Sura i Paulus Karanduana ka Topomparasaya ri Ngata
Korintus
Vamba nu Tesa
Ngata Korintus ngata mbaso ri propinsi Akhaya. I Paulus mboto tona paratama nompatolele Kareba Belo hamai (Suro-suro 18:1-17). Naliu i Paulus nompalaisi ngata Korintus bo napola hau ri ngata ntanina, nakavamo bara sako-ndua guru mpodava ri ngata Korintus. Niulira ledo nakana i Paulus najadi suro i Yesus bo ledo paraluu mekou nte pepatudukina. Niulira i Paulus ledo namala raparasaya apa nibalikina niana hau mompelioda toKorintus. Jadi nangepe lelena haitu, i Paulus nantudu i Titus manggeni tesana hau ri ngata Korintus. Tesa i Paulus haitu nangonteaka tona anu nompoara nturona najadi suro i Pue (2:3; 7:8-13).
Nanjilipa i Titus lako ri Korintus, nitesana ka i Paulus ivei: “Nadea topomparasaya ri ngata Korintus najeamo lako ri poviara nombasapuaka komiu, bo nalentoramo rarara manggita komiu. Tapi da naria sanu ira nompakakaa bagara, ledo nipokonora mekou nte komiu apa pangulira komiu ledo suro i Pue.”
Nangepe tesa i Titus, i Paulus notulisi sura hitu anu nabiasa niuli Sura i Paulus karanduana ka topomparasaya ri ngata Korintus. Riara sura hitu, i Paulus nombatesa pokarajaana nanggeni Kareba Belo (2:14-6:10). Nitesana muni pepotovena ka ira (6:11-13; 7:2-4, 13-16), bo kadamba nu rarana nangepe lelena najeamo ira lako ri poviara bara ipia (7:5-13). Naupu haitu, niperapina ala rapapolara mompasiromu doi petulungi ka topomparasaya napakasi ri bagia Yudea ala ane makava ia, doi haitu masadiamo rakenina hau ri bagia Yudea (Pasal 8-9). Naupu haitu, tesa i Paulus nangonteaka tona anu da nanjapuaka kuasana bo nturona najadi suro i Yesus (Pasal 10-13).
Isi nu Sura
Pantepuuna (1:1-11)
I Paulus ante todea topomparasaya ri ngata Korintus (1:12-7:16)
I Paulus nompakalanto berimba sampe nabali niana hau mompelioda toKorintus (1:12-2:13)
Pokarajaa i Paulus nanggeni Kareba Belo (2:14-6:10)
I Paulus nerapi toKorintus mosinggabelo mpanjili ante ia (6:11-7:16)
Doi petulungi rakeni ka topomparasaya napakasi ri bagia Yudea (Pasal 8-9)
I Paulus nanjaliku karona mboto, niulina ia mpuu-mpuu suro i Yesus, nionteakana tona nosapuaka nturona najadi suro (10:1-13:10)
Petabe kaupuna (13:11-13)