Nɔkɔma a bɛsana bɛ́ Bandɔ́mɛsɛ́ noómi
2
1 A asana eyí nú me nú bíbíénútúkúne,
ánɔ nyɛánaka aná ɔkɛla anamá ekime na cá aŋána ne cé menjiŋé ne cé muótóno.
Ánɔ nyɛánáka ɔbá na tɔbɛ́mbɛ túfendí,
na yaáká yí eése áyá.
2 Bɛsana bɛ́ Bandɔ́mɛsɛ́ á banɔ́ bílénékíne háyɛ mabána naŋa meé bílénékíne iŋéné.
Aáná nu ká nɔ́ kɔ́maka eé biíbi,
mbá Bandɔ́mɛsɛ́ banɔ́ nóhiki buúse bukime,
3 ananyía nua núáŋa o omenyi anyía wáŋa na ambányɛ yɛ́ ɔtɛ́má.ª
4 Énu bíkósíki né Otéŋí a Waáŋá,
wuúci wáŋa nukúse e nú ŋé yiínjíéne olíhe.
Nuúnu bafalɛfa ciíbe ŋe bú óómbóko,
mbá Bandɔ́mɛsɛ́ ŋeé nuúnu lɔtɔ́,
yɔ́ lɛ́ca anyía nuáŋa taaká cɛ bɔkɔ a bɔ́ á hɔlaka bɛnyɛ́ma bikime.
5 Banɔ́ tɔ́na,
nua núáŋa i iŋetí ci imbiŋe a cɛ́áŋa na taaká ci olíhe.
Énu oofókíne aná ɔ ɔfalɛfa ú ciíbe cɛ Bandɔ́mɛsɛ́,
haála ahá yááyɛ́ Elilé ŋe límine,
anyía mbá nuanɔ́ bámɔ́kɔ́na ɔlɔŋɔ ú *beluli nyiínjie e befúúménénú a bá ŋá bɔ́ hɔ́lɛna né Yésus *Kilís ɔ ɔnyiɔnɔ Bandɔ́mɛsɛ́ buólí na ɔtɛ́má okime.
6 Yááŋa anyía Ciɔɔ́ŋɛ́ cɛ́ Bandɔ́mɛsɛ́ ŋaa kɔ́ɔna cɛ́sɛ :
« Ánɔ lɛcá,
ya mɛ́ŋa ɔlɔtɔ́nɔ́ ambányɛ yí nukúse a nɔ́ á hɔ́laka bɛnyɛ́ma bikime,
mío nuúnu túméke eé ciíbe ci Síyon ;
aáná ɔɔcɔ awɔ́ u ŋaá háya mɔŋɔlɛ́ eé nuúnu tɛ́ káá lɔ́kɔ́ma aatɔ́ ɔlama ta buɔ́sɛ́. »*
7 Banɔ́ abá nu ŋa nɔ́ háya mɔŋɔlɛ́ eé nuúnu,
énu menyí anyía nukúse eénú áŋa taaká cɛ bɔkɔ a bɔ́ á hɔ́laka bɛnyɛ́ma bikime.
Mbá bú tɛ́ á bá aáná ná baacɔ a bá tɛ ŋá bɔ́ háya mɔŋɔlɛ́ eé nuúnu,
anyía yááŋa yɔɔ́ŋɔ́kɔ́nɔ́ anyía :
« Nukúse anɔ́ bafalɛfa meébe ŋe bú óomboko anyía báyɛ núáŋa nɔɔbɛ́,
nuúnu núáŋa taaká ci nukúse a nɔ́ maá bɛ́túáhɛ́na ciíbe ».*
8 Yááŋa yɔɔ́ŋɔ́kɔ́nɔ́ tɔ́na anyía :
« Nukúse eénú ŋeé kúfítínyi baacɔ,
nú beébe kuusiki ɔ ɔmɛsɛ́.
»* Bé ŋe bú kúféténe eé nuúnu,
bá kúakɔna ɔ ɔmɛsɛ́ anyía bá tɛ ŋá bɔ látɛ́na Bɛsana bɛ́ Bandɔ́mɛsɛ́.
Feeké Bandɔ́mɛsɛ́ ŋaá sɔ́mbɔ́tɔ́na aáná.
9 Mbá,
aá banɔ́,
nua nɔ́ŋa hɛnyɛ́nɔ́ ahɛ́ Bandɔ́mɛsɛ́ ŋɔɔ́ lɔ́tɔ,
banɔ́ beluli nyiínjie e bé ŋe bú lúlinyi Otéŋí a Waáŋá bɛnyɛ́ma.
Nua núáŋa tɔ́na efúúménénú yɛ́ bunɔŋɔ a yɛ́ ŋaá bɛ́lɔ́kɔ́mɛ́na Bandɔ́mɛsɛ́.
U ŋaá banɔ́ lɔ́tɔ́kɔ́ anyía nuénú húlíkínyi baacɔ bɛmbányɛ́kɛ́ bɛ́ bɛsana abɛ́ u ŋaá kɛlaka,
ª ananyía u ŋaá banɔ́ aáŋíáka o olíhe ú ibíne noómi,
yɔ́ banɔ́ hákɛ́na e uúyé olíhe ú eese noómi.
10 Buáyá,
nu tɛ ɔ́mɔ́ nɔ́ bámɔ́kɔ́na búáyɛ́ bunɔŋɔ ;
mbá aámbáya,
nua núáŋa bááyɛ́ baacɔ bá bɛ́muátá.
Buáyá,
Bandɔ́mɛsɛ́ tɛ ɔ́mɔ́ banɔ́ bɛ́cámáka mahana,
mbá aámbáya,
ú maá banɔ́ bɛ́cáma mahana.ª
Tu ŋá sɔ́ nyɛmána tu otóŋgínyi baacɔ ambányɛ yɛ́ nyɛbɛ́kɛ́lɛ́na
11 Baláamɛ bá ɔtɛ́má,
banɔ́ abá nua nɔ́ŋa biliminyi,
banɔ́ tɔ́na bekenyí ɔ ɔmɛsɛ́ ooci,
ɛ ŋaá mɛ banɔ́ báta anyía ánɔ sɔ́mba ɔkɔlɔ́ a bɛsana a bɛɛbɛ́ bikime a bɛ́ ŋaá banɔ́ hámɛ́na ɛ ɛtɛ́má noómi,
anyía bí ŋeé núusi hɛtányɛ́ hɛ́ ɔɔcɔ.
12 Mbá énu tóŋgínyi ambányɛ yɛ́ nyɛbɛ́kɛ́lɛ́na ɛ ɛkatɛ́katɛ́ ci be-ti-menyí Bandɔ́mɛsɛ́,
ananyía ta bábɔ́ banɔ́ kákálákɛ́na anyía báyɛ nu ŋa nɔ́ kɛla bɛsana a bɛɛbɛ́,
bábɔ́ lɛcáka yáánɔ́ ambányɛ yɛ́ nyɛbɛ́kɛ́lɛ́na,
aáná bé ké bú iínjíékíne Bandɔ́mɛsɛ́ nuúmi buɔ́sɛ́ ebú u kéé bítóŋínyi náábɔ́.ª
13 A asana ne Otéŋí a Waáŋá,
ánɔ lɔ́kɔ́mákɛ́na butéŋí bukime bú baacɔ,
te otéŋí a waáŋá u bunɔŋɔ,
14 mbá ta kɔ́mɛ́na acɛ háányɛ́ acɛ́ bá tɔ́ma,
anyía bé ŋeé beébe tɔ́ma.
Bá ŋaá tɔ́ma kɔ́mɛ́na na ɔ ɔbɔ́nɔ́sia bakɛla maabɛ́ ne o olémbi bakɛla bɛmbányɛ bɛ́ bɛsana.
15 Yááŋa anyía bú ŋe bíléníne Bandɔ́mɛsɛ́ anyía yáánɔ́ ambányɛ yɛ́ nyɛbɛ́kɛ́lɛ́na é húéke eété cé be-ti-menyí bɔkɔ.
16 Énu líhéke yáaŋa i iŋetí cɛ baacɔ a bá bɔ́ŋa baháŋɔ́nákánɔ́,
mbá nɔtɛ bɛ́tááka anyía nyíánɔ́ nyilimíné nyɛ́ baháŋɔ́nákánɔ́ ŋaá banɔ́ iínjie makɛ́nda ma ɔkɛlaka nyɛŋána.
Eéʼeé,
énu líhéke i iŋetí cɛ bɔnyiɔnɔ bá Bandɔ́mɛsɛ́.
17 Énu kékéke ɔɔcɔ okime,
nu lénéke báánɔ́ benyíinyí bé olumitinine ;
énu béétíki Bandɔ́mɛsɛ́,
nu lɔ́kɔ́mákɛ́na tɔ́na otéŋí a waáŋá u bunɔŋɔ.
Ánɔ lɔ́kɔ́máka muuyé i iŋetí ci Kilís
18 Aá banɔ́,
bɔnyiɔnɔ,
ánɔ lɔ́kɔ́mákɛ́na cíínú síkíne cí buólí cɛ́ ɔmɛsɛ́ ne nyikéke nyikime ;
tɛ́ cáŋa hú né eeci a cɛ́áŋa na ambányɛ yɛ́ ɔtɛ́má,
cɛ́ tɛ banɔ́ bɛ́kátɛ́na ;
mbá ánɔ lɔ́kɔ́mákɛ́na tɔ́na eeci a cɛ́ ŋaá banɔ́ bɛ́kátɛ́na.
19 Yááŋa ambányɛ yɛ́ asana o oweéhínyínyi muuyé amɔ́ nu ŋa nɔ́ lɔ́kɔ́ma etémbí ne etémbí a asana na nyɛlɔ́kɔ́mɛ́na anyɛ́ nu ŋa nɔ́ lɔ́kɔ́mɛ́na Bandɔ́mɛsɛ́,
anyía aáná bú ŋeé wuúci bíléníne.
20 Nuúmi a númɔtɛ́ tɛ á bá ná ɔɔcɔ awɔ́ u ŋaá lɔ́kɔ́ma muuyé a bɔɔbɛ́ abɔ́ wáŋa ɔkɛlákánɔ́.
Mbá mbɔ́kɔ ɔɔcɔ ŋe yeéhínyínyi ɔlɔ́kɔ́ma muuyé anyía u ŋa kɛla bɔmbányɛ,
búáŋa ambányɛ yɛ́ asana eé buúse bɔ́ Bandɔ́mɛsɛ́.
21 A asana eéyé u ŋaá banɔ́ lɔ́ŋɔ́kɔ.
Yááŋa anyía *Kilís bɛ́muátá ŋaá lɔ́kɔ́máka muuyé etémbí ne etémbí a yáánɔ́ asana anyía aáná bú ŋeé bílénékíne Bandɔ́mɛsɛ́,
yɔ́ banɔ́ síkíne hibílícínyínyí eéhí ananyía núánɔ́ látákɛ́na cááyɛ́ abaná.
22 Yááŋa anyía,
ú tɛ ŋaá kɛ́la bɔkɔ a bɔɔbɛ́ ta buɔ́sɛ́,
híáná tɔ́na ú tɛ ŋáá sɔ́mba afala ta buɔ́sɛ́.ª
23 Bé ŋeé wuúci ɔɔ́mbɔ́náká mbá,
wuúci te ohélúmúnyínyi ɔɔcɔ bɔsálɔ́ ;
ta ayɛ́ bé ŋeé wuúci kélíkí cɛɛ́tɔ,
u ti ómó síse ta ɔɔcɔ,
mbá u ŋa bɛ́nyɛ́ána a aabá cá Bandɔ́mɛsɛ́,
Mukélísi bɛsana a Mutálɛ́mánánɔ́.
24 Ekúlú eyí bé ŋeé wuúci aátákɛ́ná ɔ ɔmbásá,
u ŋaá lɔ́kɔ́máká muuyé aáyá a cɛɛ́tɔ a asana na máásɔ́ maabɛ́,
ananyía mbá túásɔ́ bámɔ́kɔ́na bewéénú a bɔɔbɛ́,
mbá bɔɔ́sɔ a atálɛ́mánánɔ́ yí olíhe.
A asana na maayɛ́ mookiª,
ɛ́ɛhɛ́ nua nɔ́ŋa baáŋɔ́núákánɔ́.ª
25 Yááŋa anyía nu ŋa nɔ́ bámɔ́kɔ́na háyɛ ɛtɔ́mbá e cí ŋe húle é ndéŋele,
mbá aámbáya Bandɔ́mɛsɛ́ maá banɔ́ hálámánána né Musókóbi bitúké ;
muúmu mú ŋaá banɔ́ sókóbi.