Nufule nɔ́ ɔkɔɔ́láta anɔ́
Sáaŋ
ŋɔ yɔɔ́ŋɔ́kɔ́
Bitéŋíti
1
1 Yaŋɔ́,
*mukendisi belumitinine *Kilís,
ª ɛ ŋa mɛ́ ɔ́ɔ́ŋɛ́na Káyus nufule eenu.
Wáŋa aláamɛ yɛ́ ɔtɛ́má aá taaká noómi.
2 Hiála,
i ŋeé mi léne anyía bíɔ́wɔ bɛsana bikime á bámɔ́kɔ́na bɛmbányɛ,
mbá á bámɔ́kɔ́na tɔ́na ɔmbányɛ i imehú háyɛ ɔ ɔ́ŋa ɔmbányɛ e elilé.
Nyɛbɛ́kɛ́lɛ́na nyɛ́ Káyus
3 Ɛ náŋa yámɛ bá háyɛ nyitíne nyí bilúŋe ekúlú eyí belumitinine a bɔ́mɔtɛ́ náŋa bábɔ́ fáákɔ́na aaha,
bé mi bíkétíkínyi anyána ɔ naŋa ɔɔ́ látákɛ́na bɛsana aá taaká.
Yááŋa anyía ɔ naŋa oó líhéke olíhe ú taaká.
4 Yaátɛ́ asana ya mɛ́ŋa ne obíléne weéŋí ɔ ɔhɔla,
ekúlú ayɛ́ ɛ ŋa mɛ́ lɔ́kɔ́ma anyía báámɛ baáná ŋeé líhe olíhe ú taaká.
5 Hiála,
ɔ naŋa oó nyióyísíkínyi *bikotí bí mulumitinine *Kilís ekúlú ayɛ́ ɔ naŋa ɔɔ́ wɔɔ́lɔ́kɔ belumitinine bé etémbí te eebe a bá bɔ́ŋa bekenyí oówo eé buúse.
6 Bé ŋe bú o lémbiki aaha ɛ ɛkatɛ́katɛ́ ci hiɔ́bɔ hí belumitinine Kilís anyía o ŋoó beébe léne buéŋí.
Ɛ ŋɔ mɛ́ ɔ bɛ́cɔ́kɔ́lɛ́na anyía ɔ́ɔ cɔbá ne buúse o o búle beébe ɔɔ́lɔ́ a asana ne úúbú ɔkanda a nyɛnamá e nyí ŋé bíléníne *Bandɔ́mɛsɛ́.
7 Yááŋa anyía bá ŋa bɔ́ kánda ɔkanda oócí a asana ne buólí bú Otéŋí a Waáŋá *Yésus Kilís,
bá tɛ ŋá bɔ́ báta ta bɔkɔ né be-ti-lumítíníne.
8 Ɛ́ɛhɛ́ basɔ́ belumitinine túásɔ́ nyɛ́mana tú ɔwɔɔ́lɔ́kɔ nyɛnamá nyɛ́ baacɔ eényí,
ananyía tuásɔ́ látána ne beébe ɔ ɔnyiɔ taaká ci buólí eébú.
9 Yaŋɔ́ ɛ ŋa mɛ́ ɔ́ɔ́ŋɔ́kɛ́na hiɔ́bɔ hí belumitinine nufule ;
mbá Tiotɛ́lɛ́f tɛ ŋá yáamba ɔlɔ́kɔ́ma bɔkɔ abɔ́ ɛ́ ŋa mɛ́ kɔɔna anyía u ŋeé léne buéŋí obíhíite háyɛ mukendisi bɛsana bikime.
10 Ekúlú ayɛ́ ɛ ká mɛ́ faaya aáhá náánɔ́,
ɛ ká mɛ́ banɔ́ hémbulekine bɛɛbɛ́ bɛ́ bɛsana bikime abɛ́ ú ŋa kɛ́láka,
na bɛfala bikime abɛ́ u ŋaá mɛ sɔ́mbákɛ́ná.
U tɛ ŋɔ́ lɔ́bɔ hí a nyɛkɛla eényí,
u naŋa u tɛ á káha belumitinine Kilís ;
aáná baacɔ a bɔ́mɔtɛ́ a bá ŋa bɔ́ áamba o beébe káha u ŋeé beébe léke,
mbá u beébe ɔ́ɔ́ŋɔ́kɛ́na aá hiɔ́bɔ hí belumitinine.
11 Aláamɛ,
eti kétíkínyínyi nyɛbɛ́kɛ́lɛ́na a nyɛɛbɛ́,
mbá látákɛ́na a nyɛmbányɛ,
anyía ɔɔcɔ awɔ́ u náŋa waá kɛ́laka bɛmbányɛ bɛ́ bɛsana áŋa ɔɔ́nɔ́ u Bandɔ́mɛsɛ́.
Mbá ɔɔcɔ awɔ́ u náŋa waá kɛ́laka bɛɛbɛ́ bɛ́ bɛsana ti ŋé ményi Bandɔ́mɛsɛ́.
12 A aháŋá ne Temetilíyus,
baacɔ bekime ŋe bú wuúci lémbi ;
bɛsana bɛ́ Bandɔ́mɛsɛ́ ebí u ŋé húlinyi baacɔ ŋo tóŋínyi tɔ́na anyía nyíáyɛ́ nyɛbɛ́kɛ́lɛ́na áŋa nyɛmbányɛ.
Ta basɔ́ tɔ́na tu ŋe sú wuúci lémbi,
o ŋoó menyi anyía tu ŋa sɔ́ kɔɔna taaká.
13 Ya mɛ́ŋa na bɛsana biéŋí bɛ́ ɔ kuɔŋɔ́ láakɛna,
mbá i ti ŋé mi léne o biíbi ɔ́ɔ́ŋɔ́kɔ e nufule.
14 I ŋeé mi bíkéti ɔkɔfáaya nɔ́ɔ́wɔ hikúlúkúlú ɔ ɔkɔɔ́ kuɔŋɔ́ lɛca ;
aaha tu ká sɔ́ táŋatáŋa bɔmbányɛ,
tu lɛcákána.
15 Bandɔ́mɛsɛ́ ó wiínjie mbuumu ɔ ɔtɛ́má.
Bɔlɔ́ɔwɔ bekime bá aaha ŋe bú o téŋi.
Téŋíki bíásɔ́ bikendinyi ɔmɔtɛ́ ɔmɔtɛ́.