Sura i Paulus Paratama ka Topomparasaya ri Ngata
Korintus
Vamba nu Tesa
Sura hitu nitulisi i Paulus ka topomparasaya ri ngata Korintus. Ngata Korintus ngata mbaso ri propinsi Akhaya anu nikuasai pomarenta Magau Mbaso Roma. Sii-sii ngata haitu nambela negara Yunani. Nadea ngaya tona nonturo ri Korintus, apa Korintus mai ngata pogade.
Bara ipia i Paulus nonturo ri Korintus sampae santanga kasaena nompatolele Kareba Belo ka tona hamai (Suro-suro 18:1-11). Nadea toKorintus nomparasaya i Yesus tempo haitu. Naliu i Paulus nompalaisi ngata Korintus, nakavamo saito topomparasaya i Yesus anu napande nompatuduki Tesa nu Alatala, sangana i Apolos (Suro-suro 18:24-19:1). Ia nompatuduki bo nantulungi topomparasaya i Yesus ri ngata Korintus.
I Paulus notulisi sura hitu sabana nitarimana sura lako nte toKorintus nompekutana bara sako-ngaya. Bo niepena muni topomparasaya ri ngata Korintus nosipobali bo gaura ledo natumutoa. Naria muni guru-guru mpodava nakava ri ngata Korintus nangeva i Paulus bo nanguli i Paulus mai ledo suro i Yesus mpuu. Nipokonorapa i Apolos bo pakeni ntanina. Jadi i Paulus notulisi sura hitu mesanaka pompekutanara bo mompatuduki ira mombakabasaka pokainggu-pokainggu anu ledo masipato rapovia ntopomparasaya i Yesus.
Isi nu Sura
Pantepuuna (1:1-9)
Topomparasaya ri Korintus nosipobali (1:10-4:21)
Pepatuduki pokainggu nabelo ka tona njamboko (Pasal 5-7)
Pepatuduki kandea nipakande ka tupu-tupu ntanina (8:1-11:1)
Pokainggu masipato ka mombine riara kasiromu ntopomparasaya (11:2-16)
Mangande roti bo manginu uve anggur mombatora kamate i Yesus (11:17-34)
Pompakule lako ri Nosa Gasa nu Alatala bo pepotove (Pasal 12-14)
Tona namatemo rapakatuvu mpanjili (Pasal 15)
Doi rapasiromu rapakatu ka topomparasaya ri bagia Yudea (16:1-4)
Tesa Kaupuna (16:5-24)