Nufule nú buúse enú
Bíel
ŋɔ yɔɔ́ŋɔ́kɔ́
Bíel ŋeé téŋi belumitinine
1
1 Yaŋɔ́ Bíel,
*ɔɔcɔ u ɛndɔ́ma u *Yésus *Kilís,
yaŋɔ́ ɛ ŋaá mɛ banɔ́ ɔ́ɔ́ŋɛ́na nufule eenu,
banɔ́ eebe abá *Bandɔ́mɛsɛ́ ŋaá táfáka feeké.
Bá ŋaá banɔ́ sélísíki,
ª aámbáya nua nɔ́ŋa biliminyi e bikéti bí iisí bí butéŋí bú Lóom.
Bɛ́áŋa anyía na Bɔ́ŋ,
na Kalasi,
na Kabatɔs,
na Asi,
ne Bitini.ª
2 Síkíne Bandɔ́mɛsɛ́ ŋaá banɔ́ táfáká buáyá háyɛ u ŋaá tákákɛ́ná a makɛ́nda ma yááyɛ́ Elilé anyía nuánɔ́ lɔ́kɔ́mákɛ́na Yésus Kilís,
tɔ́na anyía nuánɔ́ bámɔ́kɔ́na bifúúménénú bɛ́ baacɔ e elime cɛ maayɛ́ manɔ́ŋɔ́ a má ŋaá hámɔ́kɔ́ná.
ª Bandɔ́mɛsɛ́ á banɔ́ sayábákɛ́na,
mbá u banɔ́ iínjíékíne mbuumu ciéŋíníŋíniʼo !
Taaká cɛ mɔŋɔlɛ́ a má tɛ káá mana
3 Túé nyemíki aná Bandɔ́mɛsɛ́,
Síkíne ci uusú Otéŋí a Waáŋá Yésus *Kilís !
U ŋaá basɔ́ bɛ́cámá mahana ekúlú eyí u ŋeé kúmbútúne úúsú olíhe e elime cɛ nyɛhaanyua nyí Yésus Kilís e biwéewé.
Yaátɛ́ asana tua sɔ́ŋa bá háyánɔ́ taaká cɛ mɔŋɔlɛ́ nááyá a má tɛ káá mana ta buɔ́sɛ́.
4 Tu ŋe sú ményi tɔ́na anyía tu ká sɔ́ bámɔ́kɔ́na na makɛ́nda ma ɔbɔ́ŋgɔ́na bɛnyɛ́ma abɛ́ Bandɔ́mɛsɛ́ ŋe tétényínyi bááyɛ́ baacɔ.
Bíáŋa bɛnyɛ́ma a bɛ́ tɛ á bá bɛ́ ɔcaŋiaka,
te obítífíle,
mbá te onyímísi núábɔ́ nɔhɛka.
Bandɔ́mɛsɛ́ ŋaá banɔ́ biíbi tétényínyi a búáyɛ́ bunɔŋɔ.
5 Wuúci wáŋa na makɛ́nda ma ɔ banɔ́ tétényíki anyía nu ŋa nɔ́ háya mɔŋɔlɛ́ nááyá ɔ ɔkɔɔ́háma ayɛ́ u káá banɔ́ námbɔnɛna ɔkɔmba ooci a wá yáaŋa ɔ ɔfaakɔna a nyɛkahálɔ́mɔ́na nyí Yésus.
6 Énu bílénéke buéŋí aná a asana na bɛnyɛ́ma eébí,
ta yɛ́ cáŋa á bá anyía aámbáya nua núáŋa ɔ ɔlɛca anamánamá cá mɔkɔkɔnana.
7 Yááŋa anyía mɔkɔkɔnana eémú ŋɔ yɔ́ɔ́kɛ́tɛ́na makɛ́nda me úúnú olumitinine.
Ɔ́kɔ,
tɛ́ka kóolo áŋa bɔkɔ a bɔ́ naŋa bú á cáŋiaka e ?
Ta híáná,
bá náŋa bé é ciíci námbáka o oocó,
anyía bé é menyí mbɔ́kɔ cɛ́áŋa ifúúménénú.
Híáná tɔ́na yááŋa ne úúnú olumitinine ;
u ŋa hɔ́la kóolo buéŋí.
Buátɛ́ bɔkɔ,
bé ŋeé wuúci ɔ́ɔ́kɛ́tɛ́na anyía bé é menyi mbɔ́kɔ wáŋa wɔɔ́nɛ́nánɔ́.
Aáná Bandɔ́mɛsɛ́ kéé yóómísíki olumitinine oócí,
yó wuúci iínjie nuúmi,
yó wuúci ciekinyi a buɔ́sɛ́ ebú Yésus Kilís kéé bítóŋínyi a baacɔ.
8 Banɔ́ nu tɛ ŋá nɔ́ lɛca Yésus ta buɔ́sɛ́ ;
mbá ta híáná,
nu ŋe nú wuúci léne,
ta ayɛ́ nu ti ŋé nú wuúci lɛca aámbáya nu ŋa nɔ́ háya mɔŋɔlɛ́ nááyá.
Buátɛ́ bɔkɔ,
nu ŋe nú bíléne ne nuúmi nuéŋí a nyɛnamá anyɛ́ ɔɔcɔ tɛ á bá wu omenyi otóŋínyi ne mehúnyi me nyuúté.
9 Ɛ́cɛ anyía Bandɔ́mɛsɛ́ maá banɔ́ nóhiki,
nua núáŋa aná na bɛnamá ebí úúnú olumitinine ŋaá bá wá yaámbaka.
10 A asana na bɛnamá eébí,
*behémúnyi bɛsana bá Bandɔ́mɛsɛ́ ŋa bɔ́ cáŋa ɔbataka,
bɔ́ wáambaka bɔmbányɛ bɔmbányɛ anyía bébú yiíyi menyí.
Ɛ́ɛhɛ́ bé ŋe bú hémúkúnyínyí baacɔ asana yɛ́ yaála yí nuubo ayɛ́ Bandɔ́mɛsɛ́ káá banɔ́ bóosiki.
11 Elilé yí Kilís ŋaá cáŋacáŋa o beébe tóŋgínyi anyía Kilís káá lɔ́kɔ́máka muuyé,
mbá u bɔ́ŋɔ nuúmi e elime.
Buátɛ́ bɔkɔ bá ŋa bɔ́ bɛ́kɛ́ndákɛ́na omenyi ne e ekúlú yɛ́ háányɛ́ bɛsana eébí káá bɛ́kɛ́láka na anyána bɛ́ káá bámɔ́kɔ́na.
12 Bandɔ́mɛsɛ́ ŋoó tóŋgínyí bááyɛ́ behémúnyi bɛsana eébé anyía bɛsana ebí bé ŋe bú hémúnyi ti ŋéé beébe lɛca beébe bɛ́muátá,
mbá bɛ́ ŋaá banɔ́ lɛ́ca.
Aámbáya behulinyi baacɔ Ambányɛ yɛ́ Ɛsɔ́ma ŋa bɔ́ banɔ́ biíbi laákɛ́na.
Bá ŋa bɔ́ táŋáká a makɛ́nda me *Efúúménénú yí Elilé e yí ŋeé húle ɔ Ɔmuaná ná Bandɔ́mɛsɛ́.
Ta bíáyɛ́ *bililé bɛ́ masɔ́ma bɛ́muátá áŋa na ɛcaná cí o biíbi menyukune.ª
Nyɛbɛ́kɛ́lɛ́na e nyí ŋe bíléníne Bandɔ́mɛsɛ́
13 Yaátɛ́ asana,
ánɔ hákɛ́na ɛtɛ́má ɔ ɔnyiɔnɔ Bandɔ́mɛsɛ́ buólí,
nɔtɛ hɛ́táka hiiné;
ª ánɔ hákɛ́na tɔ́na mɔŋɔlɛ́ mekime a yaála yí nuubo ayɛ́ Bandɔ́mɛsɛ́ káá banɔ́ bóosiki e ekúlú eyí Yésus Kilís kéé bítóŋínyi a baacɔ.
14 A asana ayɛ́ nua nɔ́ŋa baáná bá ɔlɔ́kɔ́mána,
nɔtɛ háná látɛ́na bɛsana bɛ́ buáyá a bɛ́ ŋaá bá bɛ́ á banɔ́ hámɔ́kɔ́na ɛ ɛtɛ́má ekúlú ayɛ́ nu ŋa nɔ́ bámɔ́kɔ́na a búánɔ́ bundímé noómi.
15 Mbá,
i iŋetí cɛ Bandɔ́mɛsɛ́,
Ooci awɔ́ u ŋaá banɔ́ lɔ́ŋɔ́kɔ́,
wuúci wáŋa ofúúménénú,
ánɔ bámɔ́kɔ́na bifúúménénú bɛ́ baacɔ a bɛsana bikime abɛ́ nu ŋa nɔ́ kɛ́la.
16 Yááŋa yɔɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía :
« Ánɔ bámɔ́kɔ́na bifúúménénú bɛ́ baacɔ háyɛ yaŋɔ́ bɛ́muátá ya mɛ́ŋa ofúúménénú. »*
17 Ekúlú ekime ayɛ́ nu ŋa nɔ́ bɛ́cɔ́kɔ́lɛ́na Bandɔ́mɛsɛ́,
nu naŋa nuenú wuúci lɔ́ŋɔ́kɔ anyía :
« Taatá ».
A yaátɛ́ asana,
núánɔ́ nyɛmána nú o búle wuúci nyemi na ambányɛ yɛ́ nyɛbɛ́kɛ́lɛ́na e ekúlú ekime a yɛ́ maá banɔ́ lɔ́bɛna anyía nua nɔ́ŋa biliminyi aaha ɔ ɔmɛsɛ́ ooci.
Yááŋa anyía Bandɔ́mɛsɛ́ ŋeé kélísi baacɔ bekime a maabɔ́ mekilíkínyí.
U tɛ á bá ne mebeé.
18 Nu ŋe nú ményi nyɛnamá nyí bilíoŋí anyɛ́ u ŋaá banɔ́ háŋɔ́náká ɔ buɔ́lɛ́ bɔ́ abɛ́kɛ́lɛ́na cé etémbí ne etémbí ecí cíínú sɔ́kɔ́nɔ́ ŋa bɔ́ banɔ́ eékúnyíki.
U tɛ ɔ́mɔ́ banɔ́ háŋɔ́náka ta na mɔɔnyɛ́,
te ne kóolo,
anyía bilíoŋí eébí naŋa bɛ́ á cáŋɛaka.
19 Mbá u ŋaá banɔ́ háŋɔ́náka na manɔ́ŋɔ́ me *Kilís bɛ́muátá a má á hɔla bɔkɔ bukime.
Bé ŋeé wuúci sɔ́mbɛ́na háyɛ ɔɔ́nɔ́ u ɛtɔ́mbá.
U ŋaá bá tɛ́ka na hɛkɔma,
tɛ́ka na hɛkɛ́bɛ́lɛ;ª
20 wuúci Bandɔ́mɛsɛ́ ŋaá cáŋa ɔlɔtɔ ɛ́cɛ u ti ŋe kéti na ɔmɛsɛ́ na ɔmuaná,
yó wuúci banɔ́ tóŋínyi a asana yáánɔ́ e bikúlú bí elime eebi.
21 Nu ŋa nɔ́ hɔ́lɛna eeyé e elime ɔ ɔháya mɔŋɔlɛ́ ná Bandɔ́mɛsɛ́ ;
u ŋeé héényi Yésus e biwéewé anyía wé wuúci iínjíé nuúmi.
Aáná nu ŋe nú lúmitinine,
nu hákɛ́na mɔŋɔlɛ́ ná Bandɔ́mɛsɛ́.
22 Nua núáŋa bifúúménénú bɛ́ baacɔ anyía nu ŋa nɔ́ látɛ́na taaká cɛ Bandɔ́mɛsɛ́ a nyɛnamá enyí nu ŋé nu léne báánɔ́ benyíinyí bé olumitinine.
Énu lénékénéne aná na ɔtɛ́má okime.ª
23 Yááŋa anyía nú ti ómo nú bíbíénútúkúne né síkíne a cɛ́ naŋa cíé wéékúne,
mbá nú me nú bíbíénútúkúne e elime a makɛ́nda me buohó e bú ti ŋéé fíke ta buɔ́sɛ́ ;
buúbu búáŋa buɔ́sɔ ekúlú ekime a makɛ́nda ma Bɛsana bɛ́ Bandɔ́mɛsɛ́.
Bɛ́áŋa bɛɔ́sɔ ekúlú ekime,
bí tí we.
24 Ciɔɔ́ŋɛ́ cɛ́ Bandɔ́mɛsɛ́ ŋaá kɔ́ɔna cɛ́sɛ :
« Baacɔ bekime á bɔ́ŋa i iŋetí ci bihuti a bɛ́ ŋaá kɔ́ta,
núábɔ́ nɔhɛka áŋa i iŋetí cɛ bɛsama e bí ŋe yémbunue,
bɛ́ɔ́ kúakɔna ɔ ɔmɛsɛ́,
25 mbá Bɛsana bɛ́ Bandɔ́mɛsɛ́ ŋeé líhe bikúlú bikime.
»* Bɛsana eébí áŋa Ambányɛ yɛ́ Ɛsɔ́ma ayɛ́ nu ŋa nɔ́ lɔ́kɔ́máká.