5
1 Bandɔ́mɛsɛ́ ú ŋaá táfá betéŋínyi *beluli nyiínjie a *baáŋá bekime ɛ ɛkatɛ́katɛ́ cɛ baacɔ,
anyía bébú wuúci nyíɔkɛna a aháŋá na baacɔ.
Bé ŋe bú lúlinyi Bandɔ́mɛsɛ́ nyiínjie anyía bébú wuúci iínjíékíne bitéŋíti.
Bé wuúci lúlikinyi *bɛbɛ́sámbá,
anyía waá nyɛ́ánákɛ́nɛ́na baacɔ máábɔ́ maabɛ́.
2 A baacɔ e bé ti ŋé bú ményi ambányɛ yí ohónyí,
beébe bá ma bɔ́ bɛ́áhákɛ́na e eciké,
beluli nyiínjie eébé ŋe bú ményi anyána bá bɔ́ŋa bé o beébe ɔɔ́lɔ́kɔ,
anyía bá ŋa bɔ́ bá tɔ́na na bɔnɔ́nɔ́ háyɛ baacɔ eébé.
3 Buátɛ́ bɔkɔ beluli nyiínjie ábɔ́ nyɛmána bé olulikinyi Bandɔ́mɛsɛ́ bɛbɛ́sámbá a asana na máábɔ́ maabɛ́ ma bɛ́muátá na maabɛ́ ma baacɔ bé etémbí áyá.
4 Ta ɔɔcɔ tɛ á bá wu obíínjie nuúmi ta ɔbɛ́táfa ɔ ɔnyiɔ buólí bú *mululi nyiínjie a muáŋá ;
Bandɔ́mɛsɛ́ bímuócí ú ŋaá táfá ɔɔcɔ ɔ ɔnyiɔ buólí eébú háyɛ ú ŋaá táfá *Aálɔn buáyá.
5 Híáná tɔ́na yááŋa ne *Kilís ;
ú ti ómo bíínjie nuúmi ta ɔbɛ́táfa wuúci bɛ́muátá anyía wɔ́ nyiɔ́kɔ buólí bú mutéŋínyi beluli nyiínjie a muáŋá.
Mbá Bandɔ́mɛsɛ́ bɛ́muátá u ŋeé wuúci lɔtɔ́ ekúlú ayɛ́ ú ŋaá laána Yésus ɔsɛ :
« Ɔ ɔ́ŋa uumi Ɔɔ́nɔ́,
o otúme hɛ́nánɔ ya mɛ́aŋa ɔɔtɛ́. »*
6 U ŋa kɔ́ɔna haála hé etémbí tɔ́na ɔsɛ :
« Ɔ ɔ́ŋa mululi nyiínjie a muáŋá mu bikúlú bikime,
bɔkɔ búmɔtɛ́ háyɛ Melikisɛtɛk. »*
7 Ekúlú eyí Yésus ŋaá bá aaha ɔ ɔmɛsɛ́ ooci,
ú ŋaá bɛ́cɔ́kɔ́lɔ́kɛ́na Bandɔ́mɛsɛ́ buéŋí ;
na bɛlɛlá e eése u bókókó okelú ɔ ɔmuaná,
anyía u ŋaá bá weé menyukune anyía Bandɔ́mɛsɛ́ áŋa wu o wuúci nohi o owé.
Bandɔ́mɛsɛ́ ŋaá kɛ́láka bɛsana ebí Yésus ŋeé wuúci bɛ́cɔ́kɔ́lɔ́kɛ́na a asana ne nyibílóosi enyí u ŋeé bílóosi.ª
8 Ta háyɛ ú ŋaá bá Ɔɔ́nɔ́ u Bandɔ́mɛsɛ́,
u ŋa yaákɔ́nákɛ́na ɔlɔ́kɔ́mána e muuyé amɔ́ ú ŋaá lɔ́kɔ́máka.
9 Ɛŋakɛlá Yésus a lɔ́kɔ́máka ɔkála,
yɔ́ bá ɔbɛ́tábɔ́nákánɔ́ o onyíóyísínyi bɔmbányɛ bɔmbányɛ buólí bukime,
nyíáyɛ́ nyɛbɛ́cáŋa eényí Munohi baacɔ e bé ŋe bú muúmu lɔ́kɔ́mɛ́na,
anyía wé beébe iínjíé yɔɔ́sɔɔ́sɔ yí olíhe yí ekúlú ekime.
10 Aáná Bandɔ́mɛsɛ́ ŋeé wuúci táfa tɔ́na mutéŋínyi beluli nyiínjie a muáŋá bɔkɔ búmɔtɛ́ háyɛ Melikisɛtɛk.
Nyiókísi nyɛ́ bɔɔbɛ́ bɔ́ ɔbɛ́yúata olumitinine
11 A asana na ɔɔcɔ oócí tua sɔ́ŋa na bɛsana biéŋí bɛ́ ɔkɔɔnaka ;
mbá bɛ́ ŋa náta ɔ banɔ́ hémbuline anyía nua nɔ́ŋa na bɛtaá.
12 Feeké ayɛ́ nú ŋa nɔ́ aákɔ́nákɛ́na bɛsana,
keyé nua nɔ́áŋa o oweékúnyi bɔsɔ́ɔ́kɔ́ ;
ta híáná,
bá ŋá nyɛmána bá ɔ háná banɔ́ eékúnyíki bɛsana bí nyitúme abɛ́ nu ŋa nɔ́ aákɔ́nákɛ́na a aháŋá na bɛsana bɛ́ Bandɔ́mɛsɛ́.
Nua nɔ́ŋa nyɛnamá nyɛ́ baacɔ a nyɛ́ á nyɛmána nyí oweémútéke mabána,
nyiínyi nyí ti ŋéé ményi ɔnyíá bɛnyɛ́ma a bɛ́ ŋa náta.
13 Ɔɔcɔ okime ewú u ŋe yeémúte mabána a yánáŋa iŋéné,
ú ti ŋée menyi ɔwaálɔ́na na bɔmbányɛ na bɔɔbɛ́.
14 Mbá bɛnyɛ́ma bɛ́ ɔnyíá a bɛ́ ŋa náta áŋa bɛ́ *baáŋá,
beébe bá ŋa bɔ́ aákɔ́nákɛ́na omenyi bɛsana.
Buátɛ́ bɔkɔ,
a nyɛkɛla nyɛ́ bɛsana eényí bé me bú bíhélínyi ɔwaálɔ́na na bɔmbányɛ na bɔɔbɛ́.