4
1 Feeké Bandɔ́mɛsɛ́ ŋaá basɔ́ bɛ́tánɛ́na anyía tua sɔ́ŋa tú okolímine aáyá a maabána aá haála hé ehélúme.
Ɛndána eécí a yánáŋa ;
yaátɛ́ asana,
túé bíkékényíki anyía ɔɔcɔ ɔmɔtɛ́ aá basɔ́ tɛ lɔbɔ e elime,
wuúci tɛ́ka o okolímine aá haála hé ehélúme.
2 Asana áŋa anyía basɔ́ tu ŋa sɔ́ lɔ́kɔ́máka Ambányɛ yɛ́ Ɛsɔ́ma háyɛ cíísú sɔ́kɔ́nɔ́ ŋa bɔ́ lɔ́kɔ́máka tɔ́na i iisí cɛ ɔsɛ́bɛ́á noómi.
Mbá Ambányɛ yɛ́ Ɛsɔ́ma eéyé ti ómo beébe ɔɔ́lɔ ;
beébe te okolímine aá haála hé ehélúme a asana anyía bó ti ómo bú yiíyi lumitinine.ª
3 Mbá basɔ́ tu ké sú límine aá haála hé ehélúme eéhé,
anyía tu ŋe sú lúmitinine Ambányɛ yɛ́ Ɛsɔ́ma eéyé.
Bandɔ́mɛsɛ́ ŋaá laána cíísú sɔ́kɔ́nɔ́ ɔsɛ :
« Hilóbi ŋeé mi tímbíé ná baacɔ eébé.
Ɛ́ɛhɛ́ ɛ́ ŋa mɛ́ sɔ́mbɔ́tɔ́ná anyía bé ti ké ké bú límine ta buɔ́sɛ́ aámɛ a maabána aá haála hé ehélúme.
»
Mbɔ́kɔ Bandɔ́mɛsɛ́ ŋaá kɔ́ɔna aáná,
bú tɛ á bá anyía haála hé ehélúme tɛ á bá,
ananyía wuúci, ú ŋaá máná búáyɛ́ buólí bukime ekúlú ayɛ́ ú ŋeé kétíki na ɔmɛsɛ́ na ɔmuaná.
4 A asana na *buɔ́sɛ́ bú ehélúme,
yááŋa yɔɔ́ŋɔ́kɔ́nɔ́ haála a hɔ́mɔtɛ́ anyía :
« Bandɔ́mɛsɛ́ ŋɔɔ́ nyiɔkɔ búáyɛ́ buólí bukime ɔ mɔɔ́sɛ́ metíndétú ;
e metíndétú nɔ́mɔ ú ŋeé hélúméké. »*
5 A haátɛ́ haála bá ŋaá kɔ́ɔna tɔ́na anyía :
« Bé ti ké ké bú límine ta buɔ́sɛ́ aámɛ a maabána aá haála hé ehélúme. »
6 Híáná baacɔ a bá ŋa bɔ́ cáŋacáŋa ɔlɔ́kɔ́máka Ambányɛ yɛ́ Ɛsɔ́ma eéyé ti ómo ko bú límine aá haála hé ehélúme eéhé,
anyía bó ti ómo bú lumitinine.
Ɛ́ɛhɛ́ ohónyí a yánáŋa hɔ́á awɔ́ baacɔ bé etémbí a bɔ́ŋa bó ko límekine aá haála hé ehélúme eéhé.
7 Buátɛ́ bɔkɔ Bandɔ́mɛsɛ́ ŋaá háná tánatɔ́na buɔ́sɛ́ bú etémbí,
bé buúbu lɔ́ŋɔ́kɔ anyía « hɛ́nánɔ ».
U ŋaá táŋáka aáná aáhá e elime eé nyuúté nyɛ́ *Táfit aá haála ahá tú ma cáŋa asɔ́ ɔɔ́ŋɔ́kɔ anyía :
« Mbɔ́kɔ nu ŋá nɔ́ lɔ́kɔ́ma okelú ú Bandɔ́mɛsɛ́ hɛ́nánɔ,
nuti netísíki ɛtɛ́má. »
8 Yááŋa anyía mbɔ́kɔ Sosué á cɔ́bana o okolímisinyi baacɔ aá taaká cɛ haála hé ehélúme,
keyé Bandɔ́mɛsɛ́ tɛ ɔ́mɔ háná táŋa asana na buɔ́sɛ́ bú etémbí.
9 Yaátɛ́ asana baacɔ bá Bandɔ́mɛsɛ́ ké ké bú límine aá haála hé ehélúme,
bó hélúméke háyɛ Bandɔ́mɛsɛ́ ŋeé hélúméke e metíndétú nɔ́mɔ.
10 Yááŋa anyía ɔɔcɔ okime ewú u ŋe hélúme aá haála ahá Bandɔ́mɛsɛ́ ŋaá tábɔ́náká,
ŋe hélúme a búáyɛ́ buólí háyɛ Bandɔ́mɛsɛ́ ŋeé hélúméké.
11 Túá bɛ́kɛ́ndɛ́na aná o okolímine aá haátɛ́ haála hé ehélúme,
ananyía ta ɔɔcɔ ɔmɔtɛ́ aá basɔ́ tɛ kɛlɛ́na Bandɔ́mɛsɛ́ ɛndɔ́kɔ́,
mbá u lɔbɔ e elime háyɛ cíísú sɔ́kɔ́nɔ́ ŋa bɔ́ kɛ́láka ɛndɔ́kɔ́ i iisí cɛ ɔsɛ́bɛ́á noómi.
12 Bɛsana bɛ́ Bandɔ́mɛsɛ́ ŋe yíinjie baacɔ taaká ci olíhe,
bɛ́áŋa na makɛ́nda.
Bɛ́ ŋaá tɛ́a ɔ ɔhɔla nɔsala nɔ́ ɔhána a nɔ́ ŋá tɛ́a bɛháŋá bikime ;
bɛ́ ŋɔ bɔ́lɔ cɛɛ́tɔ háyɛ nɔsala nɔ́ ɔhána ŋɔ́ bɔ́lɔ yuúhé,
ɔ ɔkɔɔ́háma ɔ ɔwaálɔ́na na hɛtányɛ́ ne elilé,
bɛ́ɔ́ kɔɔ́háma ɔ mɔsɔŋɛ́ noómi.
Bɛsana bɛ́ Bandɔ́mɛsɛ́ eébí ŋa námbɔna bɛsana abɛ́ ɔɔcɔ ŋaá bɛ́táá e uúyé ɔtɛ́má anyía wáŋa wu ɔkɛlaka.
13 Ta bɔkɔ a búmɔtɛ́ tɛ á bá a búáŋa bú ɔlɔbɔ anyía Bandɔ́mɛsɛ́ ti buúbu lɛca,
bɛnyɛ́ma bikime ebí ú ŋe kétíki ŋa lɛcana bɔmbányɛ bɔmbányɛ a cááyɛ́ eése.
Ná Bandɔ́mɛsɛ́ bímuócí tú ké sú bíkétíkínyi bíásɔ́ bɛsana bikime abɛ́ tú ŋa sɔ́ kɛlaka.
Yésus, mutéŋínyi beluli nyiínjie a muáŋá
14 Tua sɔáŋa ne *mutéŋínyi beluli nyiínjie a muáŋá ɔ ɔhɔla,
muúmu muáŋa Yésus,
Ɔɔ́nɔ́ u Bandɔ́mɛsɛ́ ;
ú ŋaá báátáka ɔ Ɔmuaná a maabána ma Bandɔ́mɛsɛ́.
Buátɛ́ bɔkɔ,
túé tétényíki bɔmbányɛ bɔmbányɛ bɛsana ebí tu ŋe sú lumitinine,
tu hulikinyi baacɔ.
15 Muasɔ́ mutéŋínyi beluli nyiínjie a muáŋá eémú mú ŋaá basɔ́ bɛ́cáma mahana,
anyía mu ŋeé ményi muasɔ́ muuyé mukime.
Mu ŋaá lɔ́kɔ́máká ɔkála háyɛ basɔ́ tɔ́na,
bó muúmu kɔkɔnaka tɔ́na,
mbá ta híáná mu tɛ ɔ́mɔ kɛ́la bɔɔbɛ́ buúse bukime.
16 Yaátɛ́ asana túé búle bíkósi na mɔŋɔlɛ́ hoóhi ná Bandɔ́mɛsɛ́ ewú u ŋe bóosi baacɔ,
anyía u káá basɔ́ bɛ́cámáka mahana,
mbá u basɔ́ bóósiki ekúlú ekime ayɛ́ tua sɔ́ŋa ne muuyé.