Bandɔ́mɛsɛ́ áŋa ciasɔ́ Síkíne
12
1 Yaátɛ́ asana,
háyɛ belumitinine beéŋí eébé ma bɔ́ basɔ́ bɔ́ŋgɛ́na na ɛmbasɔ́,
ª túá nyɛánáka buúse bukime aná bɛsana bikime a bɛ́ ŋá basɔ́ léke ɔkɛla bɔmbányɛ,
bɛ́ basɔ́ yébíki buéŋí.
Mbá tu cábákɛ́na ɔtɛ́tá awɔ́ tuásɔ́ nyɛmána tú ɔcabakɛna,
tu tɛ tɔ́mbɔ.
2 Túá tála Yésus eése anyía wuúci u ŋa kɛla anyía tuésú lúmítíníne,
ª túɔ cɔba ne buúse o olumitinine ɔ ɔkɔɔ́háma a nyɛmana.
Yésus ŋaá bá weé menyukune anyía u kéé bílénéke buɔ́sɛ́ obíléne awɔ́ Bandɔ́mɛsɛ́ ŋeé wuúci bɛ́tánɛ́na,
ª ɛ́ɛhɛ́ u ŋe yeéhínyínyi owé ɔ ɔmbásá ;
wuúci ta ɔlɔ́kɔ́ma aatɔ́ ɔlama a nyɛnamá nyí owé eényí.
Aámbáya u ne meé ke limine a aháŋá yɛ́ ɔɔbɔ́ ú manɔ́mɛ yɛ́ nɔkɔná nɔ́ Bandɔ́mɛsɛ́.
3 Ánɔ bɛ́tááka waáta Yésus,
nyɛnamá enyí ú ŋe yeéhíkínyínyi muuyé amɔ́ bakɛla maabɛ́ ŋe bú wuúci iínjíékíne.
Aáná nu ti ké nú lóosi aabá,
nu tɛ tɔmbɔ.
4 Nyinuusi enyí nu ŋé nú núúsi bɔɔbɛ́ tɛ ŋáá banɔ́ cɔbana o okoówé ta buɔ́sɛ́ a búmɔtɛ́,
nɔtɛ tɔmbɔ aná.
5 Nú ma nɔ́ bɛ́hɔ́ya mehúnyi amá Bandɔ́mɛsɛ́ ŋaá banɔ́ kíndísinyi ne meéme ayɛ́ʼ ?
U ŋaá táŋa náánɔ́ háyɛ ná bááyɛ́ baáná ɔsɛ :
« Uumi ɔɔ́nɔ́,
bíkékényíki ekúlú ayɛ́ Bandɔ́mɛsɛ́ ó yóo wiínjie muuyé ;
atɛ kasa mbɔ́kɔ u ŋó yóo súbéke.
6 Yááŋa anyía Bandɔ́mɛsɛ́ ŋeé súbe ɔɔcɔ ewú u ŋe léne,
anyía wó tóŋínyi ɔɔcɔ oócí bɔɔbɛ́ abɔ́ ú ma kɛlaka,
wé wuúci tóŋínyi tɔ́na anyía wáŋa uúyé ɔɔ́nɔ́. »*
7 Yaátɛ́ asana,
nuánɔ́ nyɛmána nú oweéhíkínyínyi muuyé muéŋí,
anyía nuánɔ́ bɔ́ŋɔ injiŋé e muuyé eémú.
Bandɔ́mɛsɛ́ ŋaá banɔ́ kɛla bɛsana eébí ɔ ɔ banɔ́ tóŋínyi anyía nua nɔ́ŋa bááyɛ́ baáná.
Ta ɔɔ́nɔ́ ta ɔmɔtɛ́ tɛ á bá ewú síkíne ti ŋé súbe.
8 Híáná Bandɔ́mɛsɛ́ ŋá kɛ́la bááyɛ́ baáná bekime.
Mbɔ́kɔ u tɛ ŋáá banɔ́ súbe,
nu tɛ anɔ́ bá taaká cɛ́ bááyɛ́ baáná,
nua nɔ́ŋa baáná bá busɔmɔ.
9 Túá bɛ́tááka bɛsana ebí cíísú síkíne cɛ́ bɛ́muátá ŋa bɔ́ basɔ́ kɛ́laka ;
bá ŋa bɔ́ bá bábɔ́ basɔ́ súbéke,
tú beébe lɔ́kɔ́mákɛ́na.
Híáná tuásɔ́ nyɛmána tú ɔlɔ́kɔ́mákɛ́na ciasɔ́ Síkíne cɛ Ɔmuaná ɔ ɔhɔla,
mbá tu bɔ́ŋɔ olíhe.
10 Cíísú síkíne cɛ́ bɛ́muátá ŋa bɔ́ basɔ́ súbéke e ekéti yí ekúlú háyɛ bú ŋaá bá búé beébe bílénékíne ;
mbá,
Bandɔ́mɛsɛ́,
wuúci u ŋaá basɔ́ súbe a asana na búásɔ́ bɔmbányɛ bɔ́ bɛ́muátá,
anyía tuásɔ́ bámɔ́kɔ́nɛ́na bifúúménénú bɛ́ baacɔ.
11 Ekúlú ekime eyí bé ŋe súbe ɔɔcɔ,
u ŋa lɔ́kɔ́ma ɔtɛ́má ɔnua,
tɛ́ cáŋa obíléne.
Mbá e elime ci musúbéne,
ɔɔcɔ oócí ahɛ́ wɔ́ bɔ́ŋɔ injiŋé e musúbéne eémú,
ŋe búle e líhe háyɛ Bandɔ́mɛsɛ́ ŋé léne.
Nyiókísi nyɛ́ bɛsana bɛ́ ɔlátákɛ́na
12 Yaátɛ́ asana nuti loosíki aabá ;
ta cáánɔ́ eŋéndu ti soómo tɔ́na.ª
13 Ánɔ cɔbá ne buúse ɔ ɔkɛla bɛsana a bɛtálɛ́mánánɔ́,
ª anyía makasa tɛ banɔ́ tímbíé e uúnú olíhe ;
mbá ánɔ kɛ́ndáka.
14 Ánɔ aámbáka ohónyí okime wú olíhéke bɔmbányɛ na baacɔ bekime ;
ánɔ bɛ́kɛ́ndɛ́na tɔ́na ɔtálɛ́mɛ́na eé buúse bɔ́ Bandɔ́mɛsɛ́ befúúménénú.
Yááŋa anyía ta ɔɔcɔ tɛ káá lɛca Otéŋí a Waáŋá mbɔ́kɔ u ti ŋéé líhe aáná.
15 Énu bíkékényíki anyía ɔɔcɔ aá banɔ́ é kine yaála yí nuubo yɛ́ Bandɔ́mɛsɛ́.
Énu bíkékényíki tɔ́na anyía ɔɔcɔ a wɔmɔtɛ́ aá banɔ́ á bá na aabɛ́ yí buohó bɔ́ nyɛbɛ́kɛ́lɛ́na,
keyé u káá cáŋgɛ́na olíhe ú bɔsɔ́ɔ́kɔ́.ª
16 Énu bíkékényíki !
Ta ɔɔcɔ tɛ kɛláka bɛsana bɛ́ mɔnyɔ́kɔ́lɔ́,
u tɛ bábɛ́na bɛsana bɛ́ Bandɔ́mɛsɛ́ háyɛ Eso ŋeé biíbi bábákɛ́na.
U ŋeé túéné ekuke búáyɛ́ buáŋá hú a asana na bɛnyɛ́ma bɛ́ ɔnyíá.
17 Nu ŋe nú menyi anyía e elime ci nyitúé,
u ŋa yáambaka anyía síkíne é wuúci sayábɛ́na,
mbá síkíne te olumitine,
ta yɛ́ cáŋa á bá anyía u ŋa lɛ́láka.
Asana yɛ́ ɔkɔmbɔtɔna tɛ ɔ́mɔɔ́ háná bá.
18 Énu menyi anyía nu tɛ ŋá nɔ́ hɔ́á baacɔ bé *Islayɛ́l e bé ŋe bú bíkósíti ná nɔkɔndɔ nú Sinayi,
bó nuúnu lɛcaka,
oocó á lɔ́laka hɔ́á hú beŋubeŋu,
ibíne nuúnu fiitikinyi,
yaandándá yí ehúne húnéke.
19 Bá ŋa bɔ́ lɔ́kɔ́máka bá bɛ́láka ɛsɛ́bɛ́,
bɔ́ lɔ́kɔ́máka tɔ́na okelú ú Bandɔ́mɛsɛ́.
Ɛŋakɛlá bábɔ́ lɔ́kɔ́ma okelú oócí,
bá ŋá bɛ́cɔ́kɔ́lɔ́kɛ́na anyía Bandɔ́mɛsɛ́ tɛ háná beébe laána ta bɔkɔ a bɔ́mɔtɛ́,
20 ananyía asana eyí u ŋeé beébe laána ŋeé beébe hɔ́la buéŋí a nyɛlɔ́kɔ́ma.
U ŋaá kɔɔna ɔsɛ :
« Ta ɔɔcɔ ti bítíse nɔkɔndɔ eénú.
Ɔɔcɔ é nuúnu bítíse,
bé wuúci túméke andányɛ́,
bé wuúci ɔ́ɔ́nɔ́ ;
te etúké yé bítíse,
bé yiíyi kɛlaka híáná. »*
21 Bɛsana abɛ́ bá ŋa bɔ́ lɛ́cáka hɔ́á ŋeé beébe líkímísíki buéŋí.
*Moyís bɛ́muátá ŋaá kɔɔna ɔsɛ :
« Bulíkílíki buéŋí ŋeé mi ndéndémisi. »*
22 Mbá,
banɔ́,
nú me nú bíkósíti ná nɔkɔndɔ anɔ́ bɔ́ ŋɔɔ́ lɔ́ŋɔ anyía Síyon,
bunɔŋɔ abɔ́ Bandɔ́mɛsɛ́ a wáŋa wɔɔ́sɔ áŋa hɔ́á,
*Yelúsalɛm cɛ Ɔmuaná.
Hɔ́á *bililé bɛ́ masɔ́ma bɛ́ Bandɔ́mɛsɛ́ maá bɛ́bándákána hú mbiɔ́kɛ.
23 Nú me nú bíkósíti ná nyɛbɛ́bándána nyí obíléne nyɛ́ baáná bé buúse bá Bandɔ́mɛsɛ́.
Bandɔ́mɛsɛ́ mɔ yɔɔ́ŋɔ́kɔ cáábɔ́ eénye a Bunɔŋɔ bɔ́ Ɔmuaná.
Nú me nú bíkósíti ná Bandɔ́mɛsɛ́,
Mukélísi baacɔ bekime.
Nú me nú bíkósíti ná bɛtálɛ́mánánɔ́ bɛ́ baacɔ abá Bandɔ́mɛsɛ́ ŋeé fuúmíkínyi.
24 Nua nɔ́ŋa hoóhi ne Yésus,
ohényíhényi u yɔɔ́sɔɔ́sɔ yɛ́ nyɛlatana nyí bumbénú ɛ ɛkatɛ́katɛ́ cɛ na Bandɔ́mɛsɛ́ na baacɔ.
Nú ma nɔ́ faáya a asana na manɔ́ŋɔ́ me Yésus emé ú ŋeé hémúkúnyi o ofúúmínyi baacɔ.
Manɔ́ŋɔ́ eémé ŋoó tóŋínyi asana a yɛ́ á hɔ́la asana ayɛ́ manɔ́ŋɔ́ ma *Abɛl ŋá basɔ́ tóŋie.ª
25 Énu bíkékényíki aná,
nuti kine ɔlɔ́kɔ́ma ɔtáŋa ú Ooci awɔ́ u ŋaá táŋa.
Baacɔ bá buáyá ŋe bú kínéké ɔlɔ́kɔ́mɛ́na ɔɔcɔ awɔ́ u ŋaá bá weé beébe hulikinyi bɛsana bɛ́ Bandɔ́mɛsɛ́ aáhá ɔ ɔmɛsɛ́ ;
aáná bá ŋa bɔ́ lɔ́kɔ́máka muuyé.
Híáná túásɔ́ nyɛmána tú ɔlɔ́kɔ́mákɛ́na Ooci ewú u ŋeé húle ɔ Ɔmuaná.
Mbɔ́kɔ tu ŋe sú kíne o wuúci lɔ́kɔ́mɛ́na,
tu ká sɔ́ lɔ́kɔ́máka muuyé muéŋí ɔ ɔhɔla.
26 Ɔɔcɔ oócí,
uúyé okelú ŋeé nyíétínyi ɔmɛsɛ́ etéeyé ekúlú ;
mbá aámbáya ú maá basɔ́ bɛ́tánɛ́na ɔsɛ :
« I ké mí nyíétínyi ɔmɛsɛ́ ekúlú ɔ́mɔtɛ́ tɔ́na,
tɛ́ cáŋa hú ɔmɛsɛ́ bímuócí,
mbá na ɔmuaná áyá. »*
27 Nyɛkɔɔna anyɛ́ u ŋa kɔ́ɔna anyía « ekúlú ɔ́mɔtɛ́ tɔ́na » ŋo tóŋínyi anyía bɛnyɛ́ma bikime abɛ́ Bandɔ́mɛsɛ́ ŋeé kétíki kéé bínyíétínyi,
bikime bíɔ́ mana onyíme buúse bukime,
anyía bɛnyɛ́ma e bí ti ŋéé bínyíényi ɔ́ lɔ́bɔ́kɔ.
28 Yaátɛ́ asana túásɔ́ nyɛmána tú owiínjíékíne Bandɔ́mɛsɛ́ bitéŋíti,
anyía u ŋaá basɔ́ iínjie bunɔŋɔ e bú ti ŋée bínyíényi.
Túé nyemíki Bandɔ́mɛsɛ́ a nyɛnamá e nyí ŋeé wuúci bíléníne,
tú wuúci lɔ́kɔ́mákɛ́na,
tú wuúci kékéke.
29 Yááŋa anyía ciasɔ́ Bandɔ́mɛsɛ́ áŋa háyɛ oocó ewú ú ŋé lúli bɔkɔ bukime e bú ti ŋéé wuúci bíléníne.ª