Sunju Povia nu
Suro-suro i Pue Yesus
Vamba nu Tesa
Tesa Sunju Povia nu Suro-suro i Pue Yesus hitu sunju nu buku Kareba Belo Nitulisi i Lukas. Patuju i Lukas notulisi buku hitu ala mombatentei berimba topangoseaka i Yesus nompatolele Kareba Belo ante kuasa Nosa Gasa. Nipatolelera Kareba Belo ri ngata Yerusalem, ri njumangu bagia Yudea bo Samaria, sampe ri umba-umba ri dunia (Suro-suro 1:8).
I Lukas tona lako ri ngata Antiokhia ri bagia Samaria. Ia mboto nantuntuni i Paulus bara sakuya ngganina riara polipana. Sia sampe naria bara sako-nggani nitulisi tesa “kami”. Ia mboto naria nosanggani nte i Paulus ri kajadia-kajadia nitulisina ri ayat-ayat haitu: 16:10-17; 20:5-21:18; 27:1-28:16.
Riara buku hitu pokarajaa Nosa Gasa nu Alatala nitentei nompamula tempo Ia nakava nombakuasai topomparasaya i Yesus ri ngata Yerusalem ri Eo Pentakosta. Pura-pura kajadia nitulisi riara buku hitu nompopaisani ka kita Nosa Gasa nu Alatala bate-batena nanggeniaka topangoseaka i Yesus bo nompakaroso pomparasayara.
Tesa SURO-SURO hitu nibagi tatalu bagia: 1) Pompamulana Kareba Belo nipatolele ri ngata Yerusalem naliu i Yesus neore hau ri suruga. 2) Kareba Belo nipatolele ri ngata-ngata ntanina ri bagia Yudea bo Samaria. 3) Kareba Belo nipatolele ri ngata-ngata mbaso ri sinjori Tasi Tatanga sampe ri ngata Roma anu niponturo Magau Mbaso.
Isi nu Buku
Pompamulana agama Kristen (1:1-26)
Parenta kaupuna bo janji i Pue Yesus (1:1-11)
Sambei i Yudas (1:12-26)
Anu nipovia nu suro-suro ri ngata Yerusalem (2:1-8:3)
Anu nipovia nu suro-suro ri bagia Yudea bo Samaria (8:4-12:25)
Anu nipovia i Paulus (13:1-28:31)
Polipa paratama nompatolele Kareba Belo (13:1-14:28)
Polibu ri ngata Yerusalem (15:1-35)
Polipa karongganina nompatolele Kareba Belo (15:36-18:23)
Polipa katalu-ngganina nompatolele Kareba Belo (18:24-21:16)
Povia i Paulus ri ngata Yerusalem bo Kaisarea sampe nakava ri ngata Roma (21:17-28:31)