10
1 Bikotí bí *Moyís áŋa hú tubílícínyínyí tɔ́ taaká cɛ́ bɛsana a cɛ́ ŋa fáakɔna ;
bɛ́ tɛ á bá taaká taaká cɛ́ bɛsana bɛ́muátá,
ananyía beluli nyiínjie náŋa bábɔ́ hálɔ́mɔ́kɔ́nɛ́na oluli *bɛbɛ́sámbá nyɛnamá nyɛ́mɔtɛ́ tuɔŋɔ tukime.
Buátɛ́ bɔkɔ,
*bikotí eébí tɛ á bá bí ofúúmínyi baacɔ e bé ŋe bú bíkósi ná Bandɔ́mɛsɛ́ o ohónyí oócí.
2 Mbɔ́kɔ bɛbɛ́sámbá eébí é fúúmíkínyi ekúlú ɔ́mɔtɛ́ e bikúlú bikime baacɔ e bé ŋe bú biíbi iínjie,
keyé baacɔ eébé tɛ ŋá háná abɔ́ lɔ́kɔ́ma aatɔ́ ɔlama a máábɔ́ maabɛ́,
bá tɛ háná biíbi iínjie tɔ́na.
3 Mbá ta híáná,
bɛbɛ́sámbá eébí ŋa kɛ́la anyía baacɔ ábɔ́ bɛ́tááka máábɔ́ maabɛ́ tuɔŋɔ tukime,
4 ananyía manɔ́ŋɔ́ ne me bikite bɛ́ káwɔ ne me bibébí tɛ á bá ma ɔkɛla ta buɔ́sɛ́ anyía Bandɔ́mɛsɛ́ á nyɛanákɛ́nɛ́na baacɔ máábɔ́ maabɛ́.
5 Yaátɛ́ asana,
ekúlú eyí Kilís ŋaá bá wa yáaŋa ɔ ɔfaaya ɔ ɔmɛsɛ́,
u ŋaá láána Bandɔ́mɛsɛ́ ɔsɛ :
« O ti ŋóo léne ta bɛbɛ́sámbá,
te nyiínjie nyɛ́ bɛnyɛ́ma a bɛ́mɔtɛ́,
mbá o ŋoó mi iínjíé cɛɛ́tɔ.
6 Ne bitúké ebí bé ŋe lúli bikimekime o oocó na bɛbɛ́sámbá a bɛ́ ŋa yáaŋia maabɛ́ ti ŋó yóo bíléníne tɔ́na ;
o ŋoó léne hú anyía bɔ́ yɔ́ɔ lɔ́kɔ́makɛ́na.
7 Híáná Kilís ŋaá laána Bandɔ́mɛsɛ́ ɔsɛ :
“Yaŋɔ́ ooci,
a nyɛnamá anyɛ́ bɔ́ ŋɔ yɔɔ́ŋɔ́kɔ aámɛ a asana e nufule nú bikotí,
míɔ cɔba ɔ ɔkɔkɛla bɛsana e bí ŋo yóo bíléníne.” »*
8 Kilís ŋa cáŋacáŋa ɔlaana Bandɔ́mɛsɛ́ ɔsɛ :
« O ti ŋóo léne ta bɛbɛ́sámbá,
te nyiínjie nyɛ́ bɛnyɛ́ma a bɛ́mɔtɛ́,
te bitúké ebí bé ŋe lúli bikimekime o oocó ;
ta hú bɛbɛ́sámbá a bɛ́ ŋa yáaŋia maabɛ́ má baacɔ bí ti ŋó yóo bíléníne »,
yiíyi anyía bé ŋeé biíbi kɛ́la háyɛ bikotí ŋó tóŋie.
9 Mbá ɔsɛ :
« Yaŋɔ́ ooci,
Bandɔ́mɛsɛ́,
míɔ cɔba ɔ ɔkɔkɛla bɛsana e bí ŋo yóo bíléníne.
» Híáná Bandɔ́mɛsɛ́ ma yáaŋia bɛbɛ́sámbá bɛ́ buáyá bikime,
yɔ́ hɛ́ŋɛ́na na abɛ́sámbá a yɔɔ́sɔ,
yiíyi yááŋa Kilís.
10 A asana eyí Yésus Kilís ŋoó nyíóyísínyi bɛsana e bí ŋe bíléníne Bandɔ́mɛsɛ́,
yɔ́ bɛ́sɔ́mbɛ́na háyɛ etúké ekúlú ɔ́mɔtɛ́ e bikúlú bikime,
tua súáŋa befúúménénú eé buúse bɔ́ Bandɔ́mɛsɛ́.
11 Mululi nyiínjie mu olumitinine ú Besuif mukime náŋa muɔ́ nyiɔkɔ ɛndánáka bikúlú bikime ;
mu naŋa muá hálɔ́mɔ́kɔ́nɛ́na o oluli bɛbɛ́sámbá nyɛnamá nyɛ́mɔtɛ́ bikúlú bikime.
Mbá ta híáná,
bɛbɛ́sámbá eébí tɛ ŋáá yááŋia maabɛ́ ma baacɔ.
12 Mbá ɛ́makɛ́la Kilís a bɛ́sɔ́mbɛ́na wuúci bɛ́muátá háyɛ etúké ekúlú ɔ́mɔtɛ́ e bikúlú bikime a asana na nyɛnyɛanɛna nyɛ́ maabɛ́ ma baacɔ,
nyikelímine eényí a aháŋá yɛ́ ɔɔbɔ́ ú manɔ́mɛ a maabána ma Bandɔ́mɛsɛ́.
13 O otúme ekúlú etéeyé,
u ŋaá tátá anyía Bandɔ́mɛsɛ́ á kɛ́la anyía wé limékíníne bááyɛ́ beliŋine a bɛɛtɔ́.ª
14 Ekúlú ayɛ́ ú ŋaá bɛ́sɔ́mbɛ́ná hú nyɛ́mɔtɛ́ e bikúlú bikime háyɛ etúké,
u ŋa kɛ́la anyía bááyɛ́ baacɔ ébú fúúméne eé buúse bɔ́ Bandɔ́mɛsɛ́ ;
bɔ́ bá bɛtálɛ́mánánɔ́ bɛ́ baacɔ e bikúlú bikime.
15 *Efúúménénú yí Elilé ŋo tóŋínyi bɔmbányɛ bɔmbányɛ anyía bɛsana eébí áŋa taaká.
Yɛ́ ŋa cáŋa ɔ kɔɔna yɛ́sɛ :
16 « Otéŋí Bandɔ́mɛsɛ́ ɔsɛ :
Nyɛlata nyí bumbénú anyɛ́ ɛ ká mɛ́ látana na báámɛ baacɔ etéeyé ekúlú áŋa anyía i ké mí oofikinyi bíámɛ bikotí e cííbú ɛtɛ́má noómi,
mío biíbi ɔɔ́ŋɔ́kɔ aá cíábɔ́ injiŋé noómi. »
17 Ɛ́makɛ́la yáa kɔɔna aáná,
mbá yɛ́sɛ tɔ́na :
« I ké mí beébe nyɛanakɛnɛna máábɔ́ maabɛ́,
ɛ tɛ háná meéme bɛ́táá. »*
18 Híáná ekúlú ayɛ́ Bandɔ́mɛsɛ́ ma nyɛanakɛnɛna baacɔ maabɛ́,
u tɛ háná meéme bɛ́táá,
bú tɛ ŋá háná ɔ yɔɔ́lɔ anyía baacɔ iínjíékíne tɔ́na bɛbɛ́sámbá bí etémbí bɛ́ nyɛnyɛanɛna nyɛ́ maabɛ́.
Túé bíkósíki ná Bandɔ́mɛsɛ́
19 Yaátɛ́ asana,
banɔ́ báámɛ benyíinyí bé olumitinine,
tua sɔáŋa tú owoofine na mɔŋɔlɛ́ aá haátɛ́ *haála e hefúúménénú ahá Bandɔ́mɛsɛ́ áŋa hɔ́á,
a asana na manɔ́ŋɔ́ emé Yésus ŋeé hémúkúnyí,
yó wé.
20 Bú ŋaá bá háyɛ anyía Yésus ŋaá láha bɔlaka ɛ ɛkatɛ́katɛ́ eesú eé buúse,
yɔ́ basɔ́ tóŋínyi yɔɔ́sɔɔ́sɔ yí ohónyí a yɛ́ ŋa cɔ́bana baacɔ o olíhe.
Bɔlaka abɔ́ ú ŋaá láha ŋe hémbúle asana yɛ́ cíáyɛ́ cɛɛ́tɔ acɛ́ u ŋaá sɔ́mbɛ́na háyɛ etúké.
21 Híáná tua sɔáŋa ne *mululi nyiínjie a muáŋá e mú ŋe téŋínyi baacɔ bá Bandɔ́mɛsɛ́.
22 Buátɛ́ bɔkɔ,
túé bíkósíki ná Bandɔ́mɛsɛ́ na ɔtɛ́má okime na mɔŋɔlɛ́ ɔ ɔtɛ́má hú mbiɔ́kɛ,
anyía Yésus me fúúmínyi túásɔ́ tɔcɔɔ́cɔ́ tɔ́ ɛtɛ́má na mááyɛ́ manɔ́ŋɔ́ ;
ú ma súáka ciasɔ́ cɛɛ́tɔ ne menyífé e mefúúménénú.
23 Yaátɛ́ asana tɔ́na,
túá cɔba ne buúse o ohulinyi baacɔ anyía tú ma sɔ́ háya mɔŋɔlɛ́ a bɛsana abɛ́ Bandɔ́mɛsɛ́ ŋa bɛ́tánáká ;
wuúci u ŋo nyióyísínyi cííyé ɛndána bikúlú bikime.
24 Túá bɛ́tááka tɔ́na anyána tua sɔ́ŋa tú ɔwɔɔ́lɔ́kɔ bɔsɔ́ɔ́kɔ́ anyía bébú lénékénéne buéŋí,
bá kɛ́laka baacɔ bɛmbányɛ bɛ́ bɛsana.
25 Tuti kinéke cáásɔ́ abɛ́bándána háyɛ baacɔ a bɔ́mɔtɛ́ náŋa bébú kíneke ;
mbá túé kíndísíkínyínyi o olumitinine noómi a nyɛnamá nyikime ɔ ɔkanda a abɛ́bándána,
hɔlákáhɔ́láka anyía nyɛkahálɔ́mɔ́na nyí Yésus *Kilís a yáaŋa hoóhi.
26 Yááŋa anyíaʼo,
mbɔ́kɔ ɔɔcɔ ŋa yáamba ɔcɔba ne buúse ɔ ɔkɛla bɔɔbɛ́ a macaŋa,
yiíyi anyía ú ma yaákɔ́nákɛ́na omenyi taaká,
wé menyi anyía *abɛ́sámbá yí etémbí tɛ á bá a yááŋa yɛ́ ɔwaáŋia búáyɛ́ bɔɔbɛ́.
27 Mbɔ́kɔ ɔɔcɔ ŋa kɛ́la bɔɔbɛ́ aáná,
u ŋá nyɛmána wu olíkíméke,
ananyía Bandɔ́mɛsɛ́ kéé wuúci bɔsɔnɛna asana a nyɛkála nyɛ́ bɛsana a nyɛ́ káá bá háyɛ nyɛaŋalaŋanda nyí oocó,
nyiínyi nyí kéé lúliki benuusi Bandɔ́mɛsɛ́.
28 Bá naŋa bɔ́ yɔɔ́nɔ ɔɔcɔ okime ewú u ŋe kíne ɔlátɛ́na *bikotí bí *Moyís,
mbɔ́kɔ baacɔ béfendí ta anyía bátátɔ́ ŋa bɔ́ háya ɛmbasɔ́,
bé ti ŋe wuúci bɛ́cáma mahana.ª
29 Mbɔ́kɔ yááŋa aáná ná ɔɔcɔ awɔ́ u tɛ ŋáá látɛ́na bikotí bí Moyís,
anyána yɛ́ káá bá aná ná ɔɔcɔ awɔ́ u ŋá bábɛ́na Ɔɔ́nɔ́ u Bandɔ́mɛsɛ́ e,
u tɛ lɛcá háyɛ bɔkɔ manɔ́ŋɔ́ ma nyɛlata nyí bumbénú e mé ŋeé wuúci fúúmínyi,
ª mbá u ɔɔ́mbɔ́náka tɔ́na Efúúménénú yí Elilé a yɛ́ ŋaá basɔ́ boosi e ?
Nyɛnamá nyɛ́ ɔɔcɔ eényí káá lɔ́kɔ́máka muuyé muéŋí ɔ ɔhɔla bɔkɔ bukime.
30 Tu ŋe sú ményi anyía Otéŋí Bandɔ́mɛsɛ́ ŋa kɔ́ɔna ɔsɛ :
« I ké mí bífúnéke eebe e bé ŋe bú mi kine,
ɛ ká mɛ́ túátɔtɔkɔna máábɔ́ maabɛ́ amá bá ŋa bɔ́ kɛ́láka.
» U ŋa kɔ́ɔna tɔ́na ɔsɛ :
« Yaŋɔ́,
i ké mí kélísíki buamɛ. »*
31 Mahana ná ɔɔcɔ awɔ́ u káá kua a aabá cé kólókosoko Bandɔ́mɛsɛ́ a wáŋa wɔɔ́sɔ.
32 Ánɔ bɛ́tááka ekúlú yí buúsebuúse eyí nú ŋe nú lúmítíníne Ambányɛ yɛ́ Ɛsɔ́ma,
ta yɛ́ cáŋa á bá anyía baacɔ ŋa bɔ́ banɔ́ tékeséke buéŋí,
etéeyé ekúlú nu ŋe nú eéhíkínyínyí.
33 Ekúlú a yɛ́mɔtɛ́,
bá banɔ́ ɔɔ́mbɔ́náka,
bá banɔ́ kɛ́laka bɛɛbɛ́ bɛ́ bɛsana eé buúse bɔ́ baacɔ.
A yɛ́mɔtɛ́ ekúlú nu ŋa nɔ́ bá nuanɔ́ kámakɛna eebe a bá ŋaá bá bébú beébe kɛlaka aáná.
34 Nu ŋa nɔ́ bá nuanɔ́ bɛ́cɔ́bɔ́kɔ baacɔ abá bá ŋaá hákɛ́na eé ciíbe cɛ ɛcaná a asana ne Yésus.
Ekúlú ayɛ́ baacɔ ŋa bɔ́ bá bábɔ́ hɔ́ɔkɔ bíánɔ́ bɛnyɛ́ma,
nú ŋe nú eéhíkínyínyí,
nú cɔ́ba ne buúse,
nu bílénéke,
ananyía nu ŋa nɔ́ bá nuenú ményukune anyía nua nɔ́ŋa na bɔkɔ a búmɔtɛ́ a bú á hɔ́la bɛnyɛ́ma bikime ;
buúbu bú ŋé líhe bikúlú bikime.
35 Yaátɛ́ asana,
ánɔ cɔ́cɔba ne buúse ɔ ɔháya mɔŋɔlɛ́ ná Bandɔ́mɛsɛ́ ;
mbɔ́kɔ nu ŋa nɔ́ kɛ́la aáná,
Bandɔ́mɛsɛ́ káá banɔ́ námaka buéŋí.
36 Nu ŋa nɔ́ nyɛmána nú oweéhínyínyi buéŋí,
aáná nu ká nɔ́ kɛlaka bɛsana e bí ŋé bíléníne Bandɔ́mɛsɛ́,
núó hiíte bɔkɔ abɔ́ u ŋa banɔ́ bɛ́tánɛ́na.
37 Buátɛ́ bɔkɔ búáŋa buɔ́ŋɔ́kɔ́nɔ́ a Ciɔɔ́ŋɛ́ cɛ́ Bandɔ́mɛsɛ́ anyía :
« Hikúlúkúlú mɔ lɔbɔ hitíkítíki,
* aáná ɔɔcɔ awɔ́ u ŋa fáakɔna káá faáya,
u tɛ káá yáána.
38 Mbá ta híáná,
atálɛ́mánánɔ́ yɛ́ ɔɔcɔ eémí eé buúse kɔ́ɔ́ nɔhɔ mbɔ́kɔ u ŋaá háya mɔŋɔlɛ́ náámɛ.
Mbá mbɔ́kɔ u tɛ ŋá háná á háya mɔŋɔlɛ́ náámɛ,
u ti kéé mi bíléníne,
yaŋɔ́ Bandɔ́mɛsɛ́. »*
39 Mbá basɔ́,
tú tɛ asɔ́ bá nyɛnamá nyɛ́ baacɔ a nyɛ́ ŋaá hálɔ́mɔ́na ne elime ɔ ɔkɔɔ́háma e bunyímé.
Tua sɔ́ŋa baacɔ a bá bɔ́ŋa baháyánɔ́ mɔŋɔlɛ́ ná Bandɔ́mɛsɛ́ ;
híáná Bandɔ́mɛsɛ́ ŋá basɔ́ nóhi.