Sura i Paulus ka Topomparasaya ri Ngata
Galatia
Vamba nu Tesa
Propinsi Galatia niparenta Magau Mbaso ri ngata Roma. Sii-sii, Galatia ri bagia negara Turki. Toponturo ri propinsi Galatia ledo toYahudi. Baipia ira netupu nte viata-viata bo tupu-tupu ntanina. Tapi tempo i Paulus nakava nompatolele Kareba Belo ka ira, nadea ira nomparasaya i Kristus.
Tempo i Paulus nalai lako ri propinsi Galatia, nakavamo tona nanggeni pepatuduki nasala. Ivei pepatudukira: “Ledo nagana aga momparasaya i Yesus. Kita kana rasuna bo mangoseaka Atura-atura agama Yahudi ala kita mpuu-mpuu majadi manoa ri panggita nu Alatala.”
Tempo i Paulus nangepe pepatuduki haitu, narau ia. Haitu sampe nitulisina sura hitu ka toGalatia. Riara sura hitu i Paulus nompakalanto kita majadi manoa ri panggita nu Alatala aga lako ri pomparasayata i Kristus, ledo sabana kita nisuna, ledo muni sabana nioseakata Atura-atura agama. Lako ri pomparasayata i Kristus, kita nireke muli i Abraham. Batuana, lako ri pomparasayata i Kristus, kita najadi nanoa ri panggita nu Alatala bo kita manggava belo nijanji nu Alatala ka i Abraham (3:6-9).
I Paulus nanguli ia ledo nianggataka nu manusia manggeni Kareba Belo, tapi ia nianggataka i Yesus mboto. Bo Kareba Belo nipatolelena ka toGalatia nidekei i Yesus mboto ka ia (Pasal 1-2). Poko nu pepatudukina ivei: kita ledo majadi manoa ri panggita nu Alatala lako ri pangoseakata atura-atura agama, tapi kita majadi manoa lako ri pomparasayata i Yesus (Pasal 3-4). Kaupuna i Paulus nompatuduki pokainggu masipato ka topomparasaya i Yesus, haitumo, natuvu nangoseaka dota nu Nosa Gasa (Pasal 5-6).
Isi nu Sura
Tesa Pantepuuna (1:1-10)
I Paulus mpuu-mpuu suro i Yesus (1:11-2:21)
Ia ledo nianggataka nu manusia majadi suro, tapi nianggataka i Kristus mboto. Kareba Belo nipatolelena ledo lako nte manusia, tapi nitarimana lako nte i Yesus Kristus.
Pepatuduki i Paulus ka to Galatia, notesaki kabelo rara nu Alatala (Pasal 3-4)
Kita najadi nanoa ri panggita nu Alatala sabana pomparasayata i Yesus, ledo sabana kita nangoseaka atura-atura agama.
Pepatora i Paulus ka toGalatia (5:1-6:10)
Ledo paraluu matundu nte atura agama, apa i Yesus nombakabasaka kita lako ri atura agama. Tapi nee aga mangoseaka dota rarata nadaa. Kita kana mangoseaka pekeniaka Nosa Gasa.
Petevai kaupuna (6:11-18)