Bɛsana e bí ŋe bíléníne Bandɔ́mɛsɛ́
13
1 Banɔ́ belumitinine Yésus,
ánɔ cɔba ne buúse o olénéne banɔ́ na banɔ́.
2 Nɔtɛ bɛ́hɔ́ya ɔkáha bɔmbányɛ bekenyí e cíínú iiki.
ª A nyɛkɛlaka eényí,
baacɔ a bɔ́mɔtɛ́ ŋa bɔ́ káháká bɔmbányɛ bekenyí a bá ŋa bɔ́ bá bililé bɛ́ masɔ́ma bɛ́ Bandɔ́mɛsɛ́,
mbá beébe te omenyi.
3 Ánɔ bɛ́tááka ɔwɔɔ́lɔ baacɔ bé ciíbe cɛ ɛcaná háyɛ anyía nua nɔ́ŋa eé ciíbe cɛ ɛcaná ɔlɔŋɔ ne beébe ;
nu bɛ́tááka tɔ́na eebe abá bɔsɔ́ɔ́kɔ́ ŋe bú tékese háyɛ anyía nua nɔ́ŋa i indekese ɔlɔŋɔ ne beébe.
4 Ɔɔcɔ okime é kékéke cíáyɛ́ ciíbe cɛ nyɛtɔ́nɔ́.
Te oónjú,
ta ɔnɔ́mɔcɔ́ u ciíbe cɛ nyɛtɔ́nɔ́ tɛ kandáka tusɔmɔ.
Énu ményí anyía Bandɔ́mɛsɛ́ kéé kélísíki na bakanda tusɔmɔ bekime na bakɛla bɛsana bɛ́ ɛnjɔkɔ́nɔ́nɔ áyá.
5 Nɔtɛ bámɔ́kɔ́na na ɔtɛ́má ɔɔ́ mɔɔnyɛ́ ;
mbá énu bílénékíne nyɛnamá anyɛ́ nua nɔ́ŋa ne nyiínyi,
anyía Bandɔ́mɛsɛ́ ŋa kɔ́ɔna ɔsɛ :
« I ti kó mi o síke ta buɔ́sɛ́,
ɛ tɛ ɔ bɛ́yuáta ta buɔ́sɛ́. »*
6 Yaátɛ́ asana túásɔ́ nyɛmána tú ɔbámɔ́kɔ́na na mɔŋɔlɛ́,
tu laakɛna baacɔ anyía :
« Otéŋí a Waáŋá áŋa Mu-mɛ-ɔ́ɔ́lɔ ;
i ti ké mí líkíme ta bɔkɔ.
Ta ɔɔcɔ tɛ á bá wu ɔ mɛ kɛla bɔkɔ a bɔɔbɛ́. »*
7 Ánɔ bɛ́tááka báánɔ́ bekendisi bá buáyá,
beébe bá ŋa bɔ́ banɔ́ húlíkínyi Bɛsana bɛ́ Bandɔ́mɛsɛ́.
Nɔtɛ bɛ́hɔ́ya anyána bé ŋe bú líhéke,
bó wéékúne o olumitinine noómi;
ª ánɔ háya mɔŋɔlɛ́ ná Bandɔ́mɛsɛ́ bɔkɔ búmɔtɛ́ háyɛ beébe.
8 Yésus *Kilís áŋa bɔkɔ búmɔtɛ́ hɛ́nánɔ háyɛ ne búocí ne bikúlú bikime.
9 Nɔtɛ bɛ́nyɛána anyía baacɔ ábɔ́ banɔ́ nénísíki na anamánamá cé eékúnyi e cekenyí.
Yááŋa ambányɛ anyía yaála yí nuubo yɛ́ Bandɔ́mɛsɛ́ é kíndísíki cíísú ɛtɛ́má,
mbá tɛ́ cáŋa bɛnyɛ́ma bɛ́ ɔnyíá bí ŋeé ciíci kíndísi.
Yááŋa anyía ekúlú ayɛ́ tú ŋa sɔ́ látɛ́na *bikotí a aháŋá na bɛnyɛ́ma bɛ́ ɔnyíá,
bú tɛ ŋáa basɔ́ ɔ́ɔlɔ.
10 Beluli nyiínjie a bá ŋa bɔ́ nyiɔ eé *Ciíbe cɛ Bandɔ́mɛsɛ́ ci *Besuif tɛ ɔ́mɔɔ́ bɔ́ nyɛmána bá ɔnyíáka *bɛbɛ́sámbá ebí bé ŋe yiínjie a nyíásɔ́ nyindúmé nyí nyinyemi.
11 Tuɔŋɔ tukime,
*mutéŋínyi beluli nyiínjie a muáŋá mu Besuif naŋa waá cɔ́bakana manɔ́ŋɔ́ me bitúké a *haála e hefúúménénú ɔ ɔhɔla,
anyía wé nyémíkínyi Bandɔ́mɛsɛ́ háyɛ *abɛ́sámbá yɛ́ nyɛnyɛanɛna nyɛ́ maabɛ́.
Mbá cɛɛ́tɔ cí bitúké abɛ́ bɔ́ ŋɔ yɔɔ́nɔ́kɔ,
bá ŋaá bá bé ke lúlíki a mafákálɛ́ana,
haaca ne iiki.ª
12 Yaátɛ́ asana Yésus tɔ́na ŋeé wé haaca na bálɛ́ka,
anyía wéé fúúmínyi baacɔ na mááyɛ́ manɔ́ŋɔ́ ma bɛ́muátá.
13 Túé keé wuúci kuána haaca ne iiki,
tú eéhínyínyi ɔlɔ́kɔ́ma aatɔ́ ɔlama háyɛ wuúci.
14 Yááŋa anyía tu tɛ asɔ́ bá na bunɔŋɔ bú olimekine aaha ɔ ɔmɛsɛ́ ooci ;
búásɔ́ bunɔŋɔ bú ekúlú ekime áŋa eé buúse ;
buúbu tu ŋa sɔ́ áamba.
15 Yaátɛ́ asana túá cɔbá ne buúse o onyemi Bandɔ́mɛsɛ́ bikúlú bikime a asana eyí Yésus ŋaá kɛ́láka.
Nyinyemi enyí tu ŋe sú wuúci nyemi áŋa háyɛ tu ŋe sú wuúci iínjie abɛ́sámbá.
ª Túé wuúci nyemíki bikúlú bikime eé buúse bɔ́ baacɔ.
16 Nɔtɛ bɛ́hɔ́ya ɔkɛla bɔsɔ́ɔ́kɔ́ bɛmbányɛ bɛ́ bɛsana,
na ɔwɔɔ́lɔ́nɔ́nɔ,
ananyía anamá cá bɛbɛ́sámbá eécé cé ŋé bíléníne Bandɔ́mɛsɛ́.
17 Ánɔ lɔ́kɔ́mákɛ́na báánɔ́ bekendisi,
nu kɛlaka bɛsana abɛ́ bá ŋa bɔ́ banɔ́ láana.
Beébe bá naŋa bábɔ́ banɔ́ tétényíki ;
bé ké bú bíkétíkínyi Bandɔ́mɛsɛ́ anyána bá ŋa bɔ́ nyiɔ́kɔ.
Mbɔ́kɔ nu ŋe nú beébe lɔ́kɔ́mɛ́na,
bá ká bɔ́ nyiɔkɔ ne obíléne,
bá tɛ lɔ́kɔ́ma ɔtɛ́má ɔnua.
Aáná bú káá banɔ́ ɔɔ́lɔ́kɔ.
18 Ánɔ cɔba ne buúse ɔ ɔbɛ́cɔ́kɔ́lɛ́na Bandɔ́mɛsɛ́ aasɔ́ a aatɔ́ ;
túásɔ́ tɔcɔɔ́cɔ́ tɔ́ ɛtɛ́má tɛ ŋáá basɔ́ kákálɛ́na,
anyía bikúlú bikime tu ŋe sú léne ɔkɛla bɛsana a bɛtálɛ́mánánɔ́.
19 Ɛ ŋa mɛ́ banɔ́ batá hɔlákáhɔ́láka anyía núá bɛ́cɔ́kɔ́lɔ́kɛ́na Bandɔ́mɛsɛ́ o o mi iínjie ohónyí wú o tényí ka hálɔ́mɔ́na aanɔ́ a maabána fiaŋɔ.
20-21 Aáná ɛ ŋa mɛ́ bɛ́cɔ́kɔ́lɛ́na Bandɔ́mɛsɛ́,
Muínjíéne mbuumu ɛ ɛtɛ́má,
wuúci u ŋeé héenyi uusú Otéŋí a Waáŋá Yésus e biwéewé.
Yésus ŋaá bɛ́cáŋa yáásɔ́ yaandándá yí Mutétényi ɛtɔ́mbá mu nyɛlata nyí bumbénú nyí ekúlú ekime a asana na mááyɛ́ manɔ́ŋɔ́.
Ɛ ŋa mɛ́ bɛ́cɔ́kɔ́lɛ́na Bandɔ́mɛsɛ́ na anyía wá banɔ́ iínjie makɛ́nda ma ɔkɛlaka bɛsana e bí ŋe wuúci bíléníne,
tɔ́na anyía wá basɔ́ iínjie makɛ́nda me Yésus Kilís,
mbá tu bámɔ́kɔ́nɛ́na háyɛ u ŋe léne.
Yésus Kilís oócí baacɔ ábɔ́ nyɛmána bé owiínjíékíne nuúmi bikúlú bikime,
híáná yááŋa.
22 Banɔ́ báámɛ benyíinyí,
ɛ ŋa mɛ́ banɔ́ bɛ́cɔ́kɔ́lɛ́na anyía núé hiíte ilébé eeci na ambányɛ yɛ́ ɔtɛ́má,
anyía ɛ tɛ ɔ́mɔɔ́ banɔ́ ɔɔ́ŋɛ́na bɛsana biéŋí.
23 Énu menyi anyía bé ŋeé hémúnyí uusú onyíinyí Timoté eé ciíbe cɛ ɛcaná.
Mbɔ́kɔ u ŋé tényí á faáya aáhá,
tu ká sɔ́ faáya ɔlɔŋɔ.
24 Énu mi téŋgínyi báánɔ́ bekendisi bekime,
ne belumitinine Yésus bekime áyá.
Bɔsɔ́ɔ́kɔ́ bé Italí ŋa bɔ́ banɔ́ téŋi.
25 Bandɔ́mɛsɛ́ á banɔ́ sayábákɛ́naʼo !