Yohanes i

Kareba Belo nitulisi

i Yohanes

Vamba nu Tesa

Buku hitu nitulisi i Yohanes, anaguru i Yesus anu nabiasa niuli riara buku hitu “anaguru nipotove i Yesus.” Ia mboto nanggita pura-pura kajadia nitesa riara Buku hitu.

Riara buku hitu i Yesus niuli “Tesa nu Alatala.” Iamo nisuro nu Alatala tumai ri dunia majadi manusia bo monturo ri tatanga manusia. Patuju nu buku hitu ala pura-pura topombaca tesa hitu mamala momparasaya i Yesus Ana nu Alatala, Magau Topepakasalama anu nijanji nu Alatala, bo ala rakavara katuvua nabelo sampe ri kasae-saena (20:31).

Pasal 2 sampe pasal 12 notesa pitu-ngaya tanda nabaraka nipovia i Yesus. Tanda-tanda haitu nompakalanto i Yesus mpuu-mpuu Magau Topepakasalama nakuasa. Nggani-nggani nitesa tanda nabaraka, nitesa muni pepatuduki i Pue Yesus ka todea. Patuju i Yesus novia tanda nabaraka haitu, nipakalanto riara pepatudukiNa. Nanggita tanda-tanda haitu, naria tona nomparasaya i Yesus bo najadi topangoseaka Ia. Tapi naria muni sanu nesapuaka bo ledo nomparasaya Ia. Nadea mpuu pakeni ntoYahudi nangeva Ia.

Ri pasal 13-17 naria tesa i Yesus ka anaguruNa bongi Ia nisaka. Ia nompatuduki ira bo nompakaroso rarara. Ri pasal 14-21 i Yesus nisaka, nitangara, nipatesi, bo natuvu mpanjili.

Kareba Belo nitulisi i Yohanes notesa katuvua nabelo sampe ri kasae-saena anu nompamula sii-sii ka tona nomparasaya i Yesus. Nadea porapa nipake ri buku hitu mompakalanto katuvua nabelo haitu bo posisanita ante i Yesus. Evamo, i Yesus nirapaka uve anu nombadekei katuvua, roti, reme, dala, topoevu nabelo, valaa anggur.

Isi nu Buku

Pompamulana (1:1-18)

I Yohanes Topediu bo anaguru i Yesus pamulana (1:19-51)

Pokarajaa i Yesus ri mata ntodea (Pasal 2-12)

Pepatuduki i Yesus ka ana-anaguruNa (Pasal 13-17)

I Yesus namate nipaku ri kayu salib bo natuvu mpanjili ri eo katataluna (Pasal 18-21)