Yɔɔ́sɔɔ́sɔ yí olíhe
4
1 Ɛ́ɛhɛ́,
háyɛ *Kilís ŋaá lɔ́kɔ́máká muuyé a ciayɛ́ cɛɛ́tɔ,
ª banɔ́ tɔ́na ánɔ hákɛ́na a bíánɔ́ bɛɛtɔ́ anyía nu ká nɔ́ lɔ́kɔ́máka muuyé.
Yááŋa anyía,
ɔɔcɔ okime awɔ́ ú maa lɔ́kɔ́máka muuyé aáyá a cɛɛ́tɔ tɛ ŋá háná á kɛ́la bɔɔbɛ́ buúse bukime.
2 Yááŋa anyía,
ɔ mɔɔ́sɛ́ e me meé wuúci lɔbɛna anyía wé líhéke ɔ ɔmɛsɛ́,
wé líhéke háyɛ bú ŋeé bíléníne Bandɔ́mɛsɛ́,
tɛ́ cáŋa háyɛ olíhe awɔ́ ú naŋa wé bílénékíne baacɔ bá ɔmɛsɛ́.
3 Yááŋa anyía,
nú me nú húliki yáánɔ́ ekúlú yeéŋí o olíhe háyɛ be-ti-menyí Bandɔ́mɛsɛ́.
Nu ŋa nɔ́ bá nuanɔ́ kɛ́laka bɛsana a bɛɛbɛ́ a bɛ́ ŋaá bá bɛ́ á banɔ́ hámɔ́kɔ́nɛ́na ɛ ɛtɛ́má :
Na ɔmúána meluku,
na aabɛ́ yɛ́ ɔnyíá,
ne ohíólo meluku,
ne onyemi bɛbɔ́kɔ́bɔ́kɔ bí bunyímé.
4 Mbá aámbáya,
be-ti-menyí Bandɔ́mɛsɛ́ eébé á búáŋa ɔ ɔ banɔ́ kéké buéŋí anyía nu tɛ ŋá háná anɔ́ kɛ́la bɛsana bɛ́ mɔnyɔ́kɔ́lɔ́ eébí ɔlɔŋɔ ne beébe mbá,
bá ŋa bɔ́ banɔ́ óóto,
bá banɔ́ ɔɔ́mbɔ́náka.
5 Mbá,
asana ɔ́mɔtɛ́,
bá ká bɔ́ bɛ́kámáka a bɛɛbɛ́ bɛ́ bɛsana eébí buɔ́sɛ́ a búmɔtɛ́ eé buúse bɔ́ Bandɔ́mɛsɛ́,
anyía wáŋa hoóhi na ɔsɔ́mbɔ́tɔ́kɔ́nɛ́na na bɔɔ́sɔ ne bewéékúnénú bɛsana.
6 Ɛ́ɛhɛ́ bé ŋgeé húlíkinyi tɔ́na te biwéewé Ambányɛ yɛ́ Ɛsɔ́ma ananyía bébú líhéke ekúlú ekime háyɛ Bandɔ́mɛsɛ́ ŋeé léne a makɛ́nda me *Efúúménénú yí Elilé,
ta yɛ́ cáŋa á bá anyía u ŋeé beébe kélísíkí buáyá ɔ ɔmɛsɛ́ ooci háyɛ u ŋeé kélísi baacɔ bekime bá ɔmɛsɛ́.
7 Nyɛmana nyɛ́ ɔmɛsɛ́ a yáaŋa hoóhi.
Ánɔ bámɔ́kɔ́na aná ne injiŋé a bɛɛtɔ́,
nɔtɛ hɛ́táka hiiné ananyía nu ŋa nɔ́ nyɛ́mána nu o búle bɛ́cɔ́kɔ́lɛ́na Bandɔ́mɛsɛ́.
8 Asana yí buúsebuúse ayɛ́ núánɔ́ nyɛ́mána nú omenyi áŋa anyía énu lénékéne buéŋí banɔ́ na banɔ́,
anyía a núánɔ́ nulénéne noómi maabɛ́ meéŋí tɛ ŋáá lɛ́cana.ª
9 Ánɔ káháka baacɔ bɔmbányɛ,
nuti bícúcúlékíne bɔsɔ́ɔ́kɔ́ a bá ŋa bɔ́ faáya náánɔ́.
10 Bandɔ́mɛsɛ́ ŋoó boo buéŋí.
U ŋoó bóosi ɔɔcɔ okime,
hú naányɛ́ háyɛ u ŋeé léne oboosi.
Háyɛ bɛmbányɛ bí bekendisi yaála yí nuubo yɛ́ Bandɔ́mɛsɛ́,
ánɔ ɔɔ́lɔ́kɔ bɔsɔ́ɔ́kɔ́ na yaála yí nuubo eéyí.
11 Mbɔ́kɔ Bandɔ́mɛsɛ́ ŋe yiínjíe ɔɔcɔ aá banɔ́ makɛ́nda me ohulikinyi bɔsɔ́ɔ́kɔ́ bɛsana,
wé beébe hulíkínyi hú bɛsana bɛ́ Bandɔ́mɛsɛ́.
Mbɔ́kɔ makɛ́nda ma ɔnyiɔkɛna bɔsɔ́ɔ́kɔ́ buólí,
wé beébe nyiɔ́kɛ́na a makɛ́nda amá Bandɔ́mɛsɛ́ ŋeé wuúci iínjie ananyía,
a bɛsana bikime baacɔ ébú nyémíki Bandɔ́mɛsɛ́,
bá hɔ́lákɛ́na ne Yésus Kilís.
Wuúci wáŋa ne nuúmi na makɛ́nda ekúlú ekime.
*Híáná yááŋa.
12 Baláamɛ bá ɔtɛ́má,
mɔɔhɔ amá nu ŋa nɔ́ bɛ́nyíá tɛ banɔ́ kékísi,
anyía tɛ́ cáŋa asana e yikenyí yááŋa,
13 mbá énu bílénéke aná anyía nu ŋe nú hiíte nuafa i indekese ci Kilís ananyía,
ekúlú ayɛ́ núáyɛ́ nuúmi kéé bítóŋínyi a baacɔ,
nu ká nɔ́ bámɔ́kɔ́na ne obíléne onyíóyókónú hú mbiɔ́kɛ e cíínú ɛtɛ́má noómi.
14 Yááŋa ambányɛ yɛ́ asana mbɔ́kɔ baacɔ ŋa bɔ́ banɔ́ ɔɔ́mbɔ́na anyía nua nɔ́ŋa baacɔ bé Kilís,
ananyía Elilé yí nuúmi,
Elilé yɛ́ Bandɔ́mɛsɛ́,
áŋa náánɔ́.
15 Baláamɛ,
bú tɛ á bá bɔmbányɛ anyía ɔɔcɔ aá banɔ́ é hiíteke indekese anyía u ŋɔ́ yɔ́ɔ́nɔ ɔɔcɔ,
ta anyía u ŋe yeébe bɔkɔ,
ta anyía u ŋgó yoófine a bɛsana e bí ti ŋée wuúci lɛca,
ta anyía tɔ́na u ŋaá kɛla aabɛ́ yɛ́ asana yí etémbí.
Eéʼeé !
16 Mbá,
búáŋa bɔmbányɛ buéŋí anyía ɔɔcɔ é hiíteke indekese anyía wáŋa kilísíten.
Ekúlú eyí u hiíte indekese eécí,
u tɛ ɔ́mɔ́ nyɛmána wu ɔlɔ́kɔ́máka aatɔ́ ɔlama mbá,
wé nyemíki bu nyemiki Bandɔ́mɛsɛ́ a asana ne nyiínyi nyí Kilís.
17 Yááŋa anyía ekúlú má kaá háma ayɛ́ Bandɔ́mɛsɛ́ yɔ́ cɔba o okélísíki baacɔ,
mbá yɔ́ cɔ́ba o otúme a makɔlɔ́kɔ́lɔ́ baacɔ bá ciayɛ́ ciíbe.
Kokóokó !
Mbɔ́kɔ náásɔ́,
bááyɛ́ baacɔ,
nyɛkála á nyɛmána nyí otúmíne,
anyána yɛ́ káá bá aná na bɔsɔ́ɔ́kɔ́ a bá tɛ ŋá bɔ́ lɔ́kɔ́mɛ́na Ambányɛ yɛ́ Ɛsɔ́ma yɛ́ Bandɔ́mɛsɛ́ e ?
18 Yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía :
« Mbɔ́kɔ bú ŋaa náta buéŋí anyía Bandɔ́mɛsɛ́ é nohíki bɛtálɛ́mánánɔ́ bɛ́ baacɔ,
mbá anyána aná na baŋána na bakɛla maabɛ́ e ? »*
19 Yaátɛ́ asana,
baacɔ e bé ŋe bú híite indekese anyía bú ŋé bíléníne Bandɔ́mɛsɛ́ aáná,
ábɔ́ nyɛmána bá ɔcɔbaka ne buúse ɔ ɔkɛla bɛmbányɛ bɛ́ bɛsana ;
mbá bé iínjíékíne cííbú ilíhe ikimekime né Muketi bɛnyɛ́ma bikime ;
muúmu mu ŋoó nyióyísínyi cííyé ɛndána.