Nufule enú
Súute
ŋɔ yɔɔ́ŋɔ́kɔ́
Bitéŋíti
1
1 Yaŋɔ́ Súute,
munyiɔnɔ mu *Yésus *Kilís,
mbá ya mɛ́ŋa tɔ́na onyíinyí u Sáak ;
yaŋɔ́ ɛ ŋa mɛ́ banɔ́ ɔɔ́ŋɛ́na nufule eenu,
banɔ́ eebe abá *Bandɔ́mɛsɛ́ ŋaá lɔ́ŋɔ́kɔ anyía núánɔ́ bámɔ́kɔ́na bááyɛ́ baacɔ.
U naŋa waá banɔ́ lénéke,
u banɔ́ tétényíki a asana ne Yésus Kilís.
2 Bandɔ́mɛsɛ́ á banɔ́ bɛ́cámáka mahana ekúlú ekime,
wá banɔ́ iinjiekine tɔ́na ekúlú ekime ne mbuumu ne nulénéne ɔ ɔhɔla.
A asana yí beékúnyi bɛsana bá bɛfala
3 Baláamɛ bá ɔtɛ́má,
ɛcaná cɛ ɔ banɔ́ ɔ́ɔ́ŋɔ́kɛ́na nufule ŋaá bá cɛ a mɛ nuakɛna buéŋí,
anyía yámɛ banɔ́ hémbulekine nyinohi anyɛ́ Bandɔ́mɛsɛ́ ŋaá basɔ́ nóhi basɔ́ bekime.
Yaátɛ́ asana i ŋeé mi bíékínyi o nuúnu ɔ́ɔ́ŋɔ,
anyía yámɛ banɔ́ ciékínyi ɔ ɔbɛ́kɛ́ndɛ́na ɔnua ɛcálɛ acɛ́ nu ŋa nɔ́ nua a asana ne olumitinine awɔ́ Bandɔ́mɛsɛ́ ŋe yiínjie bááyɛ́ baacɔ ekúlú ɔ́mɔtɛ́ e bikúlú bikime.
4 Yááŋa anyía bɛɛbɛ́ bɛ́ baacɔ ɔ bɛ́mɔtɛ́ ne meé bú oofokine e menjiŋé aanɔ́ ɛ ɛkatɛ́katɛ́.
Bí ŋeé kótímísi nyiékúnyi nyɛ́ yaála yí nuubo ayɛ́ Bandɔ́mɛsɛ́ ŋaá basɔ́ boosi.
Bá ŋa bɔ́ kɛla aáná anyía bébú tóŋgínyi baacɔ anyía uúbú olíhe ú ɛnjɔkɔ́nɔ́nɔ áŋa ɔmbányɛ.
Bá ŋa bɔ́ sáŋɔ́na anyía Yésus *Kilís áŋa bímuócí na yáásɔ́ Elékúŋúlu ne uusú Otéŋí a Waáŋá ;
feeké Bandɔ́mɛsɛ́ na maá sɔ́mbɔ́tɔ́na yáábɔ́ asana,
háyɛ yááŋa yɔɔ́ŋɔ́kɔ́nɔ́.
5 Ta yɛ́ cáŋa á bá anyía nua núá báka o omenyi bɔmbányɛ bɔmbányɛ bɛsana eébí,
ɛ ŋa mɛ́ nyɛmána wu ɔ banɔ́ bítéesi anyía Otéŋí a Waáŋ᪠ŋoó nóhi baacɔ bá bunɔŋɔ bú Islayɛ́l ekúlú ɔ́mɔtɛ́ e bikúlú bikime ɔ buɔ́lɛ́ a bunɔŋɔ bú Esíbit.
E elime eécí,
u ŋá kɛla anyía baacɔ bekime a bá tɛ ɔ́mɔ́ bɔ́ háya mɔŋɔlɛ́ nááyá é wéekune.
6 Ánɔ bɛ́tááka tɔ́na asana yí *bililé bɛ́ masɔ́ma a bɛ́mɔtɛ́ e bí ti ómo bíléníne nyilimíné nyɛ́ buáŋá anyɛ́ Bandɔ́mɛsɛ́ ŋeé biíbi iinjie,
bɛ́ ŋa bɛ́yúata nyíábɔ́ nyilimíné nyɛ́ buáŋá eényí.
Bandɔ́mɛsɛ́ ŋeé biíbi tétényi bɛɔ́tɔ́kɔ́kɔ́nɔ́ buúse bukime a haála hé ibíne noómi,
bɛ́ tátáka buɔ́sɛ́ bɔ́ nyɛkála a buáŋá.ª
7 Ánɔ bɛ́tááka tɔ́na asana yɛ́ bálɛ́ka cɛ́ na *Sɔ́tɔm na *Kɔmɔ́ɔlɛ na bálɛ́ka a cɛ́mɔtɛ́ a cɛ́ ŋaá bá a maabɔ́ maabána.
Baacɔ bá bálɛ́ka eébé ŋa bɔ́ kɛ́láka bɛsana a bɛɛbɛ́ i iŋetí ci bililé bɛ́ masɔ́ma eébí.
Bé ŋe bú líhéke olíhe ú tusɔmɔ ɔ ɔkɔɔ́háma ɔ ɔhɛŋɛna nyiketi nyɛ́ Bandɔ́mɛsɛ́ a aháŋá ne nyilíhe nyɛ́ baacɔ.
Baacɔ eébé ŋa bɔ́ lɔ́kɔ́ma muuyé o oocó noómi ewú ú ti ŋé nyíme ta buɔ́sɛ́.
Asana eéyé áŋa taaká ci nyiókísi a baacɔ bekime.ª
8 Aáná baacɔ e bé ŋe bú óófókíne aanɔ́ ɛ ɛkatɛ́katɛ́ ŋa bɔ́ kɛla tɔ́na nyɛnamá nyɛ́ bɛɛbɛ́ bɛ́ bɛsana eébí háyɛ baacɔ bá bálɛ́ka eécí.
Bibébékénú bɛ́ ɛbɛ́táá bí cííbú ɛtɛ́má ŋeé beébe nyɛkɛtɛna ɔ ɔkɛla bɛsana bɛ́ ɛnjɔkɔ́nɔ́nɔ ne ciibú cɛɛ́tɔ.
Bá ŋa bɔ́ bábɛ́na *Butéŋí bɔ́ Bandɔ́mɛsɛ́,
bá ɔ́ɔ́mbɔ́náka bililé bí nuúmi bɛ́ Ɔmuaná.
9 Yiíye anyía te mutéŋínyi bililé bɛ́ masɔ́ma a muáŋá Mikayɛ́lª bɛ́muátá tɛ ɔ́mɔ kɛla aáná,
te ekúlú ayɛ́ bá ŋa bɔ́ bá bébú súŋgunyinyi,
bá hɔ́kɔ́nɔnɔ omime ú Moyísª ne muúmu na Musɔ́mɛ́na,
mu tɛ ɔ́mɔ bɛ́káná o wuúci aahɛnɛna yaahɔ́ a nyɛkála ;
mbá mu ŋeé wuúci laana hú mɔsɛ :
« Bandɔ́mɛsɛ́ ɔ́ɔ bɔ́nɔ́sɛ́á ! »*
10 Mbá baacɔ eébé ŋa bɔ́ ɔ́ɔ́mbɔ́na bɛnyɛ́ma ebí bé ti ŋe bú ményi ;
biíbi bé ŋe bú ményi ɔmuaná na ɔmuaná háyɛ ɛnyama a cɛ́ tɛ a bá ne injiŋé a bɛɛtɔ́.
Aáná bé ké bú nyímúkúne hú táákɔ.
11 Ééʼ,
mahana ne beébe anyía bá ŋa bɔ́ látɛ́na bɛbɔbɔ bɛ́ Káyɛn;
ª bé mé ke bú óofokine a bɔɔbɛ́ abɔ́ Balaam ŋaa kɛ́láka a asana yɛ́ mɔɔnyɛ́ ma ɔhɔ́máka a bɛfala.
ª Bá ŋa bɔ́ kɛ́lɛna Bandɔ́mɛsɛ́ aatɔ́ ɔnata háyɛ Kolɛ́ɛ;
ª yaátɛ́ asana bé ŋe bú weékúne tɔ́na háyɛ wuúci.
12 Ɛ́ɛ,
baacɔ eébé á bɔ́ŋa bɛɔ́mɔ́ a maŋanda amá nu ŋa nɔ́ bánda.
Aáná bá ŋa bɔ́ nyíá,
bá múákɛna buéŋí tɛ́ka na aatɔ́ ɔlama,
bá tɛ bɛ́táá bɔsɔ́ɔ́kɔ́.
Bá ŋa bɔ́ hɔ́á nɔbɔ́lá e nú ŋe híŋílíene,
nɔ tɛ́ naa ;
hú ehúne yí ŋe húne.
Bá bɔ́ŋa háyɛ bɛtɔ́kɔ́ a bɛ́ tɛ á bá na bɛtámá te ekúlú ayɛ́ bá nyɛmána ɔkátáka bɛtámá.
Bá bɔ́ŋa háyɛ bɛtɔ́kɔ́ a bɛlɔbákánɔ́ a bɛkaŋá,
biíbi biwéékúnénú buúse bukime.
13 Baacɔ eébé ŋa bɔ́ kɛla bɛɛbɛ́ bɛ́ bɛsana bɛ́ aatɔ́ ɔlama,
bɛ́ lɛcakana háyɛ bihíŋe abɛ́ bɛahɔ́ bɛ́ nuɔmɔ́ nɔ́ makɛ́lɛ́ naŋa núá yaáhakɛna a asálá.
Bá bɔ́ŋa háyɛ tunjoti e tú ŋe húle endéŋéle haála hekime.
Bandɔ́mɛsɛ́ ŋeé beébe tabɔ́nákɛ́ná haála hé olimekine ekúlú ekime i ibíne ci fííʼ a cɛ a hɔ́la.
14 A asana na baacɔ eébé Ɛnɔkª,
ɛndaásɛ cɛ Átam,
ŋaá cáŋa ɔkɔɔna buáyá ɔsɛ :
« Lɛca,
Otéŋí a Waáŋá ooci kokóokó ne cííyí ɛlɔŋɔ cí bililé bɛ́ masɔ́ma e bifúúménénú biéŋí tɛ́ka na ɔmbana
15 o okokélísíki baacɔ bekime bá ɔmɛsɛ́.
U kɔ́ɔ́ bɔnɔsɛ́áka bɛɛbɛ́ bɛ́ baacɔ na a asana na bɛɛbɛ́ bɛ́ bɛsana bikime ebí bé ŋe bú wuúci kɛ́lákɛ́na,
na a asana na masálɔ́ mekime,
na bɛahɔ́ ebí bé ŋe bú wuúci túméke. »ª
16 Baacɔ eébé naŋa bá tɛ́ abɔ́ lɔ́kɔ́ma bɔmbányɛ e cííbu ɛtɛ́má noómi ta buɔ́sɛ́ ;
bé ŋe bú bícúcúle ekúlú ekime,
bé líhéke háyɛ bú ŋeé beébe bíléníne.
Bá ŋa bɔ́ táŋa na bumálá bukime,
bé bísúékíne baacɔ na bɛmbányɛ bí mehúnyi o o beébe nyɛ́ána.
Súute ŋeé kíndísi belumitinine
17 Baláamɛ bá ɔtɛ́má,
a yáánɔ́ aháŋá,
ánɔ bɛ́tááka bɛsana abɛ́ *baacɔ bá ɛndɔ́ma bé uusú Otéŋí a Waáŋá Yésus *Kilís ŋa bɔ́ cáŋa ɔ kɔ́ɔnaka.
18 Bá ŋa bɔ́ kɔ́ɔ́náka báyɛ :
« A nyɛmana nyɛ́ ɔmɛsɛ́,
baacɔ a bɔ́mɔtɛ́ ká bɔ́ banɔ́ cɛ́cáka ;
bé líhéke háyɛ bú ŋeé beébe bíléníne. »
19 Íbeébe ɛ naŋa bábɔ́ sálɔ́tɔ́kɔ́na baacɔ.
Bá bɔ́ŋa ne ibíkéti cɛ baacɔ bá ɔmɛsɛ́ ooci ;
bá tɛ́ abɔ́ bá ne *Efúúménénú yí Elilé.
20 Aá banɔ́,
baláamɛ bá ɔtɛ́má,
ánɔ cɔba ne buúse o olíhe e úúnú olumitinine noómi ;
wáŋa ofúúménénú ɔ ɔhɔla.
Ánɔ bɛ́cɔ́kɔ́lɔ́kɛ́na Bandɔ́mɛsɛ́ na makɛ́nda me Efúúménénú yí Elilé.
21 Ánɔ cɔba ne buúse o olimine e nulénéne noómi anɔ́ Bandɔ́mɛsɛ́ ŋaá banɔ́ léne ;
nɔ tátáka háyɛ uusú Otéŋí a Waáŋá Yésus Kilís káá basɔ́ bɛ́cáma mahana,
yɔ́ basɔ́ iínjie yɔɔ́sɔɔ́sɔ yí olíhe yí ekúlú ekime.
22 Ɔ bɔsɔ́ɔ́kɔ́ a bá tɛ ábɔ́ bá bɔɔ́nɛ́nánɔ́ o olumitinine noómi,
énu beébe bɛ́cámáka mahana.ª
23 Ɔ bɔsɔ́ɔ́kɔ́ ɔ bɔ́mɔtɛ́,
énu beébe sɔ́mɔ́kɔ o oocó ú nyɛkála noómi ;
ánɔ bɛ́cámáka mahana bɔsɔ́ɔ́kɔ́ ɔ bɔ́mɔtɛ́ bé etémbí tɔ́na,
mbá nu bíkékényíki ɔlatana na bíábɔ́ bɛsana bikime,
te hú bíábɔ́ bɛlaŋa,
anyía bɛ́áŋa bɛ́tɔ́bɔ́kɔ́nɔ́ ne bihíŋe bɛ́ bɛsana e bí ŋeé beébe hámɛ́na ɛ ɛtɛ́má.
Túé nyemíki Bandɔ́mɛsɛ́
24 Túé nyemíki Ooci a wáŋa na makɛ́nda ma ɔ banɔ́ tétényíki anyía nu ti kúféténe buúse bukime,
wuúci wáŋa wu ɔkɔɔ́ banɔ́ hámánána ne obíléne a núáyɛ́ nuúmi noómi tɛ́ka na hɛkɔma.
25 Túé nyemíki Bandɔ́mɛsɛ́ bímuócí anyía u ŋaá basɔ́ nóhí e elime ci Yésus *Kilís,
uusú Otéŋí a Waáŋá ;
nááyá ne nuúmi,
na buáŋá,
na makɛ́nda,
ne butéŋí bɛ́ á nyɛmána ɔbámɔ́kɔ́na o otúme e nyitúme nyí bikúlú bikime ɔ ɔkɔɔ́háma na aámbáya ne bikúlú bikime,
híáná yááŋa.