Sura i Paulus ka Topomparasaya ri Ngata
Kolose
Vamba nu Tesa
Ngata Kolose sangu ngata ri propinsi Asia Kodi ledo nakavao lako ri ngata Efesus. I Paulus nokarajaa nompatolele Kareba Belo ri ngata Efesus labi rompae kasaena. Naupu sia naria topomparasaya lako ri ngata Efesus hau nompatolele Kareba Belo ri ngata Kolose sampe naria muni toKolose nomparasaya i Yesus. Bara sako-mpae kaliuna haitu, i Paulus nisuaraka riara ntarunggu ri ngata Roma sabana nompatolele Kareba Belo. Tempo ia da riara ntarunggu, nitulisina sura hitu ka toKolose.
I Tikhikus nanggeni sura hitu ka toKolose, bo niporoa i Onesimus. I Onesimus haitu batua anu nalai lako ri tuana bara ipia, bo ia nitudu i Paulus kana manjili nte tuana. Tuana i Filemon, toKolose. (Peinta Sura nitulisi i Paulus ka i Filemon.)
Riara sura ka toKolose hitu, i Paulus nompopainga ira naria guru-guru agama nompatuduki anu ledo nakana. Guru-guru haitu nanguli ane kita madota rapakasalama, ledo nagana aga momparasaya i Yesus, kita kana metupu muni nte anu nombakuasai langi bo tana evamo malaeka, bo kita muni paraluu rasuna nangoseaka ada agama Yahudi, bo kita paraluu mangoseaka ada-ada bo atura-atura ntanina. I Paulus nompopainga toKolose nee raparasaya pepatuduki nasala haitu. Niulina, nomparasaya i Yesus naganamo, sabana aga i Yesus nompakule nompakasalama manusia. Pepatuduki nikeni nu guru podava pangane, aga nompakasalandala tona apa pepatudukira ledo nomparibavo i Yesus.
Riara sura hitu, i Paulus nompatuduki muni pokainggu mbana masipato ka topomparasaya i Yesus.
Isi nu Sura
Petabe (1:1-2)
I Paulus nanguli tarima kasi nte Alatala sabana pomparasaya bo pepotove ntoKolose, bo niposambayakana ira (1:3-14)
I Yesus naogepa pade pura-pura anu ntanina (1:15-23)
Pokarajaa i Paulus nompatolele Kareba Belo (1:24-2:5)
TESA NOPOKO: Topomparasaya kana matuvu ante pokainggu masipato ka tona nipakasalama i Yesus (2:6-7)
Nee rabagiu pepatuduki anu ledo nakana (2:8-23)
Topomparasaya kana mombakabasaka pokainggu njae, bo matuvu ante pokainggu nabaru (3:1-17)
Pepatuduki ka topoberei, ngana-ngana bo totua, batua bo tua (3:18-4:1)
Pepatuduki posambaya bo pokainggu nte tona ledo topomparasaya (4:2-6)
Petabe bo tesa-tesa kaupuna (4:7-18)