mormiori miamni la’ ler mak kmai nieka.
WNAHNIARA (Ramtatna) (Nyanyian Jemaat) : (desesuaikan) / (duduk)
II. RPAIKIA PUK LULULI ME NNIE'ERNI-TNIATARNI (Pelayanan Firman)
SNIUMBAINI (O'ta-mata id maka ksumbaini) (Doa Epiklese / oleh seorang pengurus)
P1 : A A’mu la Ilyamou-Watyatoha, a matga de la’pa O lirmu-tunmu edonan de a mormior miamni edon naplola. A matga de O lirmu-tunmu de edmak ktut tialla me nodi plolli la a mormior miamni, a mpesiaya de hare honona maka e rhorattarga la Puk Lululi ralamni de O' orgahamu lirmu-tunmu inhat hade. Mpuahi’ am pia a matlina lirmu-tunmu. Plola.
RPAIKI PUK LULULI (Tuwari ida me hararara ida) (Pembacaan Firman Tuhan : oleh 2 orang pemuda-pamudi)
RIWAITI (rhi'a video / rnairia infocus, puisi onde rhorta pa rpaiki onde hya’a-hya’ to’owa) (Reflexi Firman : dalam bentuk layangan, puisi, atau akta simbolis)
WNIAHNIARA (Nyanyian Respon) : (disesuaikan)
III. KREI WOKNI-LE'ENU RWAHLA (Respon Umat)
KREI WOKNI-LE'ENU RALA NHIOINI-TNIANNI (rala nhioi-tniani de krei wokni-le’enu rwahniara) (Persembahan Syukur diberikan sambil menyanyikan nyanyian syukur)
P5 : Ya’uli-Yawedi nden rer lia Uplerlawna la’pa hya’ maka it tlernana la it mormiorni di ralamni de nlola kalwiedni-paitiotni. Mai pia it tutga it ya’ulli-yawedni la Uplerlawna lola ita nhioini-tnianni.
TKOLA TIERU-TAWUR NEHLA LA UPLERLAWNA (Kniola tieru-niawur nehla di de riy woru-wotelu onde wogata rawok pa rkola tieru-rawur nehla) (Doa Syafaat : dalam bentuk doa berantai)
IV. NNIO'A RA'A-PALU (Rtutrieri) (Pengutusan dan Berkat) / (berdiri)
NHIARA NNIO'A RA'A-PALU (Nyanyian Pengutusan) : (disesuaikan)
P6 : Ina-nara ama-hyal miy die tuwari laweru-hararara, de krei tennanni miy. Onnila Uplerlawna ralam kalwiedni pa auno’a-unat miy totpena miala mormiormi-dardiarmi emeka nhiurliwtu-wniali odwa mak kaplola, mak kmou-kwitna me mak kla’ nana Uplerlawna ralamni. Hade de kreimi-iskolmi plollolli inhat hade. Yehwami-liakatmi re yana mtiolliohora rimormiori nohkerna yehwani-liakatni, mere mtiolliohora yehwa-liakat mak kla’ nan Uplerlawna ralamni, totpena miat niohora hya’ maka kla’ nana Uplerlawna ralma-riorni mak kaplol memna. E ralma-riormu nden rer lia a mormior miamni. Mhioratreria Uplerlawna ra’ani-pallu maka kden rer lia miy : UPLERLAWNA NTERA-NDEM MIY ME NWILL-NMA’AT RERI MIY, UPLERLAWNA NHURIA RALAM KALWIEDNU TIY MIY, ME NAL RERIA RA’A-PALU, UPLERLAWNA NAPALI RER GAINI TIY MIY ME NALA KALWIEDA-PAITIOTA. PLOLA.
J : MENYANYIKAN KJ NO 478 a : Amin Amin Amin
Plola, Plola, Ploola