Olíhe ú ciíbe cɛ nyɛtɔ́nɔ́
3
1 Híáná tɔ́na,
banɔ́ beénjú bá ɔtɔ́nɔ́,
hú naányɛ́ á lɔ́kɔ́mákɛ́na ɔnɔ́mɛ u bɛ́muátá.
Wá bámɔ́kɔ́na na ambányɛ yɛ́ nyɛbɛ́kɛ́lɛ́na a nyɛnamá anyɛ́ anyía,
ta u tɛ ŋáá táŋɛ́ta,
wé bísúétíne ɔnɔ́mɛ,
ɔnɔ́mɛ oócí yó lumitinine Bɛsana bɛ́ Bandɔ́mɛsɛ́,
mbɔ́kɔ wáŋa mu-ti-lumitinine.
2 Báánɔ́ banɔ́mɛ bá bɛ́muátá ká bɔ́ lɛ́caka na anyána nyíánɔ́ nyɛbɛ́kɛ́lɛ́na áŋa nyifúúménénú na anyána nu ŋe nú beébe lɔ́kɔ́mɛ́na.
3 Nua nɔ́ŋa beénjú bá ɔtɔ́nɔ́.
Buátɛ́ bɔkɔ,
nɔtɛ aambáka nyɛnɔ́kɔ́ nyɛ́ ciɔ́sɛɔ́sɛ́ ;
nyɛ́áŋa anyía :
Ne tuhúnyi a tɔnuákánɔ́,
na bɛalɔ́ bí kóolo,
na bɛmbányɛ́kɛ́ bɛ́ bɛlaŋa.
4 Mbá ánɔ aambáka nyɛnɔ́kɔ́ nyɛ́ ɔtɛ́má ;
nyiínyi nyɛ́ tɛ ŋá mána,
anyía nyí ŋeé húle e cíínú ɛtɛ́má noómi a cɛ́áŋa mbuumu,
ciíci isiotóto.
Nyɛnɔ́kɔ́ eényí tɛ ŋá cáŋía ta buɔ́sɛ́,
nyɛ́áŋa ambányɛ yɛ́ bɔkɔ e yí ŋeé bíléníne Bandɔ́mɛsɛ́ ɔ ɔhɔla bɔkɔ bukime.
5 Híáná bifúúménénú bí beénjú bɛ́ ɔtɔ́nɔ́ bɛ́ buáyá ŋaá bá na nyɛnɔ́kɔ́ eényí,
bá ŋa bɔ́ hákɛ́na mɔŋɔlɛ́ ná Bandɔ́mɛsɛ́,
bá lɔ́kɔ́mákɛ́na báábɔ́ banɔ́mɛ bá bɛ́muátá.
6 Híáná Sáala,
oónyí u *Abɛ́laham,
ŋaá bámɔ́kɔ́nɛ́na.
U ŋaá lɔ́kɔ́mákɛ́na ɔnɔ́mɛ,
u wuúci lɔ́ŋɔ́kɔ anyía « Taatá ».
ª Mbɔ́kɔ nu ŋa nɔ́ kɛ́la bɛmbányɛ bɛ́ bɛsana,
tɔ́na manɔ́ŋɔ́ tɛ ŋáa banɔ́ sɔ́mbásɔ́mba,
nua nɔ́ŋa háyɛ bááyɛ́ babɔ́la aámbáya.
7 Banɔ́ tɔ́na banɔ́mɛ,
hú naányɛ́ e líhéke ne uuyé oónyí,
u menyukune anyía beénjú ŋe tényí ábɔ́ kása.
Énu beébe kékéke anyía bá ŋa bɔ́ nyɛ́mána bá ɔbɔ́ŋɔ olíhe awɔ́ Bandɔ́mɛsɛ́ ŋé yíinjie baacɔ ɔlɔŋɔ na banɔ́.
Ánɔ kɛláka aáná,
mbá ta bɔkɔ tɛ káá bɛ́kɛ́ŋɛ́lɛ́ána e úúnú ɔbɛ́cɔ́kɔ́lɛ́na.
Belumitinine ká bɔ́ lɔ́kɔ́máka muuyé
8 Ɛ ŋaá mɛ aamba obíóndísínyi ɔ banɔ́ wɔɔ́ŋɛ́na anyía ánɔ bámɔ́kɔ́nɛ́na na nyɛbɛ́táá nyɛ́mɔtɛ́,
ne nulénéne númɔtɛ́,
énu lénékéne banɔ́ na banɔ́ anyía nua nɔ́ŋa benyíinyí,
ánɔ bá tɔ́na na ɔtɛ́má ú mahana,
ne nyibílóosi nyɛ́ ɛtɛ́má.
9 Nuti hélúmúkúnyínyi bɔɔbɛ́ a bɔɔbɛ́,
mbá ta bɔsálɔ́ a bɔsálɔ́.
Nu ŋa nɔ́ nyɛmána nú ɔbataka yáaŋa Bandɔ́mɛsɛ́ anyía wá sáyábákɛ́na baacɔ a bá ŋa bɔ́ banɔ́ kɛla bɔɔbɛ́ ;
a asana eéyé Bandɔ́mɛsɛ́ ŋaá banɔ́ lɔ́ŋɔ́kɔ,
ananyía mbá wá banɔ́ sáyábákɛ́na háyɛ u ŋaá banɔ́ bɛ́tanɛna.
10 Yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía :
« Ɔɔcɔ ewú u ŋeé léne olíhe na ambányɛ yí olíhe na mɔɔ́sɛ́ me obíléne,
wé bíkékényíki anyía u ti búle táŋa aabɛ́ yɛ́ ɔtáŋa,
u tɛ sɔ́mbáka bɛfala ;
11 wá nyɛána ɔkɛla maabɛ́,
mbá wé búle kɛ́la bɛmbányɛ bɛ́ bɛsana,
u bíínjíékíne ɔwaamba mbuumu ekúlú ekime,
12 ananyía Bandɔ́mɛsɛ́ ŋa lɔ́kɔ́ma ɛbɛ́cɔ́kɔ́lɛ́na cɛ́ bɛtálɛ́mánánɔ́ bɛ́ baacɔ ;
cááyɛ́ eése tɛ ŋá hátɔna náábɔ́,
mbá Otéŋí a Waáŋá ŋeé túme bakɛla maabɛ́ elime. »*
13 Aányɛ́ wáŋa na makɛ́nda ma ɔ banɔ́ tékeseke mbɔ́kɔ nua núáŋa bebíínjíénú ɔ ɔkɛla bɛmbányɛ bɛ́ bɛsana e ?
14 Mbɔ́kɔ yɛ́ ŋáá háma anyía núánɔ́ lɔ́kɔ́máka muuyé asana na yáánɔ́ ambányɛ yɛ́ nyɛbɛ́kɛ́lɛ́na,
yááŋa ambányɛ yɛ́ asana.
Buátɛ́ bɔkɔ,
nuti líkíméke baacɔ ;
cíínú injiŋé tí nyimukune.
15 Mbá énu nyemíkiª e cíínú ɛtɛ́má noómi Kilís,
Otéŋí a Waáŋá.
Ánɔ bámɔ́kɔ́na ekúlú ekime hoóhi na ɔbɛ́kámáka baacɔ bekime a bá ŋa bɔ́ banɔ́ bícónyi a asana na mɔŋɔlɛ́ amá nua nɔ́ŋa ne meéme.
16 Ekúlú eyí nu ŋe nú beébe hembuline mɔŋɔlɛ́ eémé,
ánɔ kɛ́láka ne osiotóto yɛ́ ɔtɛ́má,
nu beébe kékéke ;
túánɔ́ tɔcɔɔ́cɔ́ tɔ́ ɛtɛ́má tɛ́ banɔ́ kákálɛ́na,
ananyía baacɔ a bá ŋa bɔ́ banɔ́ óóto,
bá bábákɛ́na yáánɔ́ ambányɛ yɛ́ nyɛbɛ́kɛ́lɛ́na e nyimónjóló ne *Kilís ábɔ́ lɔ́kɔ́máka aatɔ́ ɔlama.
17 Yááŋa ambányɛ anyía ɔɔcɔ á lɔ́kɔ́máka muuyé a bɔmbányɛ abɔ́ u ŋaá kɛ́la,
mbɔ́kɔ bú ŋeé bíléníne Bandɔ́mɛsɛ́,
ɔ ɔhɔla anyía wá lɔ́kɔ́máka muuyé a asana na bɛɛbɛ́ bɛ́ bɛsana abɛ́ u ŋá kɛla.
18 Yááŋa anyía,
Kilís bɛ́muátá ŋeé wé ekúlú ɔ́mɔtɛ́ e bikúlú bikime a asana na maabɛ́ ma baacɔ ;
wuúci atálɛ́mánánɔ́ yɛ́ ɔɔcɔ u ŋe keé wééné a yáánɔ́ asana,
banɔ́ bakɛla maabɛ́,
ɔ ɔkɛla anyía wá banɔ́ª súétékéne ná Bandɔ́mɛsɛ́.
Bé ŋeé wuúci ɔ́ɔ́nɔ owé háyɛ ɔɔcɔ okime,
yɔ́ háányua o owé a makɛ́nda me Efúúménénú yí Elilé.
19 A makɛ́nda mé Elilé eéyé,
u ŋe keé húlíkínyi te bililé a bɛ́ á báka bɛfɔ́kákɛ́nánɔ́ a bunɔŋɔ bú biwéewé Ambányɛ yɛ́ Ɛsɔ́ma.
20 Yááŋa anyía,
bililé bɛ́ baacɔ eébí ŋaá cáŋa ɔkɛlakɛna Bandɔ́mɛsɛ́ aatɔ́ ɔnata buáyá,
ekúlú ayɛ́ u ŋaá bá we yeéhíkínyínyi,
u beébe tátáka ɔ mɔɔ́sɛ́ amá Nɔ́a ŋaá bá waá túáka hikóló.
Hikóló eéhí hɛ́ ŋaa kɛlá anyía hú baacɔ bánámányɛ́ ɔ́ nɔhɔ́kɔ o owé ú menyífé.
21 Menyífé eémé ŋaá bá hibílícínyínyí hí *obíótíne awɔ́ u ŋaá banɔ́ nohi tɔ́na aámbáya.
ª Obíótíne oócí tɛ ŋá sua bɔ sua bihíŋe bí elime cɛ cɛɛ́tɔ ;
mbá wáŋa nyibíínjie anyɛ́ ɔɔcɔ ŋé bíínjie ná Bandɔ́mɛsɛ́ ne efúúménénú yɛ́ hɛcɔɔ́cɔ́ hɛ́ ɔtɛ́má a asana eyí Yésus Kilís ŋaá háányúá e biwéewé.
22 Yésus oócí ŋaá báátáka,
yɔ́ hálɔ́mɔ́na ɔ Ɔmuaná.
Wáŋa limine a aháŋá yɛ́ ɔɔbɔ́ ú manɔ́mɛ ú Bandɔ́mɛsɛ́ ;
hɔ́á ú ŋee téŋínyi ne *bililé bɛ́ masɔ́ma,
ne metéŋí,
ne bililé bɛ́ makɛ́nda bí etémbí bikime áyá.