Sura i Paulus ka Topomparasaya ri Ngata
Filipi
Vamba nu Tesa
Ngata Filipi ngata nisani ntodea ri propinsi Makedonia. Tempo i Paulus nolintiku propinsi Makedonia nompatolele Kareba Belo, ia paratama-tamana hau ri ngata Filipi. Nau nadea tona nangeva ia, kaupuna nadea muni nomparasaya i Yesus (Suro-suro 16). Naliu i Paulus nompalaisi Filipi, toFilipi nompakatu doi ka ia bara sako-nggani mombatulungi ia mompakapola pokarajaana.
Nitasere sapulu-mpae naupu i Paulus nompatolele Kareba Belo ri Filipi, ia nitarunggu ri ngata mbaso Roma. Niepe ntoFilipi ia nitarunggu, nipakatura vai doi petulungi ka ia. Doi haitu nikeni ntoFilipi anu nosanga i Epafroditus. Nakava i Epafroditus ri Roma, nidekeinamo pedekei lako nte topomparasaya ri ngata Filipi ka i Paulus. Bara sako-mbula kakava i Epafroditus ri Roma, i Paulus nantudu ia manjili hau ri ngata Filipi, bo nitulisina sura hitu bo nidekeina ka i Epafroditus rakeni hau ri Filipi.
Sura hitu nitulisi i Paulus lako ri tarunggu. Niulina tarima kasi ka toFilipi sabana pedekeira haitu. Nipakadidina rarara ala ira matuvu mosangu rara ante pokainggu anu ledo mamala rasalai ntona, ala mantambai kadea ntona momparasaya Kareba Belo (1:27-2:18; 4:2-3). Nituduna ira mompasiala kaede rara i Kristus bo matuvu mabelo ri tatanga ntona nadaa ri dunia (2:1-18). Ia nompainga ira ka tona nokainggu nadaa bo nanggeni pepatuduki nasala (3:1-2, 17-19). Nipopatorana ka ira, ira nireke nanoa ri panggita nu Alatala sabana pomparasayara i Kristus, ledo sabana pangoseakara ada-ada atau sabana ira tonuapa. Bo nipopatorana kabelo ratarima ntona anu mpuu-mpuu nangoseaka i Kristus.
Isi nu Sura
Tesa pantepuuna (1:1-2)
I Paulus notarima kasi nte Alatala sabana toFilipi, bo ia nosambaya ka ira (1:3-11)
Nau ia nitarunggu, nantambai kadea ntona nangepe bo nomparasaya Kareba Belo (1:12-26)
Nipopatorana ira matuvu mosangu rara bo mangoseaka jonjo i Yesus (1:27-2:18)
Nitesana nia nantudu i Timotius bo i Epafroditus hau ri ngata Filipi (2:19-3:1a)
Kana mainga ka tona anu nanggeni pepatuduki nasala (3:1b-4:1)
Kana mosangu rara bo mompakaroso pangoseaka i Kristus (4:2-9)
I Paulus nanguli tarima kasi sabana nitarimanamo doi nipakatu ntoFilipi (4:10-20)
Petabe kaupuna (4:21-23)