Yésus ŋa hɔ́la Moyís
3
1 Yaátɛ́ asana,
banɔ́ báámɛ benyíinyí a bá ŋa bɔ́ háya mɔŋɔlɛ́ né Yésus,
énu menyi anyía Bandɔ́mɛsɛ́ ŋaá banɔ́ lɔ́ŋɔ́kɔ́ tɔ́na ;
nu ŋá nɔ́ nyɛmána nú ɔbɛ́tááka Yésus ekúlú ekime.
Bandɔ́mɛsɛ́ ŋeé wuúci tɔ́má anyía wá bámɔ́kɔ́na *mutéŋínyi beluli nyiínjie a muáŋá a aháŋá na bɛsana ebí tú ŋe sú húlinyi baacɔ.
2 U ŋeé bíínjíé buéŋí eé buólí abɔ́ Bandɔ́mɛsɛ́ ŋeé wuúci iínjíé háyɛ *Moyís ŋeé bíínjíé ɔ ɔnyiɔ ɛ ɛkatɛ́katɛ́ cɛ baacɔ bá Bandɔ́mɛsɛ́ bekime.ª
3 Yésus ŋa hɔ́la Moyís ;
bá ŋá nyɛmána bé o wuúci iínjíékíne nuúmi ɔ ɔhɔla nuúmi enú bé ŋe yiínjíé Moyís.
Híáná tɔ́na,
bé ŋe yíinjie mufalɛfa ciíbe nuúmi ɔ ɔhɔla ciíbe acɛ́ ú ma fálɛfaka.
4 Yááŋa anyía ɔɔcɔ u naŋa wá fálɛfaka ciíbe,
mbá Bandɔ́mɛsɛ́ ú ŋe kétiki bɛnyɛ́ma bikime.
5 A aháŋá ne Moyís,
ú ŋaá bá hú munyiɔnɔ e mubíínjíénú a búáyɛ́ buólí ɛ ɛkatɛ́katɛ́ cɛ baacɔ bá Bandɔ́mɛsɛ́ bekime.
Búáyɛ́ buólí ŋaá bá anyía wá laákɛ́na baacɔ bɛsana abɛ́ Bandɔ́mɛsɛ́ ŋa cɔ́ba ɔ ɔkɔɔna.
6 Mbá a aháŋá ne *Kilís,
wáŋa Ɔɔ́nɔ́ ewú u ŋé téŋínyi baacɔ bá Bandɔ́mɛsɛ́.
Basɔ́ belumitinine,
tua sɔ́ŋa bááyɛ́ baacɔ tɔ́na mbɔ́kɔ tu ŋa sɔ́ cɔ́ba ne buúse ɔ ɔháya na makɛ́nda ɛ ɛtɛ́má,
ɔháya tɔ́na mɔŋɔlɛ́ a bɛsana a bɛ́áŋa bɛ́ basɔ́ bátɛ́nánɔ́.
Haála hé ehélúme há baacɔ bá Bandɔ́mɛsɛ́
7 Buátɛ́ bɔkɔ *Efúúménénú yí Elilé ŋá kɔ́ɔna yɛ́sɛ :
« Mbɔ́kɔ nu ŋa nɔ́ lɔ́kɔ́ma okelú ú Bandɔ́mɛsɛ́ hɛ́nánɔ,
8 nuti netísíki ɛtɛ́má háyɛ ekúlú eyí cíínú sɔ́kɔ́nɔ́ ŋa bɔ́ kɛ́láka aatɔ́ ɔnata buɔ́sɛ́ ebú bé ŋe bú wuúci kɔ́kɔ́náka i iisí cɛ ɔsɛ́bɛ́á noómi. »
9 Bandɔ́mɛsɛ́ ŋaá kɔ́ɔ́na ɔsɛ :
« Ta yɛ́ cáŋa á bá anyía cíínú sɔ́kɔ́nɔ́ ŋa bɔ́ lɛ́caka buólí bukime abɔ́ ɛ ŋa mɛ́ nyiɔ́kɔ a tuɔŋɔ etíne éfendí,
bá ŋa bɔ́ mɛ́ kɔ́kɔ́náka,
bá ŋá mɛ ɔɔ́kɛ́tákɛ́na.
10 Yaátɛ́ asanaª hilóbi ŋeé mi tímbíé ná baacɔ eébé,
nyiámɛ nyɛkɔɔna eényí anyía bá ŋa bɔ́ nána bikúlú bikime e cííbú ɛtɛ́má,
bá tɛ lɔ́kɔ́má uúmi ɔtáŋa.
11 Hilóbi ŋeé mi tímbíé na baacɔ eébé,
ɛ́ɛhɛ́ ɛ́ ŋá mɛ sɔ́mbɔ́tɔ́ná anyía bé ti ké ké bú límíne ta buɔ́sɛ́ aámɛ a maabána aá haála hé ehélúme. »*
12 Banɔ́ báámɛ benyíinyí,
énu bíkékényíki anyía na aabɛ́ yɛ́ ɔtɛ́má ne isuŋí á kɛlá anyía ɔɔcɔ ɔmɔtɛ́ aanɔ́ ɛ ɛkatɛ́katɛ́ á aálɔ́nána na Bandɔ́mɛsɛ́ a wáŋa wɔɔ́sɔ.
13 Mbá énu hélúmúkúnyínyi ɛtɛ́má mɔɔ́sɛ́ mekime ekúlú ekime ayɛ́ nu ŋa nɔ́ lɔ́kɔ́ma okelú ú Bandɔ́mɛsɛ́ hɛ́nánɔ,
anyía *Sátan áŋa wu onéŋe ɔɔcɔ ɔmɔtɛ́ aanɔ́ ɛ ɛkatɛ́katɛ́,
yó nétisi úúye ɔtɛ́má anyía ɔɔcɔ oócí á cɔbá ne buúse ɔ ɔkɛla bɔɔbɛ́.
14 Yááŋa anyía,
tua sɔáŋa eébé a bá bɔ́ŋa na nuafa a bɛsana bí *Kilís,
mbɔ́kɔ tu ŋe sú bíínjie o otétényi bɔmbányɛ bɔmbányɛ bɛsana ebí tú ŋe sú lúmítékíníne e nyitúme.
15 Yiíye anyía yááŋa akɔnánɔ́ anyía :
« Mbɔ́kɔ nu ŋa nɔ́ lɔ́kɔ́ma okelú ú Bandɔ́mɛsɛ́ hɛ́nánɔ,
nuti netísíki ɛtɛ́má háyɛ ekúlú eyí cíínú sɔ́kɔ́nɔ́ ŋa bɔ́ kɛ́láka aatɔ́ ɔnata. »ª
16 Báányɛ́ bá ŋa bɔ́ lɔ́kɔ́máká okelú ú Bandɔ́mɛsɛ́,
bó wuúci kɛ́lákɛ́na aatɔ́ ɔnata e ?
Baacɔ bekime ebé *Moyís ŋa kándakána a nyɛháma nyɛ́ buɔ́lɛ́ e *Esíbit.
17 Ná baacɔ bá háányɛ́ Bandɔ́mɛsɛ́ ŋoó lóbísíkínyí a tuɔŋɔ etíne éfendí e ?
Ná baacɔ a bá ŋa bɔ́ kɛ́láka bɔɔbɛ́,
beébe bé ŋe bú weékúné i iisí cɛ ɔsɛ́bɛ́á noómi.ª
18 Ekúlú ayɛ́ Bandɔ́mɛsɛ́ ŋaá sɔ́mbɔ́tɔ́ná anyía « Bé ti ké ke bú límine ta buɔ́sɛ́ aámɛ a maabána aá haála hé ehélúme »,
ná báányɛ́ ú ŋaá bá wá kɔ́ɔnaka asana eéyé e ?
Yaŋɔ́ ɛsɛ ná baátɛ́ baacɔ e bé ŋe bú wuúci kɛ́lákɛ́ná aatɔ́ ɔnata e ?
19 Ɛ́ɛhɛ́,
banɔ́ báámɛ benyíinyí,
tu ŋa sɔ́ lɛ́ca anyía mbɔ́kɔ bó ti ómo kó bú límine hɔ́á,
ɛ́cɛ anyía bɔ́ tɛ ɔ́mɔ bɔ́ háya mɔŋɔlɛ́ ná Bandɔ́mɛsɛ́.