Nyinyemi nyɛ́ Bandɔ́mɛsɛ́
9
1 Aáná nyɛlata nyí bumbénú nyɛ́ buáyá ŋaá bá ne *bikotí e bí ŋo tóŋínyi anyána baacɔ ábɔ́ nyɛmána bé onyemiki Bandɔ́mɛsɛ́.
Nyɛlata eényí ŋaá bá tɔ́na na haála hé onyemiki Bandɔ́mɛsɛ́ ahá baacɔ ŋa bɔ́ tábɔ́náka.
2 Bá ŋa bɔ́ fálɛfaka Ciíbe a cɛfalɛfákánɔ́ na bɔlaka,
bé ŋe ciíci sɔ́mbɔ́tɔ́kɔ́ná e bikumbé.
Ekumbé yí buúse,
bé yiíyi lɔ́ŋɔ́kɔ anyía *haála e hefúúménénú,
bá ŋa bɔ́ háya hɔ́á *lámba a cɛ́ ŋaá bá ne iicé ítíndétú nɔ́mɔ ;
bá ŋa háya tébíli,
cɛ́ ŋaá bá ne biléti abɛ́ bá ŋaá bá bé nyemikinyi Bandɔ́mɛsɛ́.
3 Ekumbé yɛ́ ɔláta ŋaá bá na bɔlaka e nyiofine ;
bé yiíyi lɔ́ŋɔ́kɔ anyía *haála e hefúúménénú ɔ ɔhɔla ;
4 hɔ́á bá ŋa bɔ́ háya nyiluli nyiínjie nyɛtábɔ́nákánɔ́ ne kóolo.
Bá ŋaá bá bé lúliki bɛnyɛ́ma e bí ŋe númbe bɔmbányɛ hɔ́á.
Bá ŋá háya tɔ́na hikóló,
bé meé hiíhi feefiki ne kóolo haála hekime ;
bé hiíhi lɔ́ŋɔ́kɔ anyía *hikóló hɛ́ nyɛlata nyí bumbénú.
Hikóló eéhí ŋaá bá ne ondúlé noómi ofeefíkínyi tɔ́na ne kóolo,
bá ŋaá háya bɛnyɛ́ma bɛ́ ɔnyíá abɛ́ bɔ́ ŋɔ lɔ́ŋɔ́ anyía « máana ».
Otúmbe ú *Aálɔn awɔ́ tuányɛ ŋeé kúndíéké ŋaá bá tɔ́na e hikóló noómi na bɛsalɛ bɛ́ andányɛ́ bífendí abɛ́ Bandɔ́mɛsɛ́ ŋɔ yɔɔ́ŋɔ́kɔ́ bikotí hɔ́á.
5 E elime ci hikóló ɔ ɔmuaná,
bá ŋa tábɔ́náká tubílícínyínyí túfendí tú *bililé bɛ́ masɔ́ma bɛ́ Bandɔ́mɛsɛ́ bí nuúmi.
Tú ŋaá bá hú naányɛ́ ne bibéku bífendí a bɛ́ ŋaá bá bíé húéke haála ehé bé ŋe míene manɔ́ŋɔ́ ma *abɛ́sámbá anyía Bandɔ́mɛsɛ́ á nyɛánɛ́nɛ́na baacɔ maabɛ́.
Mbá,
aámbáya tɛ á bá ekúlú yɛ́ ɔ banɔ́ hémbulekine bɛsana eébí bɔmbányɛ bɔmbányɛ.
6 Ɛ́makɛ́la bébú cíkílíékéne bɛnyɛ́ma eébí bikime aáná,
*beluli nyiínjie ŋaá bá bébú oofokine e ekumbé yí buúse ekúlú ekime ayɛ́ bá ŋa bɔ́ bá bábɔ́ nyiɔ́kɔ búábɔ́ buólí.
7 Mbá,
e ekumbé yɛ́ ɔláta,
hú *mutéŋínyi beluli nyiínjie a muáŋá mú ŋaá bá muó yóofokine hɔ́á,
buɔ́sɛ́ búmɔtɛ́ a hiɔŋɔ hikimekime.
Mu ŋá nyɛmána mu owoofine na manɔ́ŋɔ́ me etúké amá muá bɛ́sámbɛ́na Bandɔ́mɛsɛ́ a asana na nyíáyɛ́ nyɛnana nyɛ́ bɛ́muátá na anana acɛ́ baacɔ ŋa bɔ́ nána o o-ti-menyi noómi.
8 *Efúúménénú yí Elilé ŋaá basɔ́ eékúnyi a bɛsana eébí anyía ohónyí tɛ ŋáa bá wú owoofine a haála e hefúúménénú ɔ ɔhɔla ekúlú eyí ekumbé yí buúse a yanáŋa.
9 Bɛsana eébí áŋa hibílícínyínyí hɛ́ bɛsana a bɛ́ ŋa bɛ́kɛ́la aámbáya,
bí ŋo tóŋínyi anyía bɛnyɛ́ma ebí bé ŋe yíinjie Bandɔ́mɛsɛ́ ne bitúké ebí bé ŋe wuúci sɔ́mbɛ́na tɛ á bá bí ofúúmínyi hɛcɔɔ́cɔ́ hɛ́ ɔtɛ́má hɛ́ ɔɔcɔ ewú u ŋe nyemi Bandɔ́mɛsɛ́ ne biíbi.
10 Bí ŋeé beébe eékúnyi hú bɛsana a bɛ́ ŋa lɛ́cana na ɔ ɔnyíá na ɔ ɔmúána,
na bɛsana a bɛ́ ŋa lɛ́ca anamánamá cé obífúúmínyi.
Bíáŋa hú bɛsana bí imehú a bɛ́ ŋaá bá e ekéti yí ekúlú ɔ ɔkɔɔ́háma ekúlú ayɛ́ Bandɔ́mɛsɛ́ kéé kúmbutukune bɛnyɛ́ma bikime.
11 Mbá aámbáya,
*Kilís na maá fáaya ;
wáŋa mutéŋínyi beluli nyiínjie a muáŋá,
wuúci u ŋeé héléne bɛmbányɛ bɛ́ bɛnyɛ́ma eebi abɛ́ Bandɔ́mɛsɛ́ ŋa basɔ́ íinjie.
ª Ciíbe acɛ́ u ŋɔɔ́ nyiɔ búáyɛ́ buólí noómi áŋa ɛnyɛmánánɔ́,
cɛ́ ŋaá hɔ́la Ciíbe cɛ buáyá,
a cɛfalɛfákánɔ́ na bɔlaka.
Tɛ́ cáŋa baacɔ bé ŋe bú ciíci falɛ́fáka,
mbá Bandɔ́mɛsɛ́,
u ti ómo ciíci fálɛfa aaha ɔ ɔmɛsɛ́ ooci.
12 Ekúlú eyí Kilís ŋo yóófíne a haála e hefúúménénú ɔ ɔhɔla,
u tɛ ɔ́mɔ bá ta na manɔ́ŋɔ́ me bibébí ta na ma baáná bá káwɔ aayá a aabá.
Mbá u ŋo yóófíne hɔ́á ekúlú ɔ́mɔtɛ́ e bikúlú bikime na mááyɛ́ manɔ́ŋɔ́ ma bɛ́muátá,
yɔ́ basɔ́ háŋɔ́náka a bɔɔbɛ́ e bikúlú bikime.
13 Ekúlú yɛ́ buáyá,
bá ŋaá bá bɔ́ yɔɔ́nɔ́kɔ ne bibébí ne bikite bɛ́ káwɔ,
bá kámaka manɔ́ŋɔ́,
bé meéme fámákɛ́na a cɛɛ́tɔ cɛ́ baacɔ a bá tɛ ɔ́mɔ bá befúúménénú eé buúse bɔ́ Bandɔ́mɛsɛ́ háyɛ bikotí ŋe yeékúnyi.
Bá ŋaá bá bɔ́ yɔ́ɔ́nɔ tɔ́na abɔ́la yɛ́ káwɔ,
bó yiíyi luliki,
bé ohiite mɔɔtɔ́,
bá ɔtɔ́bɔ́kɔ,
bé ofeefiki baacɔ a bá ŋa bɔ́ nɔ́kɔ́kɔ bikotí,
anyía bábɔ́ bámɔ́kɔ́na befúúménénú eé buúse bɔ́ Bandɔ́mɛsɛ́ háyɛ bikotí ŋe yeékúnyi.
14 Mbá mbɔ́kɔ aáná manɔ́ŋɔ́ me bitúké eémé ŋaá bá na nyɛnamá nyɛ́ makɛ́nda eényí,
manɔ́ŋɔ́ me Kilís áŋa na makɛ́nda meéŋí ɔ ɔhɔla manɔ́ŋɔ́ me bitúké.
Kilís tɛ ɔ́mɔ nana,
u ŋaá bɛ́sɔ́mbɛ́ná wuúci bɛ́muátá ná Bandɔ́mɛsɛ́ háyɛ abɛ́sámbá a yɛ́ á nyɛmána na makɛ́nda me Efúúménénú yí Elilé ;
maayɛ́ manɔ́ŋɔ́ ŋe fúúmínyi túásɔ́ tɔcɔɔ́cɔ́ tɔ́ ɛtɛ́má,
anyía tu tɛ háná kɛ́la bɛɛbɛ́ bɛ́ bɛsana e bí ŋe héléne owé,
mbá tu nyemiki Bandɔ́mɛsɛ́ a wáŋa wɔɔ́sɔ.
15 Yaátɛ́ asana Kilís áŋa ohényíhényi u yɔɔ́sɔɔ́sɔ yɛ́ nyɛlatana yí bumbénú yɛ́ na Bandɔ́mɛsɛ́ na baacɔ.
Aáná baacɔ abá Bandɔ́mɛsɛ́ ŋɔɔ́ lɔ́ŋɔ́kɔ́ ká bɔ́ bɔŋgɔna bɛmbányɛ bɛ́ bɛnyɛ́ma abɛ́ Bandɔ́mɛsɛ́ ŋeé beébe bɛ́tánɛ́na.
Bɛ́ káá bá bíábɔ́ bɛnyɛ́ma bikúlú bikime.
Bɛsana eébí káá bɛ́kɛ́láka aáná a asana eyí Kilís ŋeé wé.
Uúyé owé ŋa háŋɔ́na baacɔ a buɔ́lɛ́ bɔ́ bɛɛbɛ́ bɛ́ bɛsana abɛ́ bá ŋa bɔ́ bá bábɔ́ kɛ́láka ekúlú ekime ayɛ́ bá ŋa bɔ́ bá bébú líhéke a nyɛlata nyí bumbénú nyɛ́ buáyá.
16 Yááŋa anyía nyɛlɛ́ha áŋa nyɛlɛ́haª hú ekúlú ayɛ́ ɔɔcɔ ewú é nyiínyi síke é wé.
17 *Híáná yááŋa anyía nyɛlɛ́ha tɛ á bá nyɛlɛ́ha ekúlú ekime ayɛ́ ɔɔcɔ awɔ́ u ŋa yaamba o nyiínyi síke a yánáŋa o olíhe,
nyɛ́áŋa nyɛlɛ́ha hú ekúlú ayɛ́ ɔɔcɔ oócí eé wé.
18 Yaátɛ́ asana tɔ́na,
nyɛlata nyí bumbénú nyɛ́ buáyá ŋaá bɛ́kɛ́láka na nyɛsɔ́mbɛ́na nyí etúké.
19 *Moyís ŋa cáŋacáŋa otóŋínyi baacɔ bikotí bikime abɛ́ Bandɔ́mɛsɛ́ ŋeé beébe iínjíékíne ;
e elime eécí,
u ŋá kamáka manɔ́ŋɔ́ na ma baáná bá káwɔ ne me bibébí abɛ́ bɔ́ ŋɔ yɔɔ́nɔ́kɔ,
u ŋé meéme latáka ne menyífé,
nyihiite eényí nyiifú nyɛ́ tuányɛ tɔ́ bɔɔtɛ́ a nyɛ́ ŋaá bá na bɛhɔcá bɛ́ ɛtɔ́mbá e bibólótoto.
U ŋé nyiínyi yubé a manɔ́ŋɔ́ noómi,
u ŋaá fámákɛ́na nufule nú bikotí,
u ŋaá fámákɛ́na tɔ́na baacɔ bekime ne meéme.
20 Mbá ɔsɛ :
« Na manɔ́ŋɔ́ eeme Bandɔ́mɛsɛ́ ma látana bumbénú na banɔ́.
U ŋaá banɔ́ laána anyía nuánɔ́ látákɛ́na bikotí bí bumbénú eebi. »*
21 Moyís ŋaá fámákɛ́na tɔ́na manɔ́ŋɔ́ ne eé Ciíbe a cɛfalɛfákánɔ́ na bɔlaka,
na a bɛnyɛ́ma bikime abɛ́ bá ŋaá bá bé nyémikinyi Bandɔ́mɛsɛ́.
22 Ekúlú etéeyé bikotí ŋaá bá bíé téŋgínyi baacɔ,
híáná hoóhi bɛnyɛ́ma bikime ŋaá bá bíé fúúmékéne hú na manɔ́ŋɔ́,
ananyía mbɔ́kɔ manɔ́ŋɔ́ tɛ ŋáa hámɔ́kɔ́na,
Bandɔ́mɛsɛ́ tɛ á bá wu ɔnyɛanɛnɛna baacɔ maabɛ́.
Nyɛbɛ́sɔ́mbɛ́na nyí Kilís ŋa yáaŋia bɔɔbɛ́
23 Tú ma sɔ́ lɛ́ca anyía bɛnyɛ́ma bikime abɛ́ bá ŋaá bá bé nyémikinyi Bandɔ́mɛsɛ́ buáyá ŋaá bá hú tubílícínyínyí tɔ́ taaká cɛ́ bɛnyɛ́ma cɛ́ Ɔmuaná.
Bá ŋá nyɛmána bé ofúúmínyi bɛnyɛ́ma eébí bikime na manɔ́ŋɔ́ me bitúké.
Mbá a asana na taaká cɛ́ bɛnyɛ́ma a bɛ́áŋa ɔ Ɔmuaná,
bú ŋa yáamba *abɛ́sámbá a yɛ́ á hɔ́la manɔ́ŋɔ́ me bitúké.
24 Tu ŋa sɔ́ lɛ́ca tɔ́na anyía *Kilís tí ómo wóofine eé Ciíbe a cɛfalɛfákánɔ́ na bɔlaka acɛ́ baacɔ ŋe bú túméké na aabá ;
cíáŋa hú ihúényínyí cɛ haála ahá Bandɔ́mɛsɛ́ áŋa.
Mbá wuúci,
u ŋo yóofine ɔ Ɔmuaná bɛ́muátá,
aá haála ahá Bandɔ́mɛsɛ́ áŋa ;
wáŋa aámbáya eé buúse bɔ́ Bandɔ́mɛsɛ́,
u ŋeé wuúci bɛ́cɔ́kɔ́lɛ́na a yáásɔ́ asana.
25 Mutéŋínyi *beluli nyiínjie a muáŋá mu *Besuif naŋa muo yóofine buɔ́sɛ́ búmɔtɛ́ a hiɔŋɔ hikime a *haála e hefúúménénú ɔ ɔhɔla na manɔ́ŋɔ́ me etúké a aabá,
tɛ́ cáŋa na maayɛ́ manɔ́ŋɔ́ ma bɛ́muátá.
Mbá Kilís ti ómo wóofokine bikúlú biéŋí ɔ ɔbɛ́sɔ́mbɛ́na wuúci bɛ́muátá.
U ŋaá bɛ́sɔ́mbɛ́ná Bandɔ́mɛsɛ́ wuúci bɛ́muátá ekúlú ɔ́mɔtɛ́ e bikúlú bikime.
26 Mbɔ́kɔ yiíyi tɛ́ka ɔ ɔbá aáná,
keyé u ŋaá lɔ́kɔ́máká muuyé bikúlú biéŋí o otúme ekúlú ayɛ́ Bandɔ́mɛsɛ́ ŋeé kéti na ɔmɛsɛ́ na ɔmuaná.
Aá taaká u ŋaá faáya hú ekúlú eéyé ɔ́mɔtɛ́ e bikúlú bikime ekúlú ayɛ́ nyɛmána nyɛ́ ɔmɛsɛ́ a yáaŋa obíkósi,
ananyía wá bɛ́sɔ́mbɛ́na Bandɔ́mɛsɛ́ wuúci bɛ́muátá,
mbá wa yaáŋíá bɔɔbɛ́ a baacɔ buúse bukime.
27 Yááŋa anyía ɔɔcɔ ŋá nyɛmána wu owé ekúlú hú ɔ́mɔtɛ́,
e elime eécí mbá Bandɔ́mɛsɛ́ wuúci kélísíki.
28 Híáná tɔ́na,
Kilís ŋa bɛ́sɔ́mbɛ́ná ekúlú hú ɔ́mɔtɛ́,
anyía wá yaáŋíáka maabɛ́ ma baacɔ beéŋí.
U ká háná ka hálɔ́mɔ́na,
tɛ́ cáŋa tɔ́na ɔ ɔkɔɔ́waáŋíaka maabɛ́ má baacɔ,
mbá u káá faáya o okonóhi baacɔ e bé ŋe bú wuúci tata na mɔŋɔlɛ́ mekime.