Sura i Paulus Paratama ka Topomparasaya ri Ngata
Tesalonika
Vamba nu Tesa
Nggaulu ngata Tesalonika ibukota propinsi Makedonia. Nitasere roatu-njobu tona nonturo hamai. Sanu tupu ngata noagama Yahudi tapi deanapa tona ledo toYahudi bo ira aga netupu nte pinoito bo tupu-tupu anu ledo nakana. I Paulus, i Timotius, bo i Silas nanggeni Kareba Belo ka toTesalonika sampe naria bara sako-ndua ira nomparasaya i Yesus (peinta Suro-suro 17:1-9). Ledo nasae naliutaka haitu, i Paulus nte roana nipandasa ntona anu ledo nomparasaya i Pue. Jadi, ri bongina topomparasaya ri ngata Tesalonika nombatulungi i Paulus malai hau ri ngata santanina (peinta Suro-suro 17:10). Bara sakuya kasaena naliu haitu, i Paulus nalentora nte sampesuvuna sampomparasaya ri ngata Tesalonika bo madota hau mosinggava nte ira. Tapi ia dopa naloga hau mompeinta ira. Sia sampe nituduna i Timotius hau manjayo nte toTesalonika mompeinta pomparasayara bara naroso bara ledo (3:1-2). Nanjili i Timotius, pade nitulisi i Paulus sura hitu.
Nadea patuju i Paulus notulisi sura hitu. Nipopatorana toTesalonika berimba tesana bo pokaingguna tempo ia naria nte ira baipia (2:1-2). Nipakavoena rarara bo nipakadidina rara ntona nipandasa sabana pomparasayara (3:3-5). Nipatudukina ka ira pokainggu masipato ka topangoseaka i Yesus (4:1-12). Niulina ka ira anu majadi nte topomparasaya anu namatemo bo topomparasaya anu da natuvu ri eo kakava i Yesus mpanjili (5:13-17). Pura-pura pasal ri sura paratama ka toTesalonika notesa kakava i Yesus mpanjili (1:9-10; 2:19-20; 3:14; 4:13-17; 5:1-2, 23-34).
Isi nu Sura
Tesa pantepuuna (1:1)
Tesa i Paulus nte toTesalonika (1:2-3:13)
I Paulus notarima kasi nte Alatala sabana toTesalonika, bo nitoiyana pokainggura (1:2-10)
I Paulus nanjaliku karona mboto, nitesana pokarajaana ri ngata Tesalonika baipia bo nipopatorana pokaingguna nabelo ka ira (2:1-12)
I Paulus nanguli kalentorana bo madota mosinggava nte ira (2:13-3:13)
I Paulus nompangajari bo nompatuduki toTesalonika (4:1-5:28)
Nipangajarina ira mokainggu masipato ka topangoseaka i Yesus (4:1-12)
Nipatudukina ka ira anu majadi ri eo kakava i Yesus (4:13-5:11)
Nipatudukina ira matuvu mosinggabelo nte sampesuvura sampomparasaya (5:12-22)
Tabe bo tesa kaupuna (5:23-28)